2 Samwil 3 - Hanunuu

¹ Tida ti umpisa dugay pag labanan manga magpakampi sa kan Saul hanggan manga magpakampi sa kan Dabid. Amat-amat magbisug kay gurupu ni Dabid, dapat kan Saul amat-amat maglumuy.

² Inda kay manga anak lalaki ni Dabid ti iinanak sa Hibrun: Si Amnun kay panganay, kay anak niya sa kan Ahinuam taga Hisriil.

³ Si Kilyab kay pangadwa, kay anak niya sa kan Abigil, kay buranday ni Nabal taga Karmilu. Si Absalum kay pangatlu, kay anak niya sa kan Maaka, kay anak ni Hari Talmay sa Gisur.

⁴ Si Aduniyas kay pan-upat, kay anak niya sa kan Hagit. Si Sipatyas kay panlima, kay anak niya sa kan Abital.

⁵ Si Itriyam kay ikan-um, kay anak niya sa kan Igla. Sida ngani kay manga anak ni Dabid ti iinanak sa Hibrun.

Napakampi si Abnir sa kan Dabid

⁶ Habang parargu ti labanan manga magpakampi sa kan Saul hanggan manga magpakampi sa kan Dabid, si Abnir nagmakapangyarihan pag takinan manga magpakampi sa kan Saul.

⁷ Pagka sa usa ka sirang, binangdanan ni Isbusit si Abnir, “Hayga inulid nimu ti usa sa manga asawa niku ama ni Saul?” Kay pagtukuyun ni Isbusit si Rispa kay anak ni Aya.

⁸ Nangisug gid si Abnir sa sinabi ni Isbusit, nakan sinmagut siya, “Kanmu aw isip pagdayaun niku kanmu ama, ag magpakampi aku sa Huda? Una ginan kaybi, magkaasahan aku nimu ama, sa kay magtal-anakan hanggan manga kakilala, ag balaw niku kawu ipinakaun sa kan Dabid. Dapat taynguna, pagbangdanan nimu aku nagkasala sa tunda pag babayi!

⁹ Nu katunda lang waydi, mayad waya awatan niku si Dabid agud matupad ti itinaratu Panginuun sa kanya, ag parusahan mana aku Diyus nu balaw niku siya awatan.

¹⁰ Itinaratu Panginuun balaw yi may humari una si unu pag lahi ni Saul nu unman si Dabid lang ti humari sa Israil ag Huda, ginan sa Dan tugka sa Biirsiba.”

¹¹ Unman yi nagpanghas nagbagaw si Isbusit dahil magkadala siya sa kan Abnir.

¹² Bag-u namasugu si Abnir manga manugbarita tabug sa kan Dabid, “Kawu ti dapat humari sa buu daga Israil. Mamwat kita usa ka kasunduan ag awatan niku kawu sa pagsakup sa buu banwa Israil.”

¹³ Sinmagut si Dabid, “Hu, manbuwat aku kasunduan sa kanmu sa usa ka bagay: Ulian sa kangku kang asawa si Mikul kay anak ni Saul sa kanmu pag-ataytag.”

¹⁴ Namasugu ngani si Dabid manga manugbarita tabug sa kan Isbusit hampay sabihun, “Ulian sa kangku kang asawa si Mikul. Dahil naasawa niku siya sa kapalit 100 buhi hanggan lukub pinagturian manga Pilistiyu.”

¹⁵ Nakan nagpasugu si Isbusit hampay bawiun si Mikul ginan sa kay asawa sa kan Paltiyil kay anak ni Lais.

¹⁶ Maglumi magdasun si Paltiyil sa kan Mikul tugka sa Bahurim. Sinabihan ni Abnir si Paltiyil pag-uli yi. Nakan nuli ngani siya.

¹⁷ Nagpakihampang si Abnir sa manga manugpamahala Israil. Magkun siya, “Dugay yi gustu niyu buwatun hari si Dabid.

¹⁸ Inda yi ti panahun niyu, dahil may taratu ti Panginuun sa kay suruguun sa kan Dabid kuntay sa panab-anan niya kay iribri ti nasakupan Israil ginan sa kamang manga Pilistiyu hanggan sa tanan nida kalaban.”

¹⁹ Nagpakihampang diman si Abnir sa lahi ni Binhamin. Bag-u nag-ati siya sa Hibrun agud sabihun sa kan Dabid kuntay magpasnu ti nasakupan Israil hanggan Binhamin siya kanda hari.

²⁰ Pagka nakaras-ug si Abnir sa Hibrun kaibahan kay 20 ka tawuhan, nag-alistu si Dabid kasayahan para sa kanda.

