2 Tisalunika 1 - Hanunuu

¹ Inda ti may surat kami ni Pablu, ni Silas, ni Timutiyu, tabug sa iglisya manga taga Tisalunika, sa manga nasakup sa kanta Diyus Ama hanggan sa Panginuun Hisu-Kiristu.

² Pagsa kanyu ti papalad hanggan ti kahusayan ginan sa kanta Diyus Ama hanggan ginan sa Panginuun Hisu-Kiristu.

Ti Kaudasan Sintinsiya

³ Kailangan kami pirmi magpasalamat gid sa Diyus tungkul sa kanyu, manga patar-ari. Nakan tama gid nu pirmi kami magpasalamat, dahil mag-amat magrig-un kanyu pagsarig sa kan Kiristu. Hanggan paman kanyu pagmahal sa usa kag sa usa mag-amat waydi magdaka.

⁴ Pagdayawun nimi kamu, pag-itultul sa tanan manga sakup iglisya Diyus, dahil sa pagsarig niyu ag dahil matiniisun kamu sa katpung pag-unuunuhun kamu una paman sa karaw-an kakurian.

⁵ Inda yi ngani ti puruyba tungkul sa kay katadlungan Diyus sa kay pagkilala sa tawu. Kamu kay pagkilalan-un niya kuntay kang-ud hampay tanggapun niya sa kay kaharian, madi taynguna kamu may pag-agwantahun dapu tungkul sa kay kaharian Diyus.

⁶ Matadlung ti Diyus. Gantihan niya kakurian ti manga magpakuri sa kanyu.

⁷ Kamu ti manga nag-agwanta pakan-an niya kahusayan hanggan kami sa kay pagbalik Panginuun Hisus ginan sa langit kaibahan niya kay manga makapangyarihan pag manga anghil.

⁸ Rumas-ug siya sa karaw-an maglalabdaban pag apuy. Bag-u parusahan niya ti tanan tawu dayu magpaniwala sa Diyus ag ti manga dayu magsunud sa Mayad pag Barita tungkul sa kanta Panginuun Hisus.

⁹ Inda aban ti sintinsiya sa kanda, atag sida sa unman may katapusan pag kadamhakan ag miblag sida sa Panginuun hanggan sa kadayawan niya kamaskihan.

¹⁰ Mangyari tunda sa kaudasan niya pagras-ug aban hampay dayawun siya tanan manga napasakup sa kanya ag hampay sambahun siya sa karaw-an tanan manga magsarig sa kanya. Mibilang diman kamu ati, dahil tinanggap niyu ti Mayad pag Barita kanmi itinudlu sa kanyu.

¹¹ Pirmi di gid nimi pag-alalahanun kamu nu kami magdarangin sa Diyus hampay kanyu ugali buhi sa ikabaya Diyus. Ag hampay angay sa kay kamaskihan papaladan niya kamu sa tanan niyu pagturunuhun mayad hanggan sa tanan niyu buwat pag-udyukan niyu pagsarig.

¹² Nu katunda mapakan-an niyu kadayawan ti ngaran Panginuun Hisus, kamu diman hanggan pakan-an waydi kay kadayawan angay sa kay pangaawa Diyus hanggan nita Panginuun Hisu-Kiristu.