2 Samwil 9 - Hanunuu

Si Dabid ag si Mipibusit

¹ Pagka sa usa ka sirang, nagpaingana si Dabid, “May nasawad aw waya sa magtal-anakan ni Saul ti mahimu niku pakakitan kaayadan para sa kan Hunatan?”

² Ipinatawag ni Dabid ti usa ka tawu kay ngaran si Siyba, usa ka suruguun ginan sa magtal-anakan ni Saul. Pagka rinmas-ug siya, pinaingana siya ni Dabid, “Kawu aw si Siyba?” Sinmagut siya, “Hu, aku ngani duy.”

³ Nagpaingana maan si Dabid, “May nasawad aw waya sa magtal-anakan ni Saul ti mahimu niku pakakitan kaayadan Diyus?” Sinmagut siya, “Hu, may imaw waya, kan Hunatan anak lalaki lumpu.”

^4-5 Nagpaingana si Dabid, “Naan yi siya?” Nagsagut si Siyba, “Ati duy sa Lu Dibar, sa balay ni Makir kay anak ni Amyil.” Nakan ipinab-ul siya ni Dabid ginan sa balay ni Makir.

⁶ Kay ngaran anak ni Hunatan si Mipibusit ag laki siya ni Saul. Pagka rinmas-ug siya ati sa kan Dabid, nagyuk-ub siya bilang paggalang sa kanya. Magkun si Dabid sa kanya, “Kawu maaw duy si Mipibusit.” Sinmagut siya, “Aku ngani duy.”

⁷ Magkun si Dabid sa kanya, “Danga kawu magkadala. Ipinab-ul niku kawu dahil gustu niku kawu pakakitan kaayadan para sa kanmu ama sa kan Hunatan. Iuli niku ti tanan daga nimu laki, ni Saul, ag balaw lang tunda, sitay yi hanggan kawu pagkaun kaibahan niku.”

⁸ Linmuhud si Mipibusit magkun, “Si unu duy aku hampay buwatun nimu tunda sa kangku? Parihu lang aku sa usa ka tigbak pag idu.”

⁹ Ipinatawag hari si Siyba, ti suruguun kaybi ni Saul, ag sinabi, “Ipinakaun yi niku sa laki nimu amu ni Saul ti tanan kasiyunan niya magtal-anakan.

¹⁰ Kawu, hanggan kanmu manga anak, hanggan kanmu manga suruguun ti mantanman sa daga para sa kanya, ag kailangan nimu darahun sa kanya ti manga ani hampay may makaun ti magtal-anakan nimu amu. Dapat si Mipibusit waydi pirmi mangaun kaibahan niku.” (May 15 ka anak lalaki ag 20 ka suruguun si Siyba.)

¹¹ Sinmagut si Siyba sa hari, “Buwatun duy niku, Mahal Hari, ti tanan nimu pag-isugu sa kangku, sa kanmu suruguun.” Siyun ginan, si Mipibusit pirmi yi kaibahan ni Dabid sa magkaun ga usa sa manga anak niya.

¹² May diit waya anak si Mipibusit kay ngaran si Mika. Ti tanan kaibahan sa magtal-anakan ni Siyba kay yi suruguun ni Mipibusit.

¹³ Si Mipibusit lumpu, ati siya pag nangulian sa Hirusalim, magkaun siya pirmi kaibahan ni Hari Dabid.