2 Samwil 22 - Hanunuu

Ti Kanta sa Pagpanalu ni Dabid

¹ Kinmanta si Dabid sa Panginuun pagka irinibri siya Panginuun sa kamang niya manga kalaban hanggan sa kan Saul.

^2-3 Inda kay kanta: “Panginuun, kawu kang palalan-iban pag batu, kang matibay pag paratag-an ag manugribri. Bilang palalan-iban pag batu, makapatagu aku sa kanmu. Kawu kang panangga, makamaskihan pag manugribri. Kawu kang darangpan ag paratag-an. Kawu ti magribri sa kangku ginan sa maraisug pag manga tawu.

⁴ Dayawun kawu, Panginuun, dahil nu maghagad awat aku sa kanmu, pag-iribri nimu aku sa kang manga kalaban.

⁵ Ti kamatayan parihu sa humbak maglapaw sa kangku. Ti kadamhakan parihu sa mabaskug pag baha mag-anud sa kangku.

⁶ Ti kamatayan ga lubid masabudan sa kangku ag ga suduk sa kang lakawan.

⁷ Sa kang kakurian, nagdangup aku sa kanmu, Panginuun niku Diyus, ag pinatingihan nimu kang darangin sa kanmu Balay.

⁸ Naglinug ti kalibutan hanggan ti patakinan kalangitan natandug, dahil nagalit kawu, Panginuun.

⁹ Linmuwang ti anus sa kanmu irung, sa kanmu bibig linmuwang ti maglabdaban apuy hanggan manga baga.

¹⁰ Binukasan nimu ti langit ag dinmugsun kawu, bag-u tinmata kawu sa magal-um pag rurum.

¹¹ Sinmakay kawu sa kirubin, ag mabisug linmayang napadara sa durus.

¹² Sinangput nimu kadudulman kanmu sadili, Napatagu kawu sa madamul pag rurum.

¹³ Kinmilat sa kanmu atubangan, linmuwang ti maglabdaban pag manga baga.

¹⁴ Kanmu busis Panginuun, Kaabwat-abwatan pag Diyus, magkurarug ginan sa langit.

¹⁵ Pinana nimu kilat kanmu manga kalaban, ag namalalagiwan sida namululagan.

¹⁶ Sa kanmu pagtamyaw ag masyadu pag pangagalit, namara ti dagat ag linmutaw ti daga, ag niburayhaw diman ti patakinan kalibutan.

¹⁷ Ginan sa langit, ginamit nimu aku ag bin-ul ginan sa abasad pag danum.

¹⁸ Irinibri nimu aku ginan sa makapangyarihan pag manga kalaban niku balaw kaya labanan niku.

¹⁹ Sinalakay nida aku sa udas niku kakurian, dapat inawatan nimu aku, Panginuun.

²⁰ Irinibri nimu aku sa kadamhakan, dahil aku kanmu pagbayaun.

²¹ Pagpapaladan nimu aku dahil matadlung kang buhi ag unman aku may nabwat kasalanan.

²² Dahil pagsundun niku kanmu manga kagustuhan, ag unman aku napablag sa kanmu, Panginuun niku Diyus.

²³ Pagtupadun niku ti tanan nimu sugu ag balaw niku paglabagun kanmu manga surundanun.

²⁴ Alam nimu unman may ikasabi kang buhi, pag-amanan niku ti kadautan.

²⁵ Nakan ngani pagpirimyuhan nimu aku, dahil nakitan nimu magkabuhi aku matadlung ag unman aku may pagbuwatun kasalanan.

²⁶ Matinupadun kawu sa manga matinupadun sa kanmu, ag mayad kawu sa mayad pag manga tawu.

²⁷ Tapat kawu sa manga matapat sa kanmu, ag matinudukun kawu sa manga daut.

²⁸ Hu, pag-iribri nimu ti manga mapinakumbabaun, dapat pag-ipaababa nimu ti manga marapadayaw-dayaw.

²⁹ Panginuun, kawu kang rayaw. Sa kadudulman, kawu kang sulu.

³⁰ Sa kanmu awat, kaya niku girahun ti gurupu manga sundalu, ag kaya niku daykun kanda palalan-iban pag alad batu.

³¹ Diyus, kanmu palakaw unman may ikasabi. Kanmu bagaw masarigan gid. Parihu kawu sa panangga sa tanan magdangup sa kanmu.

³² Kawu lang, Panginuun, ti Diyus, ag unman yi may iba. Kawu lang kanmi palalan-iban pag batu.

³³ Kawu ti magpakaun kabisugan sa kangku, hanggan ti magbantay sa kang lakawan.

³⁴ Pagpabisugun nimu kang lulud parihu sa lulud karasyaw, agud makaagwanta aku magtukad sa arabwat pag manga rugar.

³⁵ Pagpaantiguhun nimu aku sa maggira, parihu sa paglabtung sa maganit pag bayi.

³⁶ Kawu parihu sa panangga mag-alaga sa kangku, ag sa panab-anan nimu awat nibantug aku.

³⁷ Pagpakan-an nimu aku marayaw pag lakawan, nakan balaw mag-iligsay kang lulud.

³⁸ Linagas niku kang manga kalaban ag natalu niku sida. Balaw gid aku inmapas tugka sa naruris niku sida.

³⁹ Binakul niku sida ag nagkaraplid sa kang malulud ag udyi sida nakabangun waya.

⁴⁰ Pinakan-an nimu aku kabisugan sa paggira, nakan natalu niku kang manga kalaban.

⁴¹ Dahil sa kanmu, napausun kang manga kalaban, ag rinuris niku ti magkagalit sa kangku.

⁴² Maghagad sida awat dapat unman may nangawat sa kanda. Nagtawag sida sa kanmu, Panginuun, dapat balaw nimu sida sinagut.

⁴³ Rinunut niku sida tugka sa nagbaliw wadi galbuk pagpalidun durus, bag-u tinatatataan niku sida ga lutuk sa dalan.

⁴⁴ Irinibri nimu aku sa manga maglaban niku pag nasakupan. Binwat nimu aku takinan manga nasyun. Ti manga taga iba rugar magsirbi sa kangku.

⁴⁵ Mag-asaydan di waya nida aku, magluhud sida sa kadalaan, ag rargu magsunud sa kang sugu.

⁴⁶ Nadala sida, nakan magluwas sida sa kanda manga paratag-an pagtakigan sa dala.

⁴⁷ Buhi kawu, Panginuun! Dayawun kawu kang palalan-iban pag batu! Pag-ipaabwat niku kawu dahil kawu ti Diyus kang Manugribri.

⁴⁸ Pagbalusan nimu kang manga kalaban, ag pag-ipasirung nimu ti manga nasyun sa kangku.

⁴⁹ Pag-iribri nimu aku sa kang maraisug pag manga kalaban, ag pag-ipapanalu nimu aku sa kanda.

⁵⁰ Nakan dayawun niku kawu sa manga nasyun, Panginuun. Kantahan niku kawu manga pagdayaw.

⁵¹ Pagpakan-an nimu mayamu pag panalu kanmu pinili pag hari. Pagmahalun nimu si Dabid hanggan kay manga linahi sa unman may katapusan.”