Amus 9 - Hanunuu

Unman may Makapalagiw sa Parusa Diyus

¹ Magkun si Amus, “Nakitan niku ti Panginuun matindugan sa may handugan ag magkun siya, ‘Hampaka ti suru manga tulduk Balay Diyus hampay marup-ag kay bubungan ag madugsakan ti manga tawu. Ti masawad buhi sa kanda mamatay di sa girahan. Una di usa sa kanda unman may makapalagiw ngatay makaribri.

² Una patagu waya sida sa sirung daga, ati sa rugar manga namatay, bul-un diman niku sida ati. Una dumayik waya sida sa langit, butungun diman niku sida atag sirung.

³ Una patagu waya sida sa katayungtungan Bantud Karmilu, hanapun niku sida ati ag dakpun. Una patagu waya sida sa sirung dagat, suguun niku ti ulay hampay kagtun sida.

⁴ Una bihagun waya sida nida manga kalaban, ipamatay di gid niku sida. Buwatun gid niku inda; ipadamhak niku sida ag balaw awatan.’ ”

⁵ Magkun waya si Amus, “Nu tandugun Panginuun Diyus Makamaskihan ti daga, matandug inda ag manlulumian ti tanan mag-ulian asan. Kay magtandug inda parihu sa mag-awas ag maghubas Sapa Nilu sa Ihiptu.

⁶ Ti Diyus ti nagbuwat kay ulian sa langit. Siya diman ti nagbuwat kalayawan sa tungud daga. Siya diman ti magtipun danum dagat sa manga rurum ag pag-ipauran niya inda sa daga. Kay ngaran imaw ti Panginuun.”

⁷ Magkun ti Panginuun, “Kang magbantay sa kanyu pag manga taga Israil parihu lang sa manga taga Itiyupya. Tutuu ipinalwas niku kamu sa Ihiptu, dapat ipinalwas diman niku ti manga Pilistiyu sa Kaptur hanggan ti manga Aramiyu sa Kir.

⁸ Aku, ti Panginuun Diyus, magtiid sa kanyu daut pag kaharian. Rurisun niku kamu tugka sa madura kamu sa kalibutan. Dapat may masawad sa kanyu pag manga linahi ni Hakub. Aku, ti Panginuun, ti magsabi inda.

⁹ Bantayi niyu! Mansugu yi aku; ayagun niku kamu pag nasakupan Israil kaibahan tanan nasyun, parihu sa mag-ayag manga uyas. Nu kabitay ti manga dariit pag batu unman makalapus sa ayagan,

¹⁰ ti manga daut sa kanyu unman diman makalapus sa kang parusa, bagkus ngap mamatay sida tanan sa girahan. Sida inda ti magsabi unman kunu may daut rumas-ug sa kanda.”

Ipatindug maan ti Israil

¹¹ “Rumas-ug ti sirang ipatindug maan niku ti kaharian ni Dabid parihu sa payag nagba. Karinuun niku tunda pag manga nagba. Ipatindug maan niku tunda ag ibalik niku parihu sa kabag-u,

¹² hampay masakup manga Israilita ti nasawad daga taga Idum ag iba waya pag manga nasyun ti pagkilalan-un niku kangku. Aku, ti Panginuun, ti magsabi inda, ag buwatun niku inda pag manga bagay.”

¹³ Magkun waya gid ti Panginuun tungkul sa manga taga Israil, “Rumas-ug ti udas umabunda gid kanda manga ani, udwaya ngani nida magkatapus ti mag-ani, umpisahan yi maan ti mag-aradu. Ag udwaya magkatapus kanda magpigis ubas, panahun yi maan tig-taranum ubas. Nu bantayun ti masyadu mayamu pag manga ubas sa manga bantud hanggan sa tagudtud, bilang ga magbulus inda matagsing pag bag-u intus.

¹⁴ Ipabalik niku kang nasakupan manga taga Israil sa kanda daga ginan sa pagkabihag. Ipatindug maan nida kanda nagkaradaut pag manga banwa ag ati sida pag mangulian. Mantanum sida ubas ag manginum kay intus inda. Mantanum sida sa kanda manga tanman ag kan-un nida kay burak.

¹⁵ Ipatahan maan niku sida sa kanda daga, ag balaw yi sida paighitun uman sa daga ipinakaun niku sa kanda.” Inda ti sinabi Panginuun niyu Diyus.