Bilang 12 - Hanunuu

Ti Riklamu ni Miryam ag ni Aarun

¹ Taynguna, pagkadat-an ni Miryam ag ni Aarun si Muysis dahil nakaasawa siya taga Itiyupya.

² Magkun sida, “Sa panab-anan lang aw lugud ni Muysis pag maghampang ti Panginuun? Maghampang diman siya sa panab-anan nimi.” Dapat nadnugan inda Panginuun.

³ (Si Muysis mapinakumbabaun gid higit sa tanan tawu sa kalibutan.)

⁴ Nakan susun nagbagaw ti Panginuun sa kan Muysis, hanggan sa kan Aarun, ag sa kan Miryam, “Pagluwas kamu tulu ag pag-ati sa Turda Taragbuan.” Nakan nagluwas ngani sida tulu ag nag-ati sa Turda.

⁵ Bag-u nagdugsun ti Panginuun sa panab-anan rurum ga tulduk nagtindug sa sabian Turda Taragbuan ag tinawag si Aarun hanggan si Miryam. Pagka napakarani ti duwa,

⁶ magkun ti Panginuun, “Pagpatingi kamu! Nu may purupita aku asan sa kanyu, maghampang aku sa kanya sa panab-anan pangakakitun hanggan tagin-up.

⁷ Dapat balaw katida aku nu maghampang sa kan Muysis sa kang suruguun, masarigan pag takinan niku tanan nasakupan.

⁸ Nu maghampang aku sa kanya, ga mag-aratubangan diman kami dahil kang pagbagawun sa kanya magkasalman gid mayad ag balaw sa pahalimbawa. Ga mag-akitan niya aku. Nakan hayga kamu unman gid magkadala magbagaw daut laban sa kang suruguun sa kan Muysis?”

⁹ Nagalit gid ti Panginuun sa kanda, nakan nighit siya.

¹⁰ Pagka nighit yi ti rurum sa babaw Turda, susun tinubuan si Miryam dilikadu pag sakit sa lukub, ag nanlagti kay lukub. Pagka nakakit si Aarun sa kanya,

¹¹ magkun si Aarun sa kan Muysis, “Magpakisuyu aku sa kanmu, danga kami pagparusahi nimu dahil sa nabwat nimi kasalanan.

¹² Danga pagpahintuluti nimu si Miryam bumaliw parihu sa usa ka anak ilinusad tigbak, kay katunga bilug buyuk yi.”

¹³ Nakan nanuyu si Muysis sa Panginuun, “Diyus niku, magpakihampang aku sa kanmu, paayada nimu si Miryam.”

¹⁴ Nagsagut ti Panginuun sa kan Muysis, “Unman aw nu bug-anan siya niya ama sa uyahun hampay pakay-ahun agwantahun niya ti kakay-ahan sa sulud pitu ka sirang? Nakan palwasan siya sa kampu sa sulud pitu ka sirang; pagkatapus pitu ka sirang, mahimu yi siya makabalik.”

¹⁵ Nakan ipinalwas ngani si Miryam sa kampu sa sulud pitu ka sirang. Ti manga tawu unman nagparargu sa maglakaw tugka sa ud nakabalik si Miryam sa kampu.

¹⁶ Igu natapus tunda, nighit sida sa Hasirut, ag kinmampu sa pangawakawaan Paran.