Bilang 1 - Hanunuu

Ti Un-an pag Sinsus sa Israil

¹ Katpung un-an pag sirang sa ikadwa pag bulan, sa ikadwa pag timpu ginan sa kay nagluwas manga Israilita sa Ihiptu, naghampang ti Panginuun sa kan Muysis ati sa Turda Taragbuan sa pangawakawaan Sinai. Magkun siya,

² “Sinsusa niyu ti tanan Israilita angay sa kanda lahi hanggan magtal-anakan. Listahan niyu ti ngaran tanan lalaki

³ may idad 20 ka timpu paabwat may kakayahan yi lumaban sa girahan. Kamu duwa ni Aarun ti mangasikasu sa sinsus.

⁴ Mangawat sa kanyu ti takinan kada lahi.”

^5-15 Inda ti manga tawu mangawat sa kanyu: Lahi Takinan Rubin Ilisur anak ni Sidiyur Simyun Silumyil anak ni Surisaday Huda Nashun anak ni Aminadab Isakar Natanyil anak ni Suwar Sabulun Ilyab anak ni Hilun Ipraim kay anak ni Husi Ilisama anak ni Amihud Manasis kay anak ni Husi Gamalyil anak ni Pidasur Binhamin Abidan anak ni Giduni Dan Ayisir anak ni Amisaday Asir Pagiyil anak ni Ukran Gad Iliyasap anak ni Diyuwil Niptali Ahira anak ni Inan.

Lahi Takinan

¹⁶ Sida ti manga takinan manga lahi pinili ginan sa nasakupan Israil.

^17-18 Kaibahan inda pag manga takinan, tinipun nida ni Muysis ni Aarun ti tanan Israilita sa tunda diman pag sirang. Ilinista nida ti tanan lalaki may idad 20 ka timpu paabwat, angay sa kanda lahi ag magtal-anakan.

¹⁹ Ilinista ni Muysis sida ati sa pangawakawaan Sinai, angay sa pag-isugu Panginuun sa kanya.

^20-43 Inda ti bilang manga lalaki may idad 20 paabwat may kakayahan lumaban, ilinista angay sa kanda lahi ag magtal-anakan: Lahi Bilang Rubin (ti panganay ni Hakub) 46,500 Simyun 59,300 Gad 45,650 Huda 74,600 Isakar 54,400 Sabulun 57,400 Ipraim kay anak ni Husi 40,500 Manasis kay anak ni Husi 32,200 Binhamin 35,400 Dan 62,700 Asir 41,500 Niptali 53,400

Lahi Bilang

^44-45 Sida ti manga lalaki nabilang nida ni Muysis ni Aarun hanggan 12 ka takinan Israil. Ti kada usa sa kanda imaw ti pinagkabilug sa kanda magtal-anakan. Kanda idad 20 ka timpu paabwat ag may kakayahan man-gira.

⁴⁶ Ti kabuuhan bilang nida 603,550 tanan.

⁴⁷ Dapat balaw kaibahan siyun ti manga lahi ni Libi.

⁴⁸ Dahil magkun ti Panginuun sa kan Muysis,

⁴⁹ “Danga niyu pagminsanan ti lahi ni Libi sa sinsus iba ka manga Israilita manirbi sa udas girahan.

⁵⁰ Bagkus ngap, pakan-an sa kanda ti buruwatun mag-asikasu sa Turda nu naan pag maulian ti Kasuguan hanggan ti tanan kagamitan siyun. Sida ti mandara Turda hanggan tanan kagamitan asan, ag kailangan dahanan nida inda bag-u pagkampu sida sa kay sangput.

⁵¹ Nu halinun yi ti Turda, sida diman ti manhalin tunda. Ag nu ipatindug maan, sida diman ti manpatindug tunda. Matyun una si unu ti bumuwat sa tunda pag buruwatun sa Turda Taragbuan balaw lahi ni Libi.

⁵² Kumampu ti manga Israilita angay sa kanda lahi, ti kada lahi may bandira.

⁵³ Dapat ti manga lahi ni Libi kumampu sa sangput Turda Taragbuan nu naan pag maulian ti Kasuguan, hampay balaw aku magalit sa nasakupan Israil. Katungdanan manga Libita ti mag-alaga sa Turda Taragbuan.”

⁵⁴ Binwat inda tanan Israilita angay sa pag-isugu Panginuun sa kan Muysis.