2 Timutiyu 2 - Hanunuu

Ti Mayad pag Sundalu ni Kiristu Hisus

¹ Timutiyu, kang pinagkaanak, pagpakarig-un kawu sa kaayadan kay pag-ipakaun ni Kiristu Hisus dahil sa kanmu pakiusa sa kanya.

² Ti manga nadnugan nimu sa kangku sa atubangan mayamu manga manugpatingi kailangan kanmu waydi itudlu iintirga sa manga tawu magkaasahan magtudlu waydi sa iba.

³ Pagdamay kawu sa kakurian parihu sa usa ka mayad pag sundalu ni Kiristu Hisus.

⁴ Ti usa ka sundalu danga magpakialam sa bukun buruwatun sundalu. Lalu ngap kailangan sigasidan niya hampay makabaya kay pinunu.

⁵ Balaw manalu ti mag-urunahan sa palalagiwan nu siya unman sumunud sa patigayun.

⁶ Ti manugtanman nu nagbudlay sa tarabahu, imaw ti may karampatan makatanggap sa kabag-u pag bahagi niya ani.

⁷ Isip-isipa gid nimu mayad kang pagsabihun sa kanmu. Ipauninaw Diyus sa kanmu kay ibug sabihun inda tanan-tanan.

⁸ Alalahana nimu si Hisu-Kiristu ti nabuhi uman, imaw ti linahi ni Dabid angay sa Mayad pag Barita kang pag-itudlu.

⁹ Dahil sa kang magtudlu Mayad pag Barita nakan aku mag-agwanta sa kakurian hanggan sa pirisuhan parihu sa may kasalanan. Dapat balaw magkagapus ti Bagaw Diyus.

¹⁰ Nakan pag-agwantahun niku ti tanan bagay alang-alang sa manga pinili Diyus, hampay makatanggap diman sida karibrihan tunda ti mayad gid pag buhi unman may katapusan kay pakaun ni Kiristu Hisus.

¹¹ Tutuu gid ti kabagawan magkun, “Nu kita namatay kaibahan ni Kiristu, balaw may palya pihu mabuhi diman kita kaibahan niya.

¹² Nu kita mainagwantahun sa kakurian humari diman kita kaibahan ni Kiristu. Nu itanggi nita siya sa atubangan manga tawu, itanggi waydi niya kita.

¹³ Nu unman matinupadun kita, si Kiristu matinupadun di. Dahil unman mitanggi niya kay sadili.”

Ti Masarigan pag Suruguun ni Kiristu

¹⁴ Paalalahanan nimu inda pag manga bagay sa kanmu manga tuludluan, bilini nimu sida balaw gustu Diyus mag-aratwan sida tungkul sa manga sanglitan. Unman may pulus tunda pag magpakatalaluhan, bagkus ngap tunda sa ikadamhak manga nakadnug.

¹⁵ Pagmasigasid hampay makaatubang kawu sa Diyus, kanmu ugali pagmaangay sa kanya, manugbuwat unman may ikakay-a, matinupadun pag manugtudlu sa tutuu pag barita Diyus.

¹⁶ Iwasi nimu ti unman may kabuluhan ag mahalay pag baragawun, dahil ti manga tawu magbuwat katida lalu ngap umarayu, umamat waya kanda unman maggalang sa Diyus.

¹⁷ Kanda manga tudlu parihu sa baghak pag sakit magpanlatag sa bilug. Kabilang diman siti pag kalasi tawu sida ni Himiniyu ni Pilitu.

¹⁸ Tinmalang sida ginan sa katutuuhanan. Pag-itudlu nida magkun, natupad yi kanta pagkabuhi uman. Nakan kanda pagdautun ti pagsarig manga iba.

¹⁹ Dapat marig-un kay ipinakana Diyus pag manga tudlu magkun, “Magkakilala di Panginuun nu si unu ti sa kanya.” Ag “Ti kada tawu magtawag sa Panginuun, pagpakarayu sa magbuwat kadautan.”

²⁰ Sa ulian mayaman balaw tanan kagamitan lunsay yi gintu hanggan pilak, may imaw diman kayu ti binwat taya hanggan daga ga anglit. Tunda pag garamitun gintu hanggan pilak paggamitun lang nu may handaan. Dapat ti kagamitan kayu ti binwat taya hanggan tunda pag daga binwat ga anglit imaw ti garamitun sa sirang-sirang.

²¹ Una si unu ti magpakarayu sa magbuwat kadautan pag-ipaparihu sa manga garamitun pagpahalagaan niya apu, manga sakup sa Diyus, ihinanda para gamitun niya Panginuun, pirmi alistu sa una hintay pag buruwatun mayad.

²² Nakan iwasi yi nimu ti hilig sa daut buwat manga kalay-awan. Hingabtun nimu mangabuhi matadlung, matinupadun hanggan mapinasunaidun. Pag-ugali kawu sa mahusay kaibahan manga tawu malumpiyu kay tagipusuun sa kanda magdangup sa Panginuun.

²³ Amani nimu ti ud may kabuluhan pag dibati. Alam yi waydi nimu tunda ngani ti pagpun-an arawayan.

²⁴ Unman kailangan makipag-away ti panawuhun Panginuun. Bagkus ngap kailangan siya madunung makibagay sa tanan tawu, mayad magtudlu, ag matiniisun.

²⁵ Kailangan pagmaalumanay siya nu magtamyaw sa manga maglaban sa kanya. Barang nu katida pag paraan, pakan-an sida Diyus rugar hampay makasisi ag makaampu sa kanda kasalanan, agud maalaman nida ti katutuuhanan.

²⁶ Nu katunda marayawan kanda naisipan hampay makakalpas sa dit-ag diyablu imaw ti nagbutung sa kanda.