Bilang 10 - Hanunuu

Ti manga Turumpita Pilak

¹ Magkun ti Panginuun sa kan Muysis,

² “Pagpabuwat kawu duwa ka turumpita pilak, inda kanmu gamitun hampay tipunun ti manga tawu ag ialistu sida sa paglakaw.

³ Nu sabay ipatunug ti duwa ka turumpita, maniripnan ti buu nasakupan sa may sabian Turda Taragbuan.

⁴ Nu kay lang usa ti ipatunug, ti manga takinan lang kada lahi ti maniripnan sa kanmu atubangan.

⁵ Nu patunugun ti turumpita hampay ialistu ti manga tawu sa paglakaw, ti manga lahi sa butlakan baliwa Turda ti umuna lumakaw.

⁶ Sa ikadwa pag tunug turumpita, ti lahi waydi sa salatan baliwa Turda ti umuna lumakaw. Inda pag tunug imaw ti magsabi magkalakaw yi sida.

⁷ Dapat tuhay pag tunug turumpita nu tipunun sida.

⁸ “Ti manga magtal-anakan lang ni Aarun pag manga manughandug ti pumatnug manga turumpita. Inda pag manga surundanun kailangan niyu sundun hanggan niyu manga magtal-anakan hanggan waya aban.

⁹ “Nu ati yi kamu sa kanyu kadagaan, ag lumaban yi kamu sa manga kalaban nag-api sa kanyu, patnuga niyu kanyu turumpita hampay aku, ti Panginuun niyu Diyus, alalahanun niku kamu, ag iribri sa kanyu manga kalaban.

¹⁰ Sa udas magsaya niyu — sa kanyu pag-alaala sa kapistahan, hanggan sa Pista Lapus Lati — patnugun diman niyu ti manga turumpita nu maghayin kamu manga handug pagsunugun hanggan handug tungkul sa mayad pag pakiusa. Ti manga turumpita ti magpaalaala sa kangku sa kang taratu sa kanyu. Aku, ti Panginuun niyu Diyus.”

Nighit ti manga Israilita sa Sinai

¹¹ Pagka sa ika-20 pag sirang sa ikadwa pag bulan, sa ikadwa pag timpu katpung ipinalwas ti manga Israilita ginan sa Ihiptu, napaabwat ti rurum ginan sa Turda Tiripnan.

¹² Nighit ti manga Israilita sa pangawakawaan Sinai ag naparargu kanda lakaw tugka sa nagpat-ung ti rurum sa Paran pag pangawakawaan.

¹³ Inda kanda un-an naglakaw nagsunud angay sa sugu Panginuun sa kan Muysis.

¹⁴ Ti un-an naglakaw pag gurupu dara kanda bandira ti lahi ni Huda pagpangunahan ni Nashun kay anak ni Aminadab.

¹⁵ Kan Isakar pag lahi pagpangunahan ni Natanyil anak ni Suwar,

¹⁶ ti lahi ni Sabulun pagpangunahan ni Ilyab anak ni Hilun.

¹⁷ Igu nalubad ti Turda Tiripnan, ti nagdara manga magtal-anakan ni Girsun hanggan kay magtal-anakan ni Mirari, ag dasun sida linmakaw.

¹⁸ Ti dasun linmakaw dara kanda bandira ti gurupu pagpangunahan lahi ni Rubin. Kanda takinan si Ilisur anak ni Sidiyur.

¹⁹ Kan Simyun pag lahi pagpangunahan ni Silumyil anak ni Surisaday,

²⁰ kan Gad pag lahi pagpangunahan ni Iliyasap anak ni Diyuwil.

²¹ Bag-u dinmasun ti magtal-anakan ni Kuhat may dara manga banal pag kagamitan Turda. Kailangan nipatindug yi ti Turda bag-u sida rumas-ug sa kanda kampuhan pag rugar.

²² Ti dasun linmakaw dara kanda bandira ti gurupu pagpangunahan lahi ni Ipraim. Kanda takinan si Ilisama anak ni Amihud.

²³ Kan Manasis pag lahi pagpangunahan ni Gamalyil anak ni Pidasur,

²⁴ kan Binhamin pag lahi pagpangunahan ni Abidan anak ni Gidyuni.

²⁵ Ti pinaka-uryan linmakaw dara kanda bandira ti gurupu pagpangunahan lahi ni Dan. Sida ti manga guwardiya sa dayuan tanan gurupu. Kanda takinan si Ayisir anak ni Amisaday.

²⁶ Bag-u kan Asir pag lahi pagpangunahan ni Pagiyil anak ni Ukran,

²⁷ ag kan Niptali pag lahi pagpangunahan ni Ahira anak ni Inan.

²⁸ Katida ti pagkasunud-sunud manga linahi ni Israil sa kanda magkarabanan maglakaw.

²⁹ Bag-u magkun si Muysis sa kay bayaw sa kan Hubab anak ni Ruwil taga Midyan, “Maglakaw yi kami atabug sa rugar itinaratu Panginuun ipakaun niya sa kanmi. Nakan pagkuyug kawu sa kanmi, balaw nimi kawu pabay-anan, dahil nanaratu ti Panginuun papaladan niya ti Israil.”

³⁰ Nagsagut si Hubab, “Dayu duy aku! Muli lang aku sa kang banwa hanggan sa kang katawuhan.”

³¹ Magkun si Muysis, “Nu mahimu, danga kawu magpablag sa kanmi. Kawu ti may alam nu naan ti mayad pag rugar sa pangawakawaan kanmi kampuhan.

³² Nu kumuyug kawu sa kanmi, pakan-an di nimi kawu tanan papalad ipakaun Panginuun.”

³³ Nakan nighit ngani sida ginan sa bantud Panginuun, naglakaw sa sulud tulu ka sirang. Mag-una sa kanda ti Kaban Kasunduan hampay manhanap rugar kanda mapaharyan.

³⁴ Nu sirang sa kanda maglakaw ti rurum Panginuun sa kanda tungud.

³⁵ Kada pagdarahun nida ti Kaban Kasunduan, indaay kay pagsabihun ni Muysis, “Panginuun, kawu duy ti pag-una ag wayaka nimu kanmu manga kalaban. Mana manlinayas sida.”

³⁶ Ag nu pag-ipat-ung maan ti Kaban Kasunduan, magkumun maan si Muysis, “Panginuun, pagsitay yi duy kawu ag asikasuha nimu ti kayamuan nasakupan Israil.”