2 Samwil 23 - Hanunuu

Ti Uryan Binagaw ni Dabid

¹ Ipinabantug Kaabwat-abwatan pag Diyus si Dabid kay anak ni Isai. Pinili siya Diyus ni Hakub hampay maghari, ag nanurat siya mararinu pag kanta Israil. Inda kay uryan binagaw:

² “Nagbagaw ti Ispiritu Panginuun sa panab-anan niku; kay manga bagaw atay sa kang bibig.

³ Magkun sa kangku ti Diyus, ti batu palalan-iban Israil, ‘Ti magpangulu matadlung ag may dala sa Diyus

⁴ parihu sa rayaw sirang magbutlak sa surip balaw magal-um, magpasinay sa manga ilamnun nauranan!’

⁵ Katunda ngani kang linahi sa magbantay Diyus, ag nagbuwat siya kasunduan unman may katapusan sa kangku. Inda pag kasunduan mayad ag malinaw, unman inda mauman. Nakan pihu aku pirmi di iribri Diyus ag ipakaun niya sa kangku ti tanan niku pagkaibgan.

^6-7 Dapat ti daut pag tawu parihu sa madugi pag halaman pag-iyamut. Balaw sida mahimu bul-un sa panab-anan lang kamang, kailangan waya tunda gamitan baul ngatay kayu, bag-u sunugun sida sa nagkatumpukan nida pag rugar.”

Ti Maraisug pag manga Tawuhan ni Dabid

⁸ Inda ti manga maraisug pag tawuhan ni Dabid: Si Husib Basibit taga Takimun ti magpanguna sa tulu ka maraisug pag tawuhan ni Dabid. Sa usa lang ka girahan, nakamatay siya 800 tawu sa panab-anan lang niya bangkaw.

⁹ Kay dasun sa kanya si Iliyasar kay anak ni Duday ginan sa linahi ni Ahua, usa sa tulu ka maraisug pag tawuhan ni Dabid. Usa siya sa manga kaibahan ni Dabid katpung mag-akat inaway sida sa manga Pilistiyu sa Pas Damim. Nalagiw ti manga Israilita,

¹⁰ dapat napatayak siya ag pinanmatay niya ti manga Pilistiyu tugka sa ginasa yi kay kamang ag nan-ganit sa kahiyaput baladaw. Daka pag karibrihan ti binwat Panginuun sa tunda katpung pag sirang. Ti nalagiw pag manga Israilita binmalik atabug sa kan Iliyasar agud mam-ul lang manga armas manga nagkaramatay.

¹¹ Kay sunud si Sama kay anak ni Agi taga Harar. Pagka sa usa ka sirang, nagtipun ti manga Pilistiyu sa Lihi, ag sinalakay nida ti manga Israilita sa may taranuman manga kunduy. Nalagiw ti manga Israilita,

¹² dapat napatayak si Sama sa karaw-an taranuman hampay kay dipinsahan tunda, ag minatay niya ti manga Pilistiyu. Sa awat Panginuun, nanalu sida.

¹³ Katpung udas tig-arani, nag-ati sa kan Dabid kay tulu ka tawuhan ati sa may lukib Adulam. Tunda pag tulu ka tawu kaibahan sa 30 ka maraisug pag tawuhan ni Dabid. Tunda katpung makampuhan waydi ti manga Pilistiyu sa Karatagan Ripaim

¹⁴ ag naagaw nida ti Bitlihim. Habang ati si Dabid sa usa ka matibay pag paratag-an,

¹⁵ inuwaw siya. Magkun siya, “Mayad gid mana nu may bum-ul irinmun danum sa kangku ati sa bubun sa may arani puwirtahan banwa Bitlihim.”

¹⁶ Nakan lihus nagsulud tunda pag tulu ka maraisug atag sa kampu manga Pilistiyu, arani sa may puwirtahan banwa Bitlihim. Nagbuul sida danum ati sa bubun ag dinara tunda sa kan Dabid. Dapat unman tunda ininum ni Dabid, bagkus ngap kay inuyang bilang handug sa Panginuun.

¹⁷ Magkun siya, “Panginuun, balaw duy niku inda mainum dahil kay halaga inda ga dugu manga tawu nagbuhis kanda buhi sa kanda nagbuul.” Nakan ngani balaw tunda ininum ni Dabid. Tunda ngani ti binwat tulu ka maraisug pag tawuhan ni Dabid.

¹⁸ Si Abisay kay patar-ari ni Huab, kay anak ni Siruya, imaw ti takinan 30 ka maraisug pag tawuhan ni Dabid. Nakamatay siya 300 Pilistiyu sa panab-anan niya bangkaw. Nakan nibantug siya parihu sa tulu ka maraisug pag tawuhan.

¹⁹ Ag dahil siya ti pinakabantug sa 30, siya ngap ti kumandir nida, dapat balaw siya nibilang sa tulu ka maisug.

²⁰ May usa waya ka maisug pag tawu kay ngaran si Binaya. Taga Kabsiil siya, kay ama si Hihuyada. Nagbuwat siya marinu pag manga buwat, kaibahan yi ti pagmatay sa duwa ka pinaka-anad pag sundalu Muab. Sa iba ka udas, linagas niya ti usa ka liyun. Una mag-uran yilu ag maganuy, dinmugsun siya sa may pagpatag-an liyun ag kay minatay tunda.

²¹ Bukud waya siyun, minatay diman niya ti usa ka daka gid pag Ihipsiyu may armas bangkaw, dapat kanya pamakul lang kay armas. Inagaw niya ti bangkaw sa Ihipsiyu ag tunda yi ngap waydi kay iminatay siyun.

²² Imaw ngani tunda kay binwat ni Binaya kay anak ni Hihuyada. Nibantug diman siya parihu sa tulu ka maisug pag tawu,

²³ dapat balaw siya nibilang sa kanda. Ag dahil siya ti bantug gid sa 30 niya ka kaibahan, pinili siya ni Dabid takinan niya manga alalay.

²⁴ Inda ti iba waya ka kasali sa 30 ka maraisug pag tawu: si Asahil kay patar-ari ni Huab; si Ilhanan kay anak ni Dudu taga Bitlihim;

²⁵ sida ni Sama ni Ilika taga Harud;

²⁶ si Hilis taga Palti; si Ira kay anak ni Ikis taga Tikwa;

²⁷ si Abisir taga Anatut; si Mibunai taga Husa;

²⁸ si Salmun taga Ahua; si Maharai taga Nitupa;

²⁹ si Hilib kay anak ni Baana taga Nitupa; si Itay kay anak ni Ribai taga Gibiya, sakup Binhamin;

³⁰ Si Binaya taga Piratun; si Hidai mag-uli arani sa may luung Gaas;

³¹ si Abi Albun taga Araba; si Asmabit taga Bahurim;

³² si Ilyaba taga Saalbun; kay manga anak ni Hasin;

³³ si Hunatan kay anak ni Sama taga Harar; si Ahiam kay anak ni Sarar taga Harar;

³⁴ si Ilipilit kay anak ni Ahasbai taga Maaka; si Ilyam kay anak ni Ahitupil taga Gilu;

³⁵ si Hisru taga Karmilu; si Paarai taga Arba;

³⁶ si Igal kay anak ni Natan taga Suba; kay anak ni Haggadi

³⁷ si Silik taga Amun; si Naharai taga Biirut (ti tagadara armas ni Huab kay anak ni Siruya);

³⁸ sida ni Ira ni Garib pag manga taga Hatir;

³⁹ ag si Uryas usa ka Hitiyu. 37 sida tanan.