Amus 3 - Hanunuu

¹ “Kamu pag manga taga Israil, kanyu manga ginurang ipinalwas Panginuun sa Ihiptu, patingihi niyu inda kay pagsabihun laban sa kanyu:

² Sa tanan nasyun sa buu kalibutan, kamu lang gid kang pinili hampay kang nasakupan. Nakan parusahan gid niku kamu dahil sa tanan niyu manga kasalanan.”

Itinigana Diyus ti Buruwatun manga Purupita

³ Mahimu aw lugud manmirinsanan ti duwa ka tawu sa maglakaw nu balaw sida magkarausa?

⁴ Mag-ngurub aw nguna ti liyun sa katalunan nu unman siya may turukbun? Man-ngurub aw siya sa kay paratag-an nu unman siya may nablay?

⁵ Masduk aw ti manuk nu unman pinaulian paun kay suduk? Mibkas aw ti suduk nu unman inda may nasduk?

⁶ Balaw aw lugud pagtakigan sa kadalaan ti manga tawu kada patunugun ti budyung sa pagpasandam may manga kalaban maggira? Nu rumas-ug ti kadamhakan sa usa ka banwa, unman aw ti Panginuun ti nagpadara tunda?

⁷ Sa tutuu, unman magbuwat ti Panginuun Diyus una hintay nu unman niya inda ipinasandam sa kay manga manugsirbi pag manga purupita.

⁸ Si unu lugud ti balaw magkadala nu mag-ngurub yi ti liyun? Si unu lugud ti unman makatultul bagaw Panginuun Diyus nu ti Panginuun Diyus yi ti magbagaw sa kanya?

Ti Parusa Diyus sa Samarya

⁹ Sabihun niyu sa manga takinan mag-ulian sa mapag-un pag bahagi Asdud hanggan Ihiptu kuntay pagtipun sida sa manga tagudtud sa palibut Samarya, bag-u bantayi nida ti magpangyari kaguluhan sa inda pag banwa hanggan ti pag-unuunu sa kay manga nasakupan.

^10-11 Inda ti pagsabihun Panginuun Diyus laban sa Samarya: “Unman sida madunung magbuwat matadlung. Ti mapag-un pag bahagi banwa nida punu manga butang tinakaw hanggan inaghas. Nakan girahun sida manga kalaban ag dautun kanda manga kampu. Bul-un manga kalaban ti manga kasiyunan sa mapag-un pag bahagi banwa.”

¹² Inda waya gid ti pagsabihun Panginuun: “Ti mairibri lang manug-alaga karanidu sa hayup paggus-abun liyun mahimu kay wadi duwa ka lulud ngatay kay usa wadi ka tuli. Katunda diman ti mangyari sa kanyu pag manga Israilita mag-ulian sa Samarya; ti maribri sa kanyu imaw lang ti manga bahagi niyu marinu pag manga parahuwayan.”

¹³ Magkun ti Panginuun Diyus, ti Diyus Makamaskihan, “Patingihi niyu kang sabihun ag sabihan inda sa manga linahi ni Hakub:

¹⁴ Sa sirang parusahan niku ti manga taga Israil dahil sa kanda manga kasalanan, dautun niku ti manga harandugan sa Bitil. Puldun niku ti sungay sa manga suuk harandugan ag magkaralagpak inda sa daga.

¹⁵ Dautun niku kanda manga balay para sa tigraramig hanggan ti manga balay para sa tig-irinit. Dautun diman niku kanda marinu pag manga balay. Aku, ti Panginuun, ti magsabi inda.”