2 Timutiyu 1 - Hanunuu

¹ Inda ti may surat si Pablu. Aku ti kinaibgan Diyus hampay apustul ni Kiristu Hisus para manudlu aku tungkul sa buhi kay itinaratu Diyus sa kanta dahil sa kanta pakiusa sa kan Kiristu.

² Inda pag surat tabug sa kanmu, Timutiyu. Kawu kang pagmahalun dahil kawu kang pinagkaanak sa pagsarig sa kan Kiristu. Pagsa kanmu ti papalad, ti pangaawa hanggan ti kahusayan ginan sa kanta Diyus Ama hanggan ginan sa kanta Panginuun Kiristu Hisus.

Pasalamat ag Paalaala

³ Magpasalamat aku sa Diyus imaw kang pagsirbihan lubus parihu sa binwat niku manga ginurang. Magpasalamat ungud aku sa Diyus sa kada magkaisipan niku kawu sa kang magdarangin sirang yabi.

⁴ Nu magkaala-ala niku kanmu maglumi, maghanap aku sa kanmu. Gustu niku magsampak maan kita agud makabaya gid aku.

⁵ Dayu gid niku malimtan kanmu buu pagsarig, parihu sa kay pagsarig nimu idu ni Luida hanggan sa kay pagsarig nimu ina ni Yunisi. Alam niku una kawu katunda diman kanmu pagsarig.

⁶ Nakan ngani pag-ipaalaala niku sa kanmu, danga paghamnua nimu ti pakaun Ispiritu kanmu tinanggap ginan sa Diyus, sa katpung kawu kinup-an niku kamang.

⁷ Dahil ti Ispiritu Diyus balaw magpakaun kadalaan sa kanta. Bagkus ngap kay ipinakaun Ispiritu sa kanta ti kapangyarihan, ti pagmahal ag ti mapinasunaidun.

⁸ Nakan ngani danga magkay-a magtultul tungkul sa Panginuun. Danga waydi ikakay-a nimu kang mapirisuhan dahil sa kanya. Bagkus ngap pagdamay sa kakurian dahil sa magtudlu Mayad pag Barita, pagsarig sa kamaskihan Diyus.

⁹ Diyus ti nagribri ag nagpili sa kanta hampay kita kanya yi. Balaw dahil sa kanta sadili buwat nu unman angay ngap sa kay turunu ag pangaawa. Pagka udwaya linalang ti kalibutan daan di itinigana niya kay mayad nabubut-un sa kanta sa panab-anan ni Kiristu Hisus.

¹⁰ Dapat niburayhaw lang inda pagka rinmas-ug si Kiristu Hisus kanta Manugribri. Tinalu niya ti kamatayan ag ipinakilala ti buhi unman may katapusan sa panab-anan Mayad pag Barita.

¹¹ Pinili niya aku apustul hanggan manugtudlu hampay itudlu niku inda pag Mayad pag Barita.

¹² Tida ngani kay dahilan nakan aku mag-agwanta inda pag kakurian. Dapat ay una katida unman aku mag-alinlangan. Dahil lubus niku magkakilala kang Panginuun kang pagsarigan. Pihu gid kaya niya maingatan ti kang inintirga sa kanya hanggan sa ud rumas-ug ti kaudasan Panginuun.

¹³ Pag-isipa nimu pirmi kang manga itinudlu sa kanmu, huwada gid nimu. Kabay pasay katutuuhanan tunda. Pagpakarig-un kawu sa pagsarig hanggan sa pagmahal kanta tinanggap dahil sa kanta pakiusa sa kan Kiristu Hisus.

¹⁴ Kanmu mahalaga pag katungkulan kailangan alagaan nimu sa awat Ispiritu Banal, imaw ti nangulian sa kanta.

¹⁵ Magkaalaman diman nimu sinukuan aku tanan manga patar-ari sa Asya. Una sida duwa ni Pigilu ni Hirmuginis udyi magpausa sa kangku.

¹⁶ Pag-idarangin niku ti magtal-anakan ni Unisipuru hampay kaawaan sida Diyus. Balaw di kas-a sinaya niya aku. Balaw aku kinay-ahan niya madi aku pirisu.

¹⁷ Bagkus ngap pagka rinmas-ug siya sa Ruma, pinakahanap gid niya aku tugka sa nasampakan niya aku.

¹⁸ Pagsa kanya kay pangaawa Panginuun nu kaudasan yi aban pagbalik Panginuun. Alam diman gid nimu nu kabitay siya pag nagsirbi sa iglisya ati sa Ipisu.