2 Timutiyu 3 - Hanunuu

Ti Mangyari Aban sa Uryan pag Kaudasan

¹ Tandai nimu inda: sa uryan pag kaudasan mangyari ti manga kakurian.

² Ti manga tawu aban makasadili, maramuun sa kuwarta, palabi-labihun, yabang-yabangin, magpanmuransa, supladu sa gurangun, unman may pasunaid sa kay sadili, ag unman magpasakup sa Diyus.

³ Usa sa siyun manga arisgadu sida, udyi may pangaawa, magpamuya, maurugun, maparanghasin, magkadaut sida sa una hintay pag kaayadan.

⁴ Balaw lang tunda, paradaya waya sida, daluk-daluk, palabi-labihun, mahilig sa daut pag kasayahan, unman ngap pagpahalgaan nida ti Diyus.

⁵ Magpabalhinguun sida kuntay maka-diyus, dapat nu sa ungud pag-itanggi nida ti kamaskihan Diyus. Pag-aman kawu sa katunda pag manga tawu.

⁶ Ti iba sa kanda, magsaka sa manga tawu balay. Paggaryahun nida ti manga babayi balaw masyadu kay buut, nalagum yi sa kasalanan, manga panawuhun sadili nida daut pag kagustuhan.

⁷ Tunda pag manga babayi gustu gid nida dumunung, dapat una waya hanggan aban balaw sida umintindi sa katutuuhanan.

⁸ Tunda pag manga lalaki magtudlu maglaban sa katutuuhanan parihu diman sa kanda ni Hanis ni Hambiris naglaban sa kan Muysis. Udyi sida may pag-isipun kaayadan, nakan nakilala kanda pagsarig kuntay unman may kabuluhan.

⁹ Dapat balaw rumargu kanda buwat kadautan, dahil miburayhaw yi waydi sa tanan tawu kanda buwat kadautan, parihu sa nangyari sa kanda ni Hanis ni Hambiris.

Manga Pangatapusan pag Bilin

¹⁰ Dapat balaw katida kawu. Kanmu ngap sinunud kang manga bilin, ugali hanggan turunu. Alam yi waydi nimu kang pagsarig, kang matugway, kang pagmahal hanggan kang matiniisun.

¹¹ Alam diman nimu ti manga mag-unuunu sa kangku hanggan kang inagwanta sa Antiyukya, sa Ikunya, ag sa Listara. Masyadu gid inunu-unu aku ati katpung, dapat sa tanan pag manga kakurian tunda ipinaribri di aku Panginuun.

¹² Ti tanan manga may gustu mangugali sakup sa Diyus ag magpakiusa sa kan Kiristu Hisus, pihu makalakaw pag-unuunu.

¹³ Ti daut pag manga tawu lalu yi gid magpakadaut. Ti tawu maradaya lalu yi ngap mandaya, ag sida hanggan madaya diman.

¹⁴ Dapat danga nimu pagbul-iwi ti kanmu manga nataw-an sa kanmu mag-adal hanggan ti kanmu sinarigan, dahil nakilala yi waydi nimu ti manga tawu nagtudlu sa kanmu.

¹⁵ Ginan sa diit di waya kawu, naanad yi kawu sa Banal Kasuratan, imaw ti makapakaun kadunungan sa kanmu sa ikaribri nimu nu kawu magsarig sa kan Kiristu Hisus.

¹⁶ Ti tanan Banal Kasuratan ginan sa udyuk Diyus pag nisurat nakan magamit diman sa pagtudlu katutuuhanan, sa pagpakilala sa salan pag manga tudlu, sa pagpatadlung sa manga maliku pag buwat hanggan sa pagbutung tabug sa mayad pag ugali,

¹⁷ hampay ti tawu magsirbi sa Diyus madunung ag alistu yi sa tanan mayad pag buruwatun.