2 Samwil 6 - Hanunuu

Dinara ti Kaban Kasunduan sa Hirusalim

¹ Tinipun maan ni Dabid ti pinakamahusay pag manga sundalu Israil kay kayamuun 30,000.

² Linmakaw sida atabug sa Baala sakup Huda hampay bul-un ati ginan ti Kaban Diyus, nu naan ti kadayawan Panginuun Makamaskihan. Ti Panginuun mag-ulian sa karaw-an duwa ka anghil kirubin sa tungud Kaban.

^3-4 Bin-ul nida ni Dabid ti Kaban Diyus ati gin sa balay ni Abinadab sa tagudtud ag ikinarga sa bag-u pag karusa. Sida ni Usa ni Ahiyu pag anak ni Abinadab ti mag-antabay sa karusa; si Ahiyu ti mag-una.

⁵ Si Dabid hanggan ti tanan nasakupan Israil nagdaus kasiyahan sa atubangan Panginuun sa buu nida kabisugan. Magkarantahan sida ag magpatunug manga alpa, manga lira, manga pamakaransing, manga kastanita hanggan pumpiyang.

⁶ Pagka rinmas-ug sida sa may giriukan ni Nakun, naligsay ti baka nakan hiniyaptan ni Usa ti Kaban Diyus.

⁷ Nangisug gid ti Panginuun sa kan Usa dahil sa kay binwat. Nakan minatay siya Diyus ati sa saruy Kaban.

⁸ Nangisug si Dabid dahil pinarusahan Panginuun si Usa. Ag tugka taynguna, tunda pag rugar pag-ingarnan Paris Usa.

⁹ Sa tunda diman pag sirang, nadala si Dabid sa Panginuun ag kay sinabi, “Kabitay madara atag sa kang banwa ti Kaban Panginuun?”

¹⁰ Nakan nagpasya siya balaw yi lang darahun atag sa kay banwa ti Kaban Panginuun. Tinayakan yi lang niya tunda sa balay ni Ubid Idum taga Gat.

¹¹ Siyun di ti Kaban Panginuun sa balay ni Ubid Idum sa sulud tulu ka bulan, ag pinapaladan siya Panginuun hanggan kay buu magtal-anakan.

¹² Taynguna, naalaman ni Hari Dabid pinapaladan Panginuun ti magtal-anakan ni Ubid Idum hanggan ti tanan magkaapu niya dahil sa Kaban Diyus. Nakan nag-ati si Dabid sa balay ni Ubid Idum ag bin-ul ti Kaban Diyus dinara sa kay banwa may kabayaan.

¹³ Pagka unum yi ka tiklang ti manga magdara Kaban Panginuun, ipinapat-ung ni Dabid sida ag naghandug siya usa ka tudu baka hanggan usa ka pinatabul ibun baka.

¹⁴ Buu kabisugan sinmayaw si Dabid sa atubangan Panginuun may sulung ipud human sa linu.

¹⁵ Habang pagdarahun ni Dabid hanggan manga Israilita ti Kaban Panginuun, maghuruyawan sida ag magpatunug turumpita.

¹⁶ Pagka pasulud yi sa banwa ni Dabid ti Kaban Panginuun, namasirang sa gaha si Mikul kay anak ni Saul. Nakitan niya magluksu-luksu ag magsayaw-sayaw si Hari Dabid sa atubangan Panginuun, ag ikinay-a niya tunda.

¹⁷ Ipinauli nida ti Kaban Panginuun sa sulud turda sa ipinatindug ni Dabid para sa siyun. Bag-u nagpakaun siya sa Panginuun manga handug pagsunugun hanggan manga handug para sa mayad pag pakiusa.

¹⁸ Igu natapus kay maghandug, pinapaladan niya ti manga tawu sa ngaran Panginuun Makamaskihan.

¹⁹ Pinakan-an niya tinapay, taguban hanggan pinauga ubas ti kada Israilita, lalaki man ngatay babayi. Siyun ginan, nuli yi sida sa kanda sadili manga balay.

²⁰ Pagka nuli si Dabid hampay papaladan kay magtal-anakan, sinulang siya ni Mikul kay anak ni Saul ag sinabihan, “Masulung taynguna pag sirang para sa kagalang-galang pag hari Israil! Magsayaw siya ati ga maubahan yi sa atubangan manga babayi suruguun niya manga takinan, unman siya magkay-a!”

²¹ Magkun si Dabid sa kan Mikul, “Binwat niku tunda sa atubangan Panginuun, ti nagpili sa kangku kailis nimu ama ngatay una waya si unu sa kay linahi. Pinili niya aku mamunu sa manga nasakupan niya Israilita nakan iparargu niku kang magbaya sa atubangan Panginuun.

²² Ag una makakaray-a waya kang buwatun para sa pagdaus Panginuun, buwatun di gid niku tunda. Makakaray-a aku sa kanmu magbantay dapat mayad aku sa pamantay manga babayi suruguun kanmu pagsabihun.”

²³ Dahil siyun, unman nagkaanak si Mikul tugka sa namatay siya.