2 Samwil 7 - Hanunuu

Ti Pangaku Panginuun sa kan Dabid

¹ Pagka nangulian si Hari Dabid sa kay balay hari, pinakan-an kahusayan Panginuun kay kaharian; unman siya paggirahun niya manga kalaban.

² Pagka sa usa ka sirang, magkun si Dabid sa kan Purupita Natan, “Bantayi nimu, mag-uli ngani aku sa marinu pag balay hari buwat sa kayu sidru, dapat ti Kaban Diyus ati sa turda lang.”

³ Sinmagut si Natan sa hari, “Buwata kanmu gustu buwatun dahil ti Panginuun sa kanmu di.”

⁴ Dapat sa tunda pag yabi, magkun ti Panginuun sa kan Natan,

⁵ “Pag-ati kawu, sabiha nimu sa kang suruguun sa kan Dabid kaindaay kang pagsabihun, ‘Kawu aw ti mamatindug kang ulianan?

⁶ Taynguna tugka unman waya aku nakaulian sa pirmaminti pag balay ginan kaybi sa kang nagpalwas sa manga Israilita sa Ihiptu. Nagpasalyu-salyu aku rugar; turda lang kang inulianan.

⁷ Sa kang pagpasalyu-salyu kaibahan ti manga nasakupan niku Israilita, unman aku nagriklamu sa manga takinan Israil, ti manug-alaga sa kang nasakupan. Unman ngani aku nagpaingana nu hayga unman nida aku pagpabwatan balay buwat sa sidru.’

⁸ “Sabiha waya nimu sa kan Dabid aku, ti Panginuun Makamaskihan, magkumun, ‘Manug-alaga kawu kaybi manga karanidu, dapat pinili kawu niku hampay manpanguna sa manga nasakupan niku Israilita.

⁹ Pag-ibahan niku kawu una naan tabug, ag rinuris niku ti tanan nimu manga kalaban. Taynguna, buwatun niku kawu bantug parihu sa iba pag manga bantug tawu sa kalibutan.

¹⁰ Pinakan-an niku sadili daga ti manga nasakupan niku Israilita, hampay may sadili sida ulian hanggan unman may magbalag sa kanda. Balaw yi sida apihun manga daut pag tawu ga kaybi,

¹¹ ginan sa kang nagpauli manga takinan sa kang manga nasakupan Israilita. May kahusayan kanmu maghari ag unman yi may manga kalaban man-gira sa kanmu. Aku, ti Panginuun, magkumun sa kanmu pirmi humari ti usa sa kanmu manga linahi.

¹² Nu mamatay kawu ag ilbung kaibahan manga ginurang nimu, iilis niku sa kanmu ti usa sa kanmu manga anak, ag parig-unun niku kay maghari.

¹³ Siya ti pumatindug Balay Diyus para sa kang kadayawan, ag pihuun niku kay linahi ti humari hanggan aban.

¹⁴ Kilalan-un niya aku ama ag kilalan-un niku siya anak. Nu magkasala siya, tamyawun niku siya parihu sa pagtamyaw ama sa kay anak.

¹⁵ Dapat balaw mabag-u kang pagmahal sa kanya parihu sa kang binwat sa kan Saul kanmu inilisan bilang hari.

¹⁶ Pumarargu kanmu kaharian hanggan aban; kanmu linahi pumarargu humari sa unman may katapusan.’ ”

¹⁷ Itinultul ngani ni Natan sa kan Dabid ti tanan sinabi Diyus sa kanya.

Ti Darangin ni Dabid

¹⁸ Pagkatapus, nagsaka si Hari Dabid sa turda nu naan pag maulian ti Kaban Kasunduan. Tinmukaw siya ati sa atubangan Panginuun ag nandarangin, “Panginuun Diyus, si unu duy aku hanggan kang magtal-anakan kanmu pinapaladan parihu sa inda?

¹⁹ Ag taynguna, Panginuun Diyus, bukud waya siyun, may taratu waya kawu tungkul sa patabgan niku linahi. Kainda aw gid waydi ungud kawu nu mag-awat sa tawu?

²⁰ Hintay waya nguna kang masabi sa kanmu, Panginuun Diyus? Dahil kilala nimu nu si unu ungud aku kanmu manugsirbi.

²¹ Angay sa kanmu taratu hanggan nalub-anan, binwat nimu inda pag manga kaladulawan pag bagay ag ipinaburayhaw nimu inda sa kangku, sa kanmu manugsirbi.

²² “Panginuun Diyus, kadayaw-dayaw kawu. Unman duy kawu may kaparihu. Unman may iba Diyus purya sa kanmu ag unman diman kami may nasaydan may iba pag diyus parihu sa kanmu.

²³ Unman diman may kaparihu kanmu nasakupan Israilita. Inda lang pag nasyun kanmu pinalaya ginan sa pagkasuruguun hampay bumaliw nasakupan nimu. Nibantug kanmu ngaran dahil sa makamaskihan ag lilingutan pag binwat nimu pagka pinalayas nimu ti manga nasyun hanggan kanda manga diyus-diyusan sa panab-anan nimu pagpalwas nasakupan ginan sa Ihiptu.

²⁴ Binwat nimu ti manga Israilita kanmu nasakupan sa unman may katapusan, ag kawu, ti Panginuun, kanda yi ngap Diyus.

^25-26 “Ag taynguna, Panginuun Diyus, tupada duy nimu kanmu itinaratu sa kangku, sa kanmu manugsirbi, hanggan sa kang magtal-anakan, hampay makilala kawu hanggan aban. Ag sumabi ti manga tawu, ‘Ti Panginuun Makamaskihan imaw ti Diyus Israil!’ Ag kang magtal-anakan parargu sumirbi sa kanmu hanggan aban.

²⁷ Panginuun Makamaskihan, Diyus Israil, magsarig duy aku magdarangin sa kanmu dahil itinultul nimu sa kangku, sa kanmu manugsirbi, kuntay pumarargu ginan sa kang linahi ti humari sa Israil.

²⁸ Panginuun Diyus, tutuu gid ungud kawu ti Diyus! Itinaratu nimu sa kangku, sa kanmu manugsirbi, inda pag mararinu pag bagay, tapat kawu sa kanmu manga taratu.

²⁹ Mana ikabaya nimu ti pagpapalad sa kang magtal-anakan hampay pumarargu sida sumirbi sa kanmu atubangan hanggan aban, dahil tunda ngani kanmu itinaratu Panginuun Diyus. Ag sa inda pag papalad nimu, mapalad kang magtal-anakan hanggan aban.”