Amus 7 - Hanunuu

Ti Pangakakitun ni Amus tungkul sa Apan, sa Apuy ag sa Panuntun

¹ Inda ti ipinakakit Panginuun Diyus sa kangku: Nakitan niku nanipun siya mayamu gid pag manga apan. Nangyari inda igu niayaw sa hari kay bahagi ginan sa un-an pag anihan sa tanman. Ag igu mag-umpisa yi ti ikadwa pag anihan,

² nakitan niku kinaun manga apan ti tanan tanum ag unman may nasawad. Nakan magkun aku, “Panginuun Diyus, magpakihampang aku sa kanmu patawada duy nimu ti manga linahi ni Hakub. Kabitay sida mabuhi nu mangyari inda pag parusa? Malumuy sida ag unman may kakayahan.”

³ Nakan nagbag-u ti kaisipan Panginuun ag magkun siya, “Kanmu nakitan balaw yi mangyari.”

⁴ May ipinakakit waya ti Panginuun Diyus sa kangku: Nakitan niku nag-alistu siya hampay parusahan kay nasakupan sa panab-anan apuy. Bag-u pinamara apuy ti bulbugan danum ginan sa sirung daga, ag inirub ti tanan asan sa daga Israil.

⁵ Nakan magkun aku, “Panginuun Diyus, magpakihampang aku sa kanmu danga duy inda pagbuwata. Kabitay mabuhi ti manga linahi ni Hakub nu mangyari inda? Malumuy sida ag unman may kakayahan.”

⁶ Nakan nagbag-u ti kaisipan Panginuun ag magkun siya, “Kanmu nakitan balaw yi mangyari.”

⁷ Indaay waya gid ti ipinakakit Panginuun Diyus sa kangku: Nakitan niku ti Panginuun matindugan arani sa may alad batu ag may paghiyaptan siya panuntun paggamitun panukat sa alad batu nu ngatay tul-id kay pagkabuwat tunda.

⁸ Nagpaingana ti Panginuun sa kangku, “Amus, unu kanmu nakitan?” Sinmagut aku, “Panuntun duy.” Bag-u magkun siya, “Angay sa kang panuntun, balaw matul-id ti buhi niku nasakupan Israil. Nakan taynguna balaw yi niku sida kaawaan.

⁹ Wasakun niku ti manga simbahan sa abwat pag manga rugar pagsambahan manga taga Israil linahi ni Isaak. Ipagira niku sa manga kalaban ti Israil, ti kaharian ni Hari Hirubuam.”

Si Amus ag si Amasiyas

¹⁰ Taynguna, si Amasiyas manughandug sa Bitil nanpadara tultulanun sa kan Hirubuam ti hari Israil. Magkun siya, “Maggayak daut si Amus laban sa kanmu atay sa Israil. Balaw yi maagwanta manga tawu kay manga pagsabihun.

¹¹ Inda kay pagsabihun: ‘Mamatay si Hirubuam sa labanan, ag pihu gid bihagun ti manga taga Israil bag-u darahun sa iba nasyun.’ ”

¹² Bag-u magkun si Amasiyas sa kan Amus, “Kawu pag purupita, pag-ighit kawu sitay ginan ag pagbalik sa Huda. Ati buwata kanmu parangabuhian bilang purupita.

¹³ Danga yi kawu magtultul bagaw Diyus sitay sa Bitil, dahil atay ti balay Diyus ti pagsambahan hari hanggan kay kaharian.”

¹⁴ Nagsagut si Amus sa kan Amasiyas, “Balaw aku purupita kaybi ag balaw diman aku tagasunud usa ka purupita, nu unman manugbantay aku karanidu hanggan manug-alaga manga kayu sikumuru.

¹⁵ Dapat sinabihan aku Panginuun tayaki niku kang tarabahu manug-alaga karanidu, ag pagtultul aku kay tultulanun sa kanyu manga taga Israil sa kay nasakupan.

^16-17 Kainda, kawu ti mag-ampara sa kangku danga aku magtultul bagaw Diyus sa manga taga Israil sa kay linahi ni Isaak, patingihi inda ti pagsabihun Panginuun laban sa kanmu: ‘Kanmu asawa bumaliw babayi baraydan ag kanmu manga anak mamatay sa girahan. Kanmu manga daga huray-hurayun manga kalaban, ag mamatay kawu sa iba nasyun. Pihu gid bihagun ti manga taga Israil ag darahun sa iba nasyun.’ ”