Amus 1 - Hanunuu

¹ Inda ti tultulanun ni Amus taga Tikwa, ti manug-alaga manga karanidu. Inda pag tultulanun tungkul sa Israil. Ipinadangat inda Diyus sa kanya duwa ka timpu bag-u di nangyari ti linug, katpung panahun si Usyas ti hari sa Huda ag si Hirubuam kay anak ni Huas ti hari Israil.

² Magkun si Amus, “Mag-ngurub ti Panginuun ginan sa Siun; kay busis magkurarug ginan sa Hirusalim. Dahil siyun nagkaralayung ti manga paraharaban manga manug-alaga karanidu hanggan ti manga halaman sa katayungtungan Bantud Karmilu.”

Ti Parusa sa Nasyun Sirya

³ Inda ti pagsabihun Panginuun tungkul sa Sirya: “Dahil sa parargu pagbuwat kasalanan manga taga Damasku, parusahan gid niku sida. Dahil inunu-unu nida ti manga taga Gilyad ga giniuk tabla may manga ngipun baul sa sirung.

⁴ Nakan sunugun niku ti balay hari ni Hari Hasail hanggan ti mapag-un pag manga bahagi Damasku ti ipinabwat niya anak si Hari Bin Hadad.

⁵ Wasakun niku ti sabian Damasku ag matyun niku ti takinan sa Luung Abin hanggan sa Bit Idin. Bihagun ag darahun sa Kir ti manga nasakupan Sirya. Aku, ti Panginuun, ti magsabi inda.”

Ti Parusa sa Nasyun Pilistiya

⁶ Inda ti pagsabihun Panginuun tungkul sa Pilistiya: “Dahil sa parargu pagbuwat kasalanan manga taga Gasa, parusahan gid niku sida. Dahil binihag nida ti tanan magpangulian sa manga banwa bag-u ipinabili bilang manga suruguun sa Idum.

⁷ Nakan sunugun niku ti manga alad batu Gasa hanggan ti mapag-un pag manga bahagi banwa.

⁸ Rurisun niku ti manga takinan sa Asdud hanggan sa Askalun, hanggan ti manga taga Ikrun. Ti manga makapalagiw pag Pilistiyu sa parusa magkaramatay diman. Aku, ti Panginuun Diyus, ti magsabi inda.”

Ti Pasura sa Nasyun Tiru

⁹ Inda ti pagsabihun Panginuun tungkul sa Tiru: “Dahil sa parargu pagbuwat kasalanan manga taga Tiru, parusahan gid niku sida. Dahil ipinabili nida ti tanan magpangulian sa manga banwa bilang manga suruguun sa Idum. Balaw nida tinupad kanda kasunduan bilang magtar-arian sa inda pag manga nasakupan.

¹⁰ Nakan sunugun niku ti manga alad batu Tiru hanggan ti mapag-un pag manga bahagi sa inda pag banwa.”

Ti Parusa sa Nasyun Idum

¹¹ Inda ti pagsabihun Panginuun tungkul sa Idum: “Dahil sa parargu pagbuwat kasalanan manga taga Idum, parusahan gid niku sida. Dahil linagas nida kanda katawuhan manga Israilita ag minatay unman may awa. Balaw gid madura kanda pangagalit sa manga Israilita.

¹² Nakan sunugun niku ti Timan hanggan ti mapag-un pag manga bahagi Busra.”

Ti Parusa sa Nasyun Amun

¹³ Inda ti pagsabihun Panginuun tungkul sa Amun: “Dahil sa parargu pagbuwat kasalanan manga taga Amun, parusahan gid niku sida. Dahil rinirian nida ti tiyan manga babayi magburuduy sa Gilyad, agud lang dumaka kanda sakup pag daga.

¹⁴ Nakan sunugun niku ti manga alad batu sa Raba hanggan ti mapag-un pag manga bahagi banwa habang magriringgitan ti manga kalaban maggira sa kanda, maghagunung parihu sa bagyu.

¹⁵ Ag bihagun ti hari Amun hanggan kay manga may kangaranan. Aku, ti Panginuun, ti magsabi inda.”