Bilang 11 - Hanunuu

Nagriklamu ti manga Israilita sa kan Muysis

¹ Nagriklamu ti manga Israilita sa kan Muysis dahil sa kanda magkalakawan kakurian. Pagka nadnugan inda Panginuun, nangisug siya ag pinauranan niya sida apuy imaw ti nag-irub sa saruy pag kampu.

² Nakan nanhagad awat ti manga Israilita sa kan Muysis, ag nandarangin si Muysis sa Panginuun, bag-u napsa ti apuy.

³ Nakan iningarnan tunda pag rugar Tabira, dahil inirub sida apuy Panginuun.

⁴ May manga gurupu day-uhan nagkuyug sa manga Israilita maghanap kanda pagkaibgan kan-un pag karan-unun, nakan hanggan ti manga Israilita nagriklamu magkumun, “Nu may makaun lang mana kita taguban.

⁵ Katpung ati di waya kita sa Ihiptu, may magkakaun kita manga pangayawan isda hanggan manga kunduy, katimun, lasuna ag manga bawang.

⁶ Dapat atay, magpanlumuy yi kita; pasay wadi mana kanta pag kan-un.”

⁷ Inda pag mana parihu sa manga butir dariit malagti.

^8-9 Pagpunpunun manga Israilita sa babaw daga kada surip ag paggalingun nida ngatay pagbaywun sa lusung. Bag-u paggatungun sa anglit ag pagbuwatun manipis pag tinapay. Kay lasa parihu sa tinapay tinama sa lana ulibu.

¹⁰ Nadnugan ni Muysis ti riklamu kada magtal-anakan sa sabian nida manga turda. Nakan nangisug gid ti Panginuun sa kanda, ag dahil siyun naaburidu si Muysis.

¹¹ Nagpaingana siya sa Panginuun, “Hayga duy aku, kanmu suruguun, pinakan-an daka pag kakurian? Hintay duy lugud ti nabwat niku balaw nimu ikinabaya, ipinapas-an nimu sa kangku ti kakurian manga tawu?

¹² Kang aw lugud manga anak sida? Aku aw lugud kanda ama? Hayga pagsabihun nimu sa kangku alagai niku sida parihu sa usa ka manugpamataw magsabibi anak, ag darahun sida sa itinaratu nimu sa kanda manga ginurang pag daga?

¹³ Naan duy aku pagmam-ul taguban para sa tunda pag manga tawu? Dahil parargu kanda magriklamu sa kangku kuntay pakan-i niku sida kanda makaun pag taguban.

¹⁴ Balaw duy niku kaya sida tanan alagaan. Purus yi inda pag kakurian niku.

¹⁵ Nu katunda lang waydi kanmu pagbuwatun sa kangku, matya yi lang nimu aku taynguna. Nu magbaya kawu sa kangku, danga nimu aku pagpabay-ani makurian.”

¹⁶ Nakan magkun ti Panginuun sa kan Muysis, “Tipuna nimu ti 70 ka paggurangunun sa Israil, ti pagkilalan-un nimu takinan nida nasakupan, ag tabana nimu sa Turda Taragbuan, bag-u patinduga sida ati kaibahan nimu.

¹⁷ Dumugsun aku ag manhampang sa kanmu siyun, bag-u ibahagi niku sa kanda kay iba ka Ispiritu ti ipinakaun niku sa kanmu hampay makaawat sida sa kanmu.

¹⁸ “Bag-u sumabi kawu sa manga tawu lumpiyuha nida kanda sadili, dahil aldaw may makaun yi sida taguban. Sabiha nimu inda sa kanda: ‘Nadnugan niku kanyu riklamu magkaibug kamu mangaun taguban. Pagsabihun niyu mas mayad waya kanyu kahamtangan sa Ihiptu. Nakan aldaw, pakan-an niku kamu taguban hampay makakaun kamu.

¹⁹ Bukun lang usa ka sirang, ngatay duwa, ngatay lima, ngatay 10, ngatay 20 ka sirang kamu pag makakaun inda,

²⁰ nu unman usa ka bulan, tugka sa manawa kamu ag dayu yi kamu makakaun inda. Dahil binugyahan niyu aku kanyu manuggiya, ag nagriklamu kamu sa kangku kuntay balaw yi lang mana kamu nighit sa Ihiptu.’ ”

²¹ Dapat magkun si Muysis, “600,000 tanan kang kaibahan tawu, ag taynguna magkun kawu pakan-an nimu sida kanda makaun pag taguban sa sulud usa ka bulan?

²² Una waya iyawun nimi ti tanan manga karanidu hanggan manga baka, una sarapun waya nimi ti manga isda sa dagat, dayu duy inda kumang-ud sa kanda.”

²³ Magkun ti Panginuun sa kan Muysis, “May hangganan aw lugud kang kamaskihan? Makitan nimu taynguna nu mangyari kang pagsabihun ngatay unman.”

²⁴ Nakan linmakaw si Muysis ag sinabi sa manga tawu ti sinabi Panginuun. Tinipun niya ti 70 ka paggurangunun ag pinatindug sa sangput Turda.

²⁵ Bag-u nagdugsun ti Panginuun sa panab-anan rurum ag naghampang sa kan Muysis. Ipinakaun Panginuun sa 70 ka paggurangunun kay iba ka Ispiritu ni Muysis. Ag pagka natanggap nida inda, nagbagaw sida ga manga purupita, dapat udyi inda nangyari uman.

²⁶ Ti duwa sa 70 ka paggurangunun sida ni Ildad ni Midad, napatayak sida sa kampu, balaw nag-ati sa Turda. Dapat natanggap diman nida ti Ispiritu, nagbagaw diman sida parihu sa manga purupita.

²⁷ May usa ka kalay-awan lalaki nalagiw atag kan Muysis ag nagsabi magbagaw si Ildad ag si Midad ati sa kampu.

²⁸ Si Huswi kay anak ni Nun, kay kaawat ni Muysis ginan sa anak di waya siya, nagkumun tag kan Muysis, “Paapasa sida.”

²⁹ Dapat nagsagut si Muysis, “Magkataranta aw lugud kawu nu hintay ti mangyari sa kang magpangulu? Nu sa kangku lang, gustu niku ti tanan nasakupan Panginuun pakan-an niya Ispiritu hampay makabagaw sida parihu sa manga purupita.”

³⁰ Bag-u binmalik si Muysis atag sa kampu hanggan ti manga paggurangunun sa Israil.

³¹ Taynguna, nagpadara ti Panginuun durus nagdara manga pugu ginan sa dagat. Maglayang-layang sida sa sangput kampu, manga 2 ka luk-an siku kay abwat sa daga ag pira ka kilumitru kay nahamnaan.

³² Nakan sa tunda pag sirang, nandarakup pugu ti manga tawu tugka sa yabi hanggan sa dasun waya pag sirang. Unman may nakabuul kurang sa 30 ka saku ag ipinauga nida sa sangput kampu.

³³ Dapat habang pagtaltaun di waya nida ti taguban ag udwaya natlun, nagalit gid ti Panginuun sa kanda, pinadarahan niya sida masyadu pag sarut.

³⁴ Nakan iningarnan Kibrut Hataaba tunda pag rugar dahil ati pag-ilinbung ti manga tawu daluk-daluk sa taguban.

³⁵ Siyun ginan, naglakaw ti manga Israilita atabug sa Hasirut ag ati pag kinmampu.