Amus 6 - Hanunuu

Ti Kadautan manga Takinan Israil

¹ Kaawaawa kamu pag manga takinan Siun hanggan Samarya, masalimpayaan lang ag unman may pag-isipun. Pag-isipun niyu kanyu sadili kuntay garalangun pag manga tawu sa magpanguna pag nasyun, ag sa kanyu pag magdangup kanyu manga nasakupan.

² Bantayi niyu ti nangyari sa banwa Kalni, ti daka pag banwa Hamat, hanggan ti banwa Gat sakup Pilistiya. Mas makapangyarihan aw waya kamu kaysa tunda pag manga kaharian? Mas malapad aw lugud kanyu daga kaysa kanda?

³ Kaawaawa kamu pag mag-isip unman may rumas-ug sirang pagparusa sa kanyu. Dapat sa daut niyu pagbuwatun, kanyu ngap pagbutungun tag sa kanyu sadili ti sirang lunsay yi lang maratyan.

⁴ Kaawaawa kamu pag manga maigyaan lang sa kanyu marinu pag manga parahuwayan, ag magpasawa-sawa lang sa kaun taguban anak karanidu hanggan pinatabul baka.

⁵ Kaawaawa kamu pag manga magpathaw kanta habang magpatunug alpa ag maraibgun magbuwat manga pamatunug, parihu sa kan Dabid.

⁶ Kaawaawa kamu pag manga mabaskug mag-inum intus hanggan maggamit mahalaga pag manga pamanglu, dapat unman magpanrukuan sa pararas-ugun kadamhakan niyu nasyun.

⁷ Nakan kamu pag manga takinan imaw ti un-an bihagun, bag-u umapas yi kanyu kasayahan hanggan masalimpayaan.

Pagkadat-an Diyus ti Marapadayaw-dayaw Israil

⁸ Nagsumpa ti Panginuun Diyus, ti Diyus Makamaskihan, magkun siya, “Pagkadat-an niku ti marapadayaw-dayaw pag manga linahi ni Hakub, ag pagkadat-an niku ti mapag-un pag manga bahagi nida banwa. Nakan ipakaun niku sa kalaban kanda banwa hanggan ti tanan asan.”

⁹ Nu may sampulu ka tawu masawad sa usa ka balay, sida tanan mamatay diman.

¹⁰ Ti namatay bul-un niya katawuhan kay bangkay hampay sunugun. Bag-u paingan-un niya ti mataguan sa sulud balay, “May kaibahan aw waya kawu asan?” Nu sumagut siya, “Unman” sumabi ti tawu nagpaingana, “Danga mag-ingay! Barang masampit waya nimu ti ngaran Panginuun ag maparusahan kita.”

¹¹ Sa tutuu, nu ti Panginuun yi ngani ti magsugu, wayakun niya ti tanan balay, dariit ngatay daraka.

¹² Makapalagiw aw nguna ti manga kabayu sa batuhan? Makaaradu aw nguna ti baka sa dagat? Unman! Dapat ti katadlungan binwat niyu makasakit sa tawu, ag ti matarung binwat niyu daut.

¹³ Magbaya kamu sa kanyu panalu laban sa manga banwa Lu Dibar ag Karnaim, bag-u magkun kamu, “Natalu nita sida sa panab-anan nita sadili kabisugan.”

¹⁴ Dapat sa kay tutuu magkun ti Panginuun Diyus Makamaskihan, “Kamu pag nasakupan Israil ipagira niku sa usa ka nasyun. Pakurianan nida kamu ag sakupun kanyu manga rugar ginan sa Libu Hamat tugka sa luung Araba.”