Amus 2 - Hanunuu

Ti Parusa sa Nasyun Muab

¹ Inda ti pagsabihun Panginuun tungkul sa Muab: “Dahil sa parargu pagbuwat kasalanan ti manga taga Muab, parusahan gid niku sida. Dahil sinunug nida ti manga but-ul hari Idum tugka sa nagbaliw dapug inda.

² Nakan sunugun niku ti Muab hanggan ti mapag-un pag bahagi Kiryut. Mamatay ti manga taga Muab habang magriringgitan ag magpatunug manga budyung kanda manga kalaban maggira sa kanda.

³ Mamatay hanggan kanda hari ag ti tanan niya manga may kangaranan. Aku, ti Panginuun, ti magsabi inda.”

Ti Parusa sa Nasyun Huda

⁴ Inda ti pagsabihun Panginuun tungkul sa Huda: “Dahil sa parargu pagbuwat kasalanan ti manga taga Huda, parusahan gid niku sida. Dahil binugyahan nida kang kasuguan ag unman nida sinunud kang manga surundanun. Pinatalang sida nida pagsirbi sa manga diyus-diyusan imaw diman ti sinirbihan nida manga ginurang.

⁵ Nakan sunugun niku ti Huda hanggan ti mapag-un pag bahagi Hirusalim.”

Ti Parusa sa Nasyun Israil

⁶ Inda ti pagsabihun Panginuun tungkul sa Israil: “Dahil sa parargu pagbuwat kasalanan ti manga taga Israil, parusahan gid niku sida. Dahil ipinabili nida bilang suruguun ti manga tawu unman may kasalanan dahil lang sa kanda utang. Pagbuwatun diman nida inda sa manga pugri una usa lang ka paris lapak kay utang.

⁷ Pag-apihun nida ti manga pugri ag balaw nida pagpakan-an katadlungan. May imaw sa kanda ti magtal-ama mag-ulid sa usa lang ka babayi. Dahil siyun pagpakay-ahun nida kang banal pag ngaran.

⁸ Magkaturug sida sa manga rugar nida pagsambahan sulung ti rutay isinangla manga pugri sa kanda. Bag-u sa kang Balay mag-inuman sida intus kanda ibinili ginan sa ibinayad manga pugri may utang sa kanda.

⁹ Dapat kang binwat para sa kanda sa manga taga Israil, rinuris niku ti manga Amuriyu una parihu sida sa puun kayu sidru kay abwat ag mapag-un ga puun kayu insina. Rinuris niku sida tanan tugka sa unman may nasawad buhi.

¹⁰ Ipinalwas diman niku sa Ihiptu ti manga ginurang manga taga Israil, ag sa sulud upatpulu ka timpu giniyahan niku sida sa pangawakawaan hampay apuun nida ti daga manga Amuriyu.

¹¹ Pinili niku ti pira sa kanda manga anak hampay magpurupita ag mag-Nasariyu. Manga taga Israil, balaw aw lugud tutuu inda kang pagsabihun?

¹² Dapat hintay kanyu binwat? Pinainum niyu intus ti manga Nasariyu ag inampara niyu ti manga purupita kuntay danga sida magtultul kang bagaw.

¹³ Nakan pagpatingi kamu! Pakurianan niku kamu parihu sa karusa harus udyi makalakaw dahil sa mabuyat pag dara.

¹⁴ Nakan una ti mabisug magpalagiw sa kanyu unman makapalagiw, ti mabisug manlumuy, bag-u balaw miribri manga sundalu kanda sadili.

¹⁵ Una ti manga manugpamana sa labanan pausun. Ti manga mabisug magpalagiw pag manga sundalu unman makapalagiw, hanggan ti manga masakyan sa kabayu unman diman makaribri.

¹⁶ Sa ati pag sirang parusahan gid niku kamu, una waya ti pinakamaisug niyu pag manga sundalu malagiw uba-uba. Aku, ti Panginuun, ti magsabi inda.”