2 Samwil 20 - Hanunuu

Naglaban si Shiba sa kan Dabid

¹ Taynguna, may usa ka tawu ginan sa lahi ni Binhamin ti maraibgun sa gulu. Kay ngaran si Shiba, kay anak ni Bikri. Pinatnug niya ti turumpita bag-u nanringgit, “Manga taga Israil, unman kita may labut sa kan Dabid kay anak ni Isai! Muli yi kita tanan!”

² Nakan tinayakan manga taga Israil si Dabid, kinmuyug sida sa kan Shiba. Dapat napatayak ti manga taga Huda sa kanda hari ag inibahan nida siya ginan sa Sapa Hurdan atabug sa Hirusalim.

³ Pagka nakabalik yi si Dabid sa kay balay hari sa Hirusalim, nagsugu siya daraha sa usa ka balay kay sampulu ka asawa kay tinayakan hampay man-asikasu ag manbantay sa balay hari. Ipinakaun niya ti tanan nida pangailangan dapat balaw yi niya sida inulid. Ati sida pag nangulian ga manga balu tugka sa namatay.

⁴ Pagkatapus, magkun ti hari sa kan Amasa, “Tipuna nimu ti manga sundalu Huda ag pag-ataytag kamu sa kangku sa ikatlu pag sirang taynguna ginan.”

⁵ Nakan linmakaw ngani si Amasa ag tinipun ti manga sundalu Huda, dapat unman siya nakabalik sa itinagka hari pag sirang.

⁶ Nakan magkun ti hari sa kan Abisay, “Daka pag gulu ti buwatun sa kanta ni Shiba kaysa binwat ni Absalum. Nakan taynguna, ibaha kang manga tawuhan ag lagsa niyu siya bag-u niya maagaw ti manga magkasangputan alad batu pag banwa ag makapakarayu siya sa kanta.”

⁷ Nakan ginminan ngani si Abisay sa Hirusalim hampay lagsun si Shiba. Tinaban niya si Huab hanggan kay manga tawuhan, bag-u ti manga alalay ni Dabid pag manga Kiritiyu ag Pilitiyu, hanggan yi ti tanan maraisug pag sundalu.

⁸ Pagka ati yi sida sa daka pag batu sa Gibyun, nasulang nida si Amasa. Si Huab tunda katpung nakarutay pan-gira ag may sabak kay baladaw sa kay huragkus. Pagka magpakarani siya sa kan Amasa, lihim niya ginabut kay baladaw.

⁹ Magkun siya tag sa kan Amasa, “Kumusta kawu, patar-ari?” Bag-u hiniyaptan niya sikun pag kamang kay bungut ni Amasa hampay kay arkan.

¹⁰ Dapat balaw tunda napansin ni Amasa ti baladaw sa kay wala pag kamang ni Huab. Hinandus siya ni Huab sa tiyan ag linmuwang kay puna atag sa daga. Rargu namatay siya nakan balaw yi inuman hinandus ni Huab. Naparargu sa paglagas sa kan Shiba ti magtar-ari sida ni Huab ni Abisay.

¹¹ Tinmindug sa arani ni Amasa ti usa sa manga tawuhan ni Huab ag magkun tag sa manga tawuhan ni Amasa, “Nu magkampi kamu sa kanda ni Huab ag ni Dabid, pagsunud kamu sa kan Huab!”

¹² Mabugtangan sa karaw-an dalan ti bangkay ni Amasa tupus sadili niya dugu. Una si unu ti maglawuy siyun magpat-ung gid ag magbantay sa bangkay. Pagka napansin tunda manga tawuhan ni Huab, ginuyud nida ti bangkay ni Amasa ginan sa dalan atabug sa padang, bag-u tinabunan tunda rutay.

¹³ Pagka nab-ul yi kay bangkay ni Amasa ginan sa dalan, naparargu ti tanan sa pagsunud sa kan Huab sa paglagas sa kan Shiba.

¹⁴ Si Shiba waydi nag-ati sa tanan linahi Israil hampay tipunun ti tanan katawuhan niya. Sinmunud sa kanya kay manga katawuhan ag nantiripnan sida sa Abil Bit Maaka.

¹⁵ Pagka nabaritaan tunda ni Huab hanggan niya manga tawuhan, nag-ati sida sa Abil Bit Maaka ag pinalibutan tunda. Nagbuwat sida manga tumpuk daga sa saruy alad batu hampay makadayik sida, ag amat-amat nida pagdautun ti alad batu.

¹⁶ May usa ka matinudukun pag babayi sa sulud banwa ti rinminggit sa manga tawuhan ni Huab, “Pagpatingi kamu sa kangku! Sabiha niyu sa kan Huab pag-atag sa kangku dahil gustu niku manhampang sa kanya.”

¹⁷ Nakan nag-ati ngani si Huab sa kanya