2 Samwil 5 - Hanunuu

Pinili Hari si Dabid sa Buu Israil

¹ Nag-ati ti tanan linahi Israil sa kan Dabid sa Hibrun ag sinabi, “Kadugu nimi kamu.

² Ginan di waya sa kabag-u, una si Saul waya kanmi hari, kawu yi ti magpanguna sa manga Israilita sa girahan. Nagkumun diman ti Panginuun, ‘Giyahan nimu kang manga nasakupan Israilita parihu sa paggiya usa ka manug-alaga sa kay manga karanidu. Kawu ti takinan nida.’ ”

³ Nakan ati sa Hibrun, nagbuwat kasunduan si Dabid sa manga manugpamahala sa Israil sa atubangan Panginuun. Bag-u binuhusan nida lana ulibu kay ulu ni Dabid bilang pagkilala siya yi ngani ti hari Israil.

⁴ Si Dabid 30 yi ka timpu kay idad pagka pinili siya hari Israil, ag naghari siya sa sulud upatpulu ka timpu.

⁵ Naghari siya sa Huda sa sulud pitu ka timpu may unum ka bulan, ati siya pag nangulian sa Hibrun. Ag 33 ka timpu kay maghari sa buu Israil hanggan Huda, ati siya pag nangulian sa Hirusalim.

Sinakup ni Dabid ti Hirusalim

⁶ Pagka sa usa ka sirang, nag-atag si Dabid hanggan kay manga tawuhan sa Hirusalim hampay girahun ti manga Hibusiyu mag-ulian ati. Magkun ti manga Hibusiyu sa kan Dabid, “Unman kamu makaslud sitay sa Hirusalim! Una manga buta ag pilay kaya kamu amparahun hampay unman makaslud.” Sinabi nida tunda dahil kanda isip unman makaslud sida ni Dabid.

⁷ Dapat nasakup di gid nida ni Dabid ti mapag-un pag kampu Siun, kainda pag-ingarnan Banwa ni Dabid.

⁸ Sa udwaya magkaslud ni Dabid ti Hirusalim, magkun siya sa kay manga tawuhan, “Ati kamu lakaw sa may lakawan danum hampay makaslud kamu sa Hirusalim ag taluha niyu ti manga Hibusiyu ga manga pilay hanggan buta. Pagkadat-an gid niku sida!” Tunda ginan pag nag-umpisa ti sarabihun, “Unman makaslud ti manga buta ag pilay sa Balay Panginuun.”

⁹ Pagka nasakup ni Dabid ti mapag-un pag kampu Siun, ati yi siya pag nangulian ag iningarnan niya tunda Banwa ni Dabid. Dinugangan niya tunda alad batu sa kay libut ginan sa ababa pag bahagi banwa.

¹⁰ Nag-amat di kay kapangyarihan ni Dabid dahil pag-awatan siya Panginuun Diyus Makamaskihan.

¹¹ Nagpasugu manga manugbarita si Hari Hiram taga Tiru atabug sa kan Dabid kaibahan ti manga manugpanday hanggan ti manugrunut batu, ag may dara sida manga pinlud kayu sidru hampay buwatun balay ni Dabid.

¹² Nasalman ni Dabid ti Panginuun ti nagpili sa kanya bilang hari Israil ag ti nagpaabunda sa kaharian niya para sa kay nasakupan manga Israilita.

¹³ Pagka napasalyu si Dabid sa Hirusalim ginan sa Hibrun, mayamu waya gid kay naasawa; kay iba sa kanda manga suruguun niya, ag nadugangan waya gid kay manga anak.

¹⁴ Inda kay manga ngaran niya manga anak lalaki iinanak sa Hirusalim: Si Samwa, si Subab, si Natan, si Sulumun,

¹⁵ si Ibhar, si Ilisuwa, si Nipig, si Hapya,

¹⁶ si Ilisama, si Ilyada, ag si Ilipilit.

Tinalu ni Dabid ti manga Pilistiyu

¹⁷ Pagka nabaritaan manga Pilistiyu si Dabid ti pinili hari Israil, tinipun nida ti tanan nida manga sundalu hampay dakpun siya. Dapat naalaman tunda ni Dabid, nakan inmatag siya sa usa ka mapag-un pag kampu.

¹⁸ Rinmas-ug ti manga Pilistiyu, nagkampu sida sa Karatagan Ripaim.

¹⁹ Nakan namaingana si Dabid sa Panginuun, “Girahun aw nimi ti manga Pilistiyu? Ipatalu aw nimu sida sa kanmi?” Sinmagut ti Panginuun, “Hu, paglakaw kamu, dahil ipatalu niku sida sa kanyu.”

²⁰ Nakan nag-atag ngani sida ni Dabid sa Baal Pirasim, ag ati nida pag tinalu ti manga Pilistiyu. Magkun si Dabid, “Rinuris Panginuun kang manga kalaban ga linakawan lang magpaywas baha sa kang atubangan.” Nakan iningarnan Baal Pirasim tunda pag rugar.

²¹ Tinayakan ati manga Pilistiyu kanda manga diyus-diyusan, bin-ul inda ni Dabid hanggan niya manga tawuhan.

²² Binmalik ti manga Pilistiyu kinmampu maan sa Karatagan Ripaim.

²³ Nakan nagpaingana maan si Dabid sa Panginuun, ag sinmagut ti Panginuun, “Danga niyu rargu paggiraha sida. Sangputan dap niyu sida ag ati niyu sida pag salakaya sa may arani puun kayu balsam.

²⁴ Nu masaydan niyu ga may magdaguldul manga sundalu sa tungud baliwa kayu balsam, pagdalidali kamu salakay dahil tunda ti tanda pagpangunahan niku kamu sa kanyu paggira sa manga Pilistiyu.”

²⁵ Binwat ngani ni Dabid ti pag-isugu Panginuun sa kanya, ag pinanmatay nida ti manga Pilistiyu ginan sa Giba tugka sa Gisir.