2 Tisalunika 3 - Hanunuu

Daranginan Niyu Kami

¹ Inda waya duy manga patar-ari, kang mana sabihun sa kanyu. Daranginan niyu kami hampay ti bagaw Panginuun mikalat madali sa tanan rugar, hampay pahalgaan inda tanan manga tawu parihu diman sa kanyu binwat.

² Daranginan diman niyu kami hampay kami makaribri sa luku-luku pag manga tawu ag sa manga magbuwat kadautan. Dahil ngani unman tanan tawu may pagsarig sa Mayad pag Barita.

³ Masarigan ti Panginuun. Kay pakan-an gid kamu kay kabisugan, kay di alagaan kamu sa diyablu.

⁴ Pihu dayu pumabaya ti Panginuun, nakan lubus kami magpaniwala kanyu ugali angay sa kanmi itinudlu sa kanyu ag rargu di niyu ugaliun.

⁵ Kamu kang di pag-idarangin hampay giyahan di Panginuun atabug sa mas lalu waya daka pagmahal sa Diyus hanggan sa karig-unan sa kan Kiristu.

Danga Magbugya Magtarabahu

⁶ Manga patar-ari, pag-ibilin nimi sa kanyu dahil sa kanta pakiusa sa Panginuun Hisu-Kiristu, pag-iwas kamu sa una hintay pag patar-ari nu mamalibutan lang unman waydi may buwat ag nu dayu waydi sumunud sa kanmi manga bilin sa kanyu.

⁷ Alam diman niyu kailangan niyu huwadun kanmi binwat. Unman kami nagpabaya magbuwat kanmi di waya asan.

⁸ Unman kami nagtanggap una sa kantapu gin pag bagay, nu unman binayadan nimi. Una yabi una sirang kami nagbudlay nagtarabahu di hampay unman magpasagpun una sa kantapu sa kanyu.

⁹ Nu sa ungud mana kami may karampatan mag-asa sa kanyu awat dapat ay kami nagtarabahu di hampay kamu pakan-an mustara kailangan niyu sundan.

¹⁰ Pagka kami asan di waya sa kanyu, inda kanmi ibinilin sa kanyu magkun, “Una hintay pag tawu nu dayu manarabahu, danga waydi pagpakan-i niyu.”

¹¹ Pagsabihun nimi inda dahil nabaritaan nimi ti iba sa kanyu mag-ugali sa bugyahin, dayu magtrabahu, nu unman maralabut sa magkabuhi iba.

¹² Dahil sa kanmi pakiusa sa Panginuun Hisu-Kiristu mahigpit gid kanmi pag-ibilin sa tunda pag manga tawu, kailangan gid sida pagtarabahu para sa kanda sadili pangabuhi ag unman maglabut sa magkabuhi iba.

¹³ Manga patar-ari, danga kamu umampu sa magbuwat mayad.

¹⁴ Tandai gid niyu, iwasi diman una si unu ti dayu sumunud sa mayad pag manga bilin nimi sa inda pag surat, hampay siya mangay-a.

¹⁵ Dapat danga waydi niyu ipaparihu siya bilang ga kalaban. Bagkus di ngap paanyua niyu siya bilang ga kanyu patar-ari.

Pangatapusan pag Bati

¹⁶ Panginuun ti bulbugan kahusayan. Pagsa kanyu ti kahusayan sa tanan pag udas. Pagsa kanyu gid tanan ti Panginuun.

¹⁷ Aku gid ngap si Pablu ti nagsurat inda pag pangamusta: Kamusta kamu tanan. Inda yi kang pirma sa tanan niku manga surat. Kainda di kangku pag panurat.

¹⁸ Pagsa kanyu tanan ti papalad nita Panginuun Hisu-Kiristu.