2 Samwil 21 - Hanunuu

Pinatay manga Gibyunita ti manga Linahi ni Saul

¹ Katpung si Dabid ti hari, nagkaimaw taglun-us sa sulud tulu ka timpu. Nakan nandarangin si Dabid sa Panginuun. Magkun ti Panginuun, “Rinmas-ug ti taglun-us dahil minatay ni Saul hanggan niya magtal-anakan ti manga Gibyunita.”

² Ti manga Gibyunita balaw ginan sa linahi Israilita nu unman ginan sa nasawad buhi pag manga Amuriyu. Nagtaratu ti manga Israilita balaw nida sida matyun dapat ginayak sida matyun ni Saul dahil sa subra niya magkaaburidu sa Israil ag Huda. Ipinatawag ni Dabid ti manga Gibyunita,

³ ag pinaingana, “Hintay kang buwatun sa kanyu hampay mabayadan ti binwat kasalanan ni Saul sa kanyu, ag hampay papaladan niyu ti nasakupan Panginuun?”

⁴ Sinmagut ti manga Gibyunita, “Balaw duy mabayadan pilak ngatay gintu kanmi galit sa kan Saul hanggan sa kay magtal-anakan. Ag dayu diman kami manmatay una si unu pag Israilita bilang pagbalus purya lang nu ipahintulut nimu inda.” Nagpaingana si Dabid, “Nu katunda, hintay kanyu gustu kang buwatun para sa kanyu?”

⁵ Sinmagut sida, “Ginayak duy kami matyun ni Saul hampay unman may masawad sa kanmi sa Israil.

⁶ Nakan pakan-an nimu sa kanmi ti pitu ka lalaki ginan sa kay linahi, dahil matyun nimi sida ag pabay-anan kanda bangkay sa may arani pagsambahan sa Panginuun pag rugar ati sa Gibiya, kay banwa tunda ni Saul ti pinili Panginuun pag hari.” Magkun ti hari, “Hu, ipakaun niku sida sa kanyu.”

⁷ Balaw ipinakaun ni Dabid sa kanda si Mipibusit kay anak ni Hunatan ag laki ni Saul, dahil sa sumpaan nida ni Hunatan sa atubangan Panginuun.

⁸ Ti ipinakaun ni Dabid kay duwa ka anak ni Saul sida ni Armuni ni Mipibusit. Kay ina nida si Rispa kay anak ni Aya. Ipinakaun diman ni Dabid ti lima ka anak lalaki ni Mirab. Kay anak ni Saul si Mirab ag kay asawa si Adriyil kay anak ni Barsilay taga Mihula.

⁹ Ipinakaun ni Dabid sida sa manga Gibyunita, ag pinanmatay sida pitu ati sa bantud arani sa rugar pagsambahan sa atubangan Panginuun. Pinabay-anan lang nida ati ti manga bangkay. Nangyari inda katpung mag-umpisa di waya ti aranihan sibada.

¹⁰ Si Rispa kay anak ni Aya nagbuul saku ag linapad tunda sa usa ka daka pag batu hampay buwatun niya parahuwayan. Tinanudan niya ti manga bangkay hampay balaw kan-un manga manuk nu sirang ag hampay balaw kan-un simarun hayup nu yabi. Siyun di siya ginan sa nag-umpisa ti aranyan tugka sa inmuran.

¹¹ Pagka naalaman ni Dabid ti binwat ni Rispa kay asawa ni Saul,

¹² nag-ati siya sa manga mag-ulian sa Habis Gilyad ag hinagad kay manga but-ul ni Saul hanggan kay anak si Hunatan. (Pagka namatay sida ni Saul ni Hunatan sa kanda paggira sa manga Pilistiyu sa Gilbuwa, ibinitin manga Pilistiyu ti manga bangkay sa sugkadan Bit San, ag lihus bin-ul manga taga Habis Gilyad kanda manga bangkay.)

¹³ Dinara ni Dabid ti manga but-ul nida ni Saul ni Hunatan, hanggan diman ti manga but-ul pitu ka pinanmatay manga Gibyunita.

¹⁴ Ipinalubung niya tunda sa kay manga tawuhan sa linubngan ni Saul ama si Kis, sa banwa Sila sa Binhamin. Natupad ti tanan isinugu ni Dabid. Siyun ginan, sinagut Panginuun kanda manga darangin pag-apas yi ti taglun-us sa kanda banwa.

Ti Girahan Laban sa manga Pilistiyu

¹⁵ Nagras-ug ti panahun, nanlalabanan maan ti manga Pilistiyu ag manga Israilita. Pagka nanlaban si Dabid hanggan kay manga tawuhan, ginasa siya.

¹⁶ Si Isbi Binub usa ka Pilistiyu ginan sa linahi manga Rapa naggayak matyun si Dabid. Kay suru niya bangkaw galang kay buyat manga upat ka kilu, ag may masuribayan waya siya bag-u pag armas.

¹⁷ Dapat rinmas-ug si Abisay kay anak ni Siruya hampay iribri si Dabid, ag minatay niya ti manga Pilistiyu. Siyun ginan, magkun kay manga tawuhan ni Dabid sa kanya, “Balaw yi duy kami pumasnu sa kanmu kumuyug maan sa kanmi sa labanan. Parihu kawu sa sulu sa Israil ag balaw nimi gustu madura kawu.”

¹⁸ Igu sa sunud pag manga panahun, nanlalabanan maan ti manga Pilistiyu ag manga Israilita sa Gub. Sa tunda pag labanan, minatay ni Sibikay taga Husa si Sap, usa sa manga linahi ni Rapa.

¹⁹ Ag sa usa waya nida ka labanan sa Gub, minatay ni Ilhanan, anak ni Haari Urigim, taga Bitlihim, si Gulyat taga Gat. Kay bangkaw ni Gulyat mabuyat ag madamul.

²⁰ Nanlalabanan waya gid maan ti manga Pilistiyu ag manga Israilita, ag nangyari tunda sa Gat. Sa tunda pag labanan, may usa ka tawu daka gid, may tig-unum ka ituturu sa kay manga kamang ag lulud. Usa diman siya sa linahi manga Rapa.

²¹ Pagka pagpuyaan niya ti manga Israilita, minatay siya ni Hunatan kay anak patar-ari ni Dabid si Simya.

²² Tunda pag upat ka Pilistiyu ginan sa linahi manga Rapa taga Gat. Minatay sida ni Dabid hanggan niya manga tawuhan.