2 Samwil 4 - Hanunuu

Minatay si Isbusit

¹ Pagka nadnugan ni Isbusit, kay anak ni Saul, kuntay minatay si Abnir sa Hibrun, dinurnan siya kadalaan hanggan ti tanan nasakupan Israil.

² May duwa ka tawuhan si Isbusit magpanguna sa paggira sa manga banwa manga kalaban: si Baana ag si Rikab. Manga anak sida ni Rimun taga Biirut, ginan sa lahi ni Binhamin. Ti Biirut taynguna sakup Binhamin,

³ dahil nalagiw ti manga un-an mag-ulian siyun atabug sa Gitaim. Taynguna tugka, mag-ulian di sida ati bilang manga day-uhan.

⁴ (Ti usa waya ka anak ni Saul si Hunatan, may anak siya pilay, si Mipibusit. Lima yi ka timpu tunda kay idad igu nadnugan ti barita namatay sida ni Saul ni Hunatan sa girahan sa Hisriil. Pagka nadnugan manug-alaga ni Mipibusit ti barita, binaba niya siya bag-u nalagiw. Dapat dahil sa kadaldalian, nabul-iwan niya ti anak ag nalumpu.)

⁵ Pagka sa usa ka sirang, nag-atag sa balay ni Isbusit sida ni Rikab ni Baana kay manga anak ni Rimun taga Biirut. Karaw-an sirang kanda magras-ug habang magpahari si Isbusit.

^6-7 Sinmaka sida sa balay nagpanaguabi mam-ul tirigu. Nagrargu sida sa sulud-sulud ni Isbusit nu naan pag maigyaan tunda sa kay laming, bag-u hinandus nida sa tiyan. Pinlud nida ti liug ni Isbusit ag dinara nida tunda sa kanda pagtakas. Buu yabi sida maglakaw sa Karatagan Hurdan.

⁸ Pagka sida rinmas-ug sa Hibrun, dinara nida sa kan Dabid ti ulu ni Isbusit ag sinabi, “Indaay duy ti ulu ni Isbusit, kay anak ni Saul ti kalaban niyu, imaw ti magtima sa kanyu buhi. Taynguna pag sirang, nagbalus ti Panginuun sa kan Saul hanggan sa kay lahi para sa kanmu.”

⁹ Sinmagut si Dabid, “Pagsabihun niku sa kanyu kay tutuu sa atubangan Panginuun buhi, ti nagribri sa kangku sa tanan pag kadamhakan.

¹⁰ Kaybi may tawu nanabang sa kangku sa Siklag kay sabi tigbak yi si Saul, kay isip mayad pag barita kay dara sa kangku. Bagkus ngap, siya kang ipinadakup ag ipinamatay. Tunda kang ipinakaun pag pirimyu sa kanya, sa kay ibinarita sa kangku.

¹¹ Taynguna, hintay pag pirimyu kang ipakaun sa daut pag manga tawu parihu sa kanyu magmatay sa tawu ud may binwat salan, sa kay gid ngap sadili ulian ag igyaan pag minatay niyu? Balaw aw dapat niku kamu matyun hampay madura yi kamu sa kalibutan?”

¹² Nakan nagsugu si Dabid sa kay manga tawuhan kuntay matya sida ni Rikab ni Baana, ag sinunud ngani nida tunda. Pinlud nida ti kamang ag lulud magtar-arian, bag-u ibinitin kay bilug sa may arani tipunan danum sa Hibrun. Pagkatapus, bin-ul nida ti ulu ni Isbusit, ag ilinbung sa lulubngan ni Abnir sa Hibrun.