2 Timutiyu 4 - Hanunuu

¹ Aku may pagsabihun gid sa kanmu sa atubangan Diyus ag ni Kiristu Hisus, imaw ti manbalik ag manhari, ag ti pumihu aban sa manga tawu buhi di waya hanggan sa manga namatay yi, nu daut nu mayad.

² Ti kang patigayun sa kanmu duy itudlu nimu ti Bagaw Diyus, una sa hintay pag udas. Danga magpasnu sa manga tawu nu salan, tamyawa. Parig-una nimu ti nalub-anan manga tawu. Pagmaalumanay kawu pirmi, danga gid pag-apasi sa tudlu.

³ Dahil rumas-ug aban ti udas balaw yi patingihan manga tawu ti katutuuhanan pag tudlu. Bagkus ngap sundun nida kanda sadili kagustuhan. Manhanap sida manga manugtudlu balaw may iba itudlu nu unman ti kanda lang magustuhan manga manugpatingi.

⁴ Kanda hilig aban sa manga suyut lang, dayi patingihan nida ti katutuuhanan.

⁵ Nakan ngani pagmapinigilun kawu sa tanan udas. Pag-agwantaha nimu ti kakurian magras-ug sa kanmu. Tupada nimu ti katungkulan manugpadakit Mayad pag Barita. Asikasuha gid nimu inda pag buruwatun.

⁶ Iintirga yi niku inda kang buhi sa Diyus. Rinmas-ug yi kang kaudasan kamatayun.

⁷ Lubus aku naglaban ga sa mag-urunahan. Nakaaput yi aku sa turunu niku palalagiwan. Iningatan niku ti katutuuhanan tungkul sa kang pagsarig.

⁸ Matanggap yi niku aban kang pirimyu sa kang nanalu. Panginuun ti matadlung pag talaghusay, imaw ti pumakaun kang pirimyu ati katpung pag kaudasan sa kay pagbalik niya aban. Balaw lang waydi aku ti makatanggap pirimyu. Makatanggap waydi kanda pirimyu ti tanan manga magmahal sa Panginuun, manga magpatigagad sa kay pagbalik niya aban.

Manga Barita

⁹ Pagluwang yi gid duy kawu sitay tag dag yi dugay.

¹⁰ Dahil tinayakan yi aku ni Dimas. Ipinalabi di niya ti bagay sa kalibutan. Ati yi siya sa Tisalunika. Si Kirisinti nag-ati sa Galasya. Si Titu waydi ati sa Dalmasya.

¹¹ Si Lukas wadi kang kaibahan. Hanapa nimu si Markus, tabana nimu sitay tag dahil daka kay miawat sa kang manga buruwatun.

¹² Sinugu niku si Tikiku tag sa Ipisu.

¹³ Nu kawu sumitay daran-a nimu kang pangulimpay, tinayakan niku ati sa kan Karpu sa Turuwas. Daran-a diman nimu kang manga ribru, lalu tunda pag manga kasuratan.

¹⁴ Subra gid pag kadautan kay binwat sa kangku ni Alihanduru imaw ti manugpanday galang. Panginuun ti gumanti sa kanya angay sa kay binwat.

¹⁵ Pag-aman kawu sa kanya dahil magpakaampara siya sa Mayad pag Barita kanta pag-itudlu.

¹⁶ Udyi may nangiba sa kangku sa kang kabag-u inmatubang sa husgadu. Tinayakan nida aku usa wadi. Patawadun sida Diyus.

¹⁷ Dapat balaw aku pinabay-anan Panginuun. Pinakan-an aku kabisugan hampay lubus mipaliwanag niku ti Mayad pag Barita sa tanan manga balaw Hudiyu. Naribri di aku madi kanda mana ibahug sa manga liyun.

¹⁸ Ti Panginuun diman ti makaparibri aban sa kangku sa tanan pag kadautan. Siya diman ti dumara sa kangku tag sa kay kaharian sa langit. Dayawun siya hanggan waya aban. Amin.

Pangatapusan pag Pangamusta

¹⁹ Ipakamusta nimu aku sa kanda mag-asawa nida ni Pirisila ni Akila, hanggan sa kay magtal-anakan ni Unisipuru.

²⁰ Si Irastu natayak di sa Kurintu, si Turupimu tinayakan niku sa Militu, dahil may sakit siya.

²¹ Pagluwang yi duy sitay tag sa udwaya mana amihanun. Pagkamustahun diman kawu nida ni Yubulu, ni Pudinti, ni Linu, ni Kalaudya, hanggan ti tanan patar-ari magpakamusta diman sa kanmu.

²² Pagsa kanyu ti Panginuun hanggan ti papalad niya.