2 Samwil 8 - Hanunuu

Ti manga Pagpanalu ni Hari Dabid

¹ Sa kadugayun, natalu ag nasakup ni Dabid ti manga Pilistiyu. Inagaw niya ginan sa kanda ti Mitig Ama.

² Natalu diman ni Dabid ti manga Muabita. Pinahuway niya sida sa daga mahanayan ag sinukat sa panab-anan lubid. Ti manga niminsan sa sukat duwa ka lubid pinanmatay, ti manga niminsan sa ikatlu pag lubid pinabay-anan mabuhi. Ti manga pinabay-anan mabuhi pag manga Muabita napasakup sa kan Dabid ag namayad buhis.

³ Nanlaban diman si Dabid sa kan Hari Hadadisir taga Suba, kay anak ni Rihub, habang atabug si Hadadisir sa daga arani sa Sapa Iyupratis hampay bawiun tunda.

⁴ Naagaw nida ni Dabid ti 1,000 niya ka kalisa, 7,000 ka manugkalisa, hanggan 20,000 sundalu. Pinamiang nida ni Dabid ti manga kabayu magguyud manga kalisa, purya lang sa 100 ka kabayu kanda sinawadan hampay kanda gamitun.

⁵ Pagka rinmas-ug ti manga Aramiyu ginan sa Damasku hampay awatan si Hadadisir, minatay nida ni Dabid ti 22,000 sa kanda.

⁶ Nagpatindug rargu si Dabid manga kampu sa Damasku, ti rugar manga Aramiyu. Ag sakup yi niya sida, nagbayad sida buhis sa kanya. Pinanalu Panginuun si Dabid sa kada labanan niya pag-atagan.

⁷ Bin-ul ni Dabid ti manga gintu pag panangga magkaapu manga takinan ni Hadadisir, bag-u dinara tunda sa Hirusalim.

⁸ Bin-ul diman niya ti mayamu gid pag galang sa Bita hanggan sa Birutay, ti manga banwa sakup ni Hadadisir.

⁹ Nabaritaan ni Hari Tuu, taga Hamat, kuntay tinalu ni Dabid ti buu sundalu ni Hadadisir.

¹⁰ Nakan ipinaatag niya kay anak si Huram sa kan Hari Dabid hampay mankamusta ag manbati sa kay pagpanalu sa kan Hadadisir. (Kaybi di waya magkalaban yi sida ni Tuu ni Hadadisir.) Nagdara si Huram manga pamakaun buwat sa pilak, gintu ag galang.

¹¹ Isinagda tunda ni Hari Dabid sa Panginuun, parihu sa kay binwat sa manga pilak ag gintu kay nab-ul sa tinalu niya pag manga nasyun —

¹² ti Idum, ti Muab, ti Amun, ti Pilistiya hanggan Amalik. Isinagda diman niya ti manga naaghas nida ginan sa kan Hari Hadadisir taga Suba, kay anak ni Rihub.

¹³ Nag-amat di nibantug si Dabid pagka minatay niya ti 18,000 ka Idumita sa karatagan pag-ingarnan Asin.

¹⁴ Nagpauli siya manga kampu sa buu Idum, ag nasakup niya ti manga Idumita. Pinanalu Panginuun si Dabid sa kada labanan niya pag-atagan.

Ti manga may Kangaranan ni Dabid

¹⁵ Naghari si Dabid sa buu Israil. Binwat niya ti matadlung ag hustu para sa tanan niya manga nasakupan.

¹⁶ Si Huab kay anak ni Siruya ti magdumara sa kay manga sundalu. Si Husapat waydi pag anak ni Ahilud ti magpamahala sa manga kasuratan kaharian.

¹⁷ Si Saduk kay anak ni Ahitub hanggan si Ahimilik kay anak ni Abyatar ti manga takinan manughandug. Si Siruya ti manugsurat.

¹⁸ Si Binaya kay anak ni Hihuyada ti magdumara sa manga Kiritiyu ag Pilitiyu pag manga guwardiya ni Dabid. Ag kay manga manugpatigayun kay manga anak lalaki.