Amus 5 - Hanunuu

Ti Panawagan sa Pag-ampu

¹ Nasakupan Israil, patingihi niyu inda pag hirinangbitun tungkul sa kanyu:

² Ti Israil parihu sa usa ka tugnaw daraga, naplid ag unman yi gid nakabangun uman. Pinabay-anan siya mabugtangan sa kay sadili daga, unman yi gid may nanbangun sa kanya.

³ Nakan magkun ti Panginuun Diyus, “Sa 1,000 sundalu ipadara usa ka banwa sa Israil, 100 wadi ti masawad. Sa 100 sundalu kay ipadara, 10 wadi ti masawad.

⁴ Nakan pagdangup kamu sa kangku, kamu pag nasakupan Israil, agud mabuhi kamu.

⁵ Danga yi kamu mag-atag sa Bitil, sa Gilgal, ngatay sa Biirsiba hampay mansamba ati. Dahil pihu gid bihagun ti nasakupan Gilgal ag madura ti Bitil.

⁶ Pagdangup kamu sa kangku, kamu pag lahi ni Husi, agud mabuhi kamu. Dahil nu unman, girahun niku kamu ga apuy. Nakan maruris ti Bitil ag unman may makaampara inda.

⁷ Kaawaawa kamu! Pag-ikadaut niyu ti katuwiran ag pagbul-an halaga niyu ti katadlungan.”

⁸ Ti Diyus ti naglalang gurupu manga pamgasan pag-ingarnan Pliyadis ag Uryun. Siya ti magpalawuy rayaw sa dulum, ag sirang sa yabi. Pagtipunun niya ti danum sa manga rurum ginan sa kadagatan bag-u pagpauranan niya ti daga. Panginuun kay ngaran.

⁹ Siya ti kadaka magpadara kadamhakan sa mapag-un pag banwa magkasangputan alad batu, ag pagrunutun ti manga kampu banwa.

¹⁰ Kamu pag manga taga Israil, pag-ikagalit niyu ti magsintinsiya tama hanggan sa magtultul tutuu sa hurusayan.

¹¹ Pag-ihid-ihidun niyu ti manga pugri ag pagpilitun pumakaun sa kanyu kanda patubas. Nakan unman kamu makaulian sa ipinatindug niyu pag manga balay buwat sa batu, ag unman kamu makainum intus ginan sa itinanum niyu pag manga ubas.

¹² Dahil alam niku nu kabitay kay kayamu ag nu kabitay kay ka buyat kanyu manga kasalanan. Pag-unuunuhun niyu ti manga tawu unman may kasalanan ag pagkuwartahan waya niyu. Unman niyu pagpakan-an katadlungan ti manga pugri sa hurusayan.

¹³ Dahil maghari taynguna ti kadautan, ti manga madunung udyi lang mag-ingay.

¹⁴ Buwata yi lang niyu ti mayad, danga kay daut hampay mabuhi kamu ag giyahan Panginuun Diyus Makamaskihan, parihu sa kanyu pagsabihun.

¹⁵ Amani niyu ti daut, buwata ti mayad, bag-u pagsintinsiya kamu matadlung sa hurusayan. Barang abi maawa ti Panginuun Diyus Makamaskihan sa nasawad pag manga lahi ni Husi.

¹⁶ Nakan inda ti pagsabihun Panginuun Diyus Makamaskihan: “Rumas-ug ti kaudasan masaydan ti manga lulumian hanggan aramirawan sa kanyu manga baklayan ag manga buruybuyahan. Ti manga manugtanman tawagan hampay manlumi sa manga namatay kaibahan manga tawu inupahan hampay manlumi.

¹⁷ May manga manlulumian diman sa kanyu manga taranuman ubas, dahil parusahan niku kamu. Aku, ti Panginuun, ti magsabi inda.”

Ti Sirang Pagsintinsiya Panginuun

¹⁸ Kaawaawa kamu ti magpatigagad sa kasirangan Panginuun. Danga kamu mag-isip kuntay kanyu karibrihan tunda pag sirang, dahil parusahan ngap kamu.

¹⁹ Parihu kamu sa usa ka tawu mag-isip ribri yi siya dahil nakapalagiw siya sa liyun, dapat nasulang ngap niya ti usu. Ngatay mag-isip siya unman yi may mangunu sa kanya dahil ati yi siya sa sulud niya balay, dapat pagka iwinaklay niya kay kamang sa lingub kinagat ngap ulay kay kamang.

²⁰ Tutuu gid ti sirang Panginuun dumara parusa ag balaw karibrihan; parihu inda sa kadudulman unman gid may una di diit pag rayaw.

Ti Pagkaibgan Panginuun Buwatun Niya Nasakupan

²¹ “Pagkadat-an gid niku kanyu manga kapistahan; unman gid aku magbaya sa kanyu pagbuwatun pag tiripun.

²² Nakan una waya daran-an niyu aku tuhay-tuhay pag manga handug, una ti pinakamayad waya pag handug, balaw niku inda tanggapun.

²³ Apasi yi niyu ti maingay niyu pagkarantahan. Balaw aku magkaibug magpatingi tunug niyu manga alpa.

²⁴ Bagkus ngap ipakakit niyu ti katadlungan ag buwata niyu ti matadlung; danga niyu inda pag-apasi parihu sa sapa unman may apas kay magbulus.

²⁵ “Nasakupan Israil, katpung ati sa pangawakawaan kanyu manga ginurang sa sulud upatpulu ka timpu, nansagda aw sida sa kangku? Unman!

²⁶ Bag-u taynguna pagdara-darahun waya niyu si Sakut, ti diyus-diyusan kanyu pagbaliwun hari, ag si Kaywan, kanyu diyus-diyusan pamgasan. Binwat niyu inda pag manga histuda hampay sambahun.

²⁷ Nakan ipabihag niku kamu ag darahun tag sa luwas waya Damasku.” Inda ti sinabi Panginuun pag-ingarnan Diyus Makamaskihan.