²¹ Magkun si Abnir sa kan Dabid, “Mahal Hari, pasnui duy nimu aku lumakaw hampay sabihan ti tanan nasakupan Israil kuntay awati kawu bilang hari. Sa panab-anan siyun, magkasundu kamu ag tanggapun nida kawu bilang hari. Bag-u humari yi kawu sa buu Israil, sa gustu nimu pag palakaw.” Nakan pinasnuan ni Dabid si Abnir linmakaw may kahusayan.

Minatay ni Huab si Abnir

²² Nagras-ug si Huab hanggan kay iba ka tawuhan ni Dabid sa Hibrun ginan sa girahan, mayamu kanda nadara pag manga gamit inaghas ginan sa labanan. Dapat unman yi siyun si Abnir dahil pinaginan yi siya ni Dabid may kahusayan.

²³ Pagka naalaman ni Huab nag-atag si Abnir kay anak ni Nir sa hari ag pinaginan may kahusayan,

²⁴ nag-atag si Huab sa hari ag sinabi, “Hintay kanmu binwat? Nag-atag yi ngani sa kanmu si Abnir, hayga pinaginan waya nimu? Kainda, udyi siya!

²⁵ Kilala diman duy nimu si Abnir kay anak ni Nir, nagsitay siya hampay dayaun ag tiidan ti kada kimut nimu.”

²⁶ Tinayakan ni Huab si Dabid, ag nagsugu siya lagsa si Abnir. Natakdan nida sa bubun Sira ag tinaban atabug sa Hibrun. Dapat unman inda alam ni Dabid.

²⁷ Pagka ati yi si Abnir sa Hibrun, tinaban siya ni Huab atag sa may puwirtahan banwa ag nagpabalhingu para hampangun niya sida-sida lang duwa. Bag-u siyun pag hinandus ni Huab si Abnir sa tiyan bilang balus sa pagmatay ni Abnir sa kay patar-ari sa kan Asahil, ag namatay si Abnir.

²⁸ Pagka nabaritaan tunda ni Dabid, magkun siya, “Alam di Panginuun unman aku may labut hanggan kang manga tawuhan sa pagkamatay ni Abnir kay anak ni Nir.

²⁹ Si Huab hanggan kay magtal-anakan ti may saragtun. Mana kay manga linahi pag pirmi may sakit amumutul hanggan dilikadu pag sakit sa lukub, manga pilay hanggan magkamatay sa girahan hanggan pag magkalun-usan.”

³⁰ (Kay dahilan pagmatay ni Huab hanggan niya patar-ari ni Abisay sa kan Abnir dahil minatay ni Abnir kanda patar-ari si Asahil ati sa girahan sa Gibyun.)

³¹ Pagkatapus, sinabi ni Dabid sa kan Huab hanggan sa tanan niya kaibahan, “Gisia niyu kanyu manga rutay ag pagrutay saku. Paghimanglaw kamu habang maglakaw sa unahan bangkay ni Abnir sa paglubung sa kanya.” Nanlubung diman si Hari Dabid magdasun sa kay uryan bangkay.

³² Ilinbung si Abnir sa Hibrun, ag magngarugngug sa lumi si Hari Dabid ati sa kalubngan. Katunda diman ti mayamu tawu nanlubung maglumi ati.

³³ Nanganta si Hari Dabid kay kanta maghimanglaw sa kan Abnir: “Hayga namatay si Abnir parihu sa usa ka manugmatay?

³⁴ Unman may gapus kay manga kamang una kay lulud unman diman may higut tarikada, dapat minatay siya manga daut pag tawu.” Kas-a waya maan nanlulumian ti manga tawu sa kan Abnir.

³⁵ Sa tunda diman pag sirang, unman nangaun si Dabid, nakan pagpilitun siya manga tawu pagkaun. Dapat nanumpa si Dabid, “Parusahan mana aku Diyus mahigpit nu mangaun una hintay pag karan-unun bag-u misalup ti init.”

³⁶ Magbaya ti manga tawu sa sinabi ni Dabid, hanggan yi ti tanan manga binwat ni Dabid kanda pag-ikabaya.

³⁷ Nakan naalaman tanan nasakupan Israil balaw may labut si Hari Dabid sa kamatayan ni Abnir.

³⁸ Bag-u magkun si Dabid sa kay manga tawuhan, “Unman aw niyu magkaisip namatay ti usa ka makapangyarihan pag takinan Israil taynguna pag sirang?

³⁹ Una aku ti pinili hari kainda, unman niku kaya sida ni Huab ni Abisay pag manga anak ni Siruya. Mabisug man sida sa kangku. Nakan ti Panginuun yi lang ti bumalus sa tunda pag manga daut tawu dahil sa binwat nida daut.”