Amus 8 - Hanunuu

Ti Pangakakitun ni Amus tungkul sa Balulang may Sukad manga Burak Kayu Lutu

¹ Inda ti ipinakakit Panginuun Diyus sa kangku: Nakitan niku ti usa ka balulang may sukad manga burak kayu lutu.

² Nagpaingana siya sa kangku, “Amus, unu kanmu nakitan?” Nagsagut aku, “Usa ka balulang may sukad manga burak kayu lutu.” Bag-u magkun ti Panginuun sa kangku, “Rinmas-ug yi ti katapusan niku nasakupan Israil. Balaw yi niku sida kaawaan.

³ Sa tunda pag sirang, ti masulung pag karantahan sa Balay Diyus bumaliw lulumian dahil mayamu manga namatay ti magkarawayak una naan. Bag-u unman yi gid may masaydan iringayan. Aku, ti Panginuun Diyus, ti magsabi inda.”

Ti Kasalanan manga Mayaman Israilita

⁴ Patingihi niyu inda, kamu pag mag-api sa manga pugri ag maggayak rurisun sida.

⁵ Mag-apura kamu matapus ti Pista Lapus Lati ngatay ti Sirang Pamahari hampay makapabili yi kamu uyas ag makapandaya sa manga manugbili sa panab-anan niyu madaya pag timbangan hanggan takalan.

⁶ Mag-apura kamu makapabili butir may lakay upa, ag makabili pugri pag tawu ipinabili suruguun dahil unman siya makabayad sa kay utang, una kay utang usa lang ka paris lapak.

⁷ Nakan magsumpa ti Panginuun, ti Diyus pag-ipadayaw linahi ni Hakub, “Balaw gid niku malimtan ti tanan kadautan binuwat niyu.

⁸ Dahil siyun, palinugun niku kanyu daga ag manlulumian kamu. Matandug gid masyadu kanyu daga, parihu sa pag-awas ag paghubas Sapa Nilu sa Ihiptu.

⁹ Sa tunda pag sirang parusahan niku kamu, ipasalup niku ti init sa karaw-an sirang, nakan mandulum una sirang waya. Aku, ti Panginuun Diyus, ti magsabi inda.

¹⁰ Buwatun niku lulumian kanyu kabayaan sa pista, ag kanyu magkarantahan buwatun niku hirinangbitun. Parutayan niku kamu saku ag suguun pagpakalbu sa pagpakakit kanyu karukuan, parihu sa manga gurang maglumi sa pagkamatay nida bugtung pag anak. Dapat mas mahigpit waya gid ti uryan pag parusa.”

¹¹ Magkun waya gid ti Panginuun Diyus, “Rumas-ug ti udas padarahan niku lun-us kanyu daga. Dapat balaw inda lun-us sa karan-unun ngatay uwaw sa danum, nu unman lun-us ag uwaw sa pagpatingi sa kang bagaw.

¹² Gasaun kamu sa magpakahanap tawu makatultul kang bagaw sa kanyu, dapat unman gid niyu inda makitan una naan kamu pag umatag.

¹³ Sa tunda pag sirang nu naan parusahan niku kamu, una kanyu marinu pag manga daraga hanggan kanyu kan-akan mabul-an malay sa uwaw.

¹⁴ Kamu pag manga magsumpa sa ngaran manga diyus-diyusan Samarya, Dan hanggan Biirsiba, rurisun kamu ag balaw yi kamu makabangun.”