Amus 4 - Hanunuu

¹ Kamu pag manga bantug pag babayi sa Samarya, parihu kamu sa manga baka sa Basan pag-alagaun mayad. Pag-api-apihun niyu ag pag-unuunuhun ti manga pugri, bag-u pagsuguun waya niyu kanyu manga asawa kuntay daran-i kamu irinmun ag manginuman kamu. Nakan patingihi niyu inda

² ti pagsabihun Panginuun Diyus: “Pag-isumpa niku, sa kang kabanalan, rumas-ug gid ti sirang bihagun kamu niyu manga kalaban parihu sa pagbunit isda.

³ Ipalwas nida kamu sa kanyu banwa lakaw sa manga buslut manga alad batu nagkaradaut, ag iyamut nida kamu sa Harmun. Aku, ti Panginuun, ti magsabi inda.

⁴ “Kamu pag manga Israilita, pag-ati kamu sa pagsambahan niyu sa Bitil hanggan sa Gilgal bag-u dugangi waya gid kanyu kasalanan. Pagdara kamu kanyu manga handug kada surip ag pagdara kamu kanyu ikasampulu kada ikatlu pag sirang.

⁵ Pagsunug kamu tinapay may pamadaka bilang handug pasalamat sa kangku. Malu, ipadayaw niyu tunda hanggan kanyu manga buluntad pag handug, dahil tunda kanyu pagkaibgan buwatun. Aku, ti Panginuun Diyus, ti magsabi inda.

⁶ “Aku ti nagpadara taglun-us sa kanyu hanggan sa tanan niyu manga banwa, dapat unman diman kamu nagbalik sa kangku. Aku, ti Panginuun, ti magsabi inda.

⁷ “Inampara diman niku ti uran sa sulud tulu ka bulan bag-u rumas-ug ti tig-arani. Pagpauranan niku ti usa ka banwa dapat kay iba unman. Pagpauranan niku ti usa ka tanman dapat kay iba magkamarhan.

⁸ Dahil sa magpanlumuy, mantalayib-layib kamu sa kahanap danum irinmun. Pasalyu-salyu kamu sa manga banwa sa kahanap danum, dapat balaw kang-ud kanyu mab-ul. Lang madi katida, unman diman kamu nagbalik sa kangku. Aku, ti Panginuun, ti magsabi inda.

⁹ “Mayamu yi bisis dinaut niku kanyu manga tanum sa panab-anan mainit pag durus ag manga sarut. Rinugpuan manga apan kanyu manga puun kayu igus hanggan ulibu. Dapat unman diman kamu nagbalik sa kangku. Aku, ti Panginuun, ti magsabi inda.

¹⁰ “Pinadarahan niku kamu manga sarut parihu sa ipinadara niku kaybi sa Ihiptu. Ipinamatay niku kanyu manga kalay-awan lalaki sa girahan ag ipinabihag niku kanyu manga kabayu. Pinakurianan diman niku kamu sa buyuk manga namatay sa kanyu manga kampu. Dapat unman diman kamu nagbalik sa kangku. Aku, ti Panginuun, ti magsabi inda.

¹¹ “Rinuris niku ti iba sa kanyu parihu sa binwat niku sa Suduma ag Gumura. Bag-u ti iba sa kanyu nakaribri parihu sa kayu rinabnut sa apuy. Dapat unman diman kamu nagbalik sa kangku. Aku, ti Panginuun, ti magsabi inda.

¹² “Nakan utru waya gid niku buwatun inda pag manga parusa sa kanyu manga taga Israil. Ag dahil buwatun niku inda, pag-alistu kamu sa pag-atubang sa kangku sa kanyu Diyus.”

¹³ Ti Diyus imaw ti naglalang manga bantud hanggan durus, bag-u siya diman ti magsalyu yabi hampay bumaliw sirang. Pag-ipaalam niya sa tawu kay manga gayak, hanggan siya ti magpamahala sa buu kalibutan. Kay ngaran Panginuun, ti Diyus Makamaskihan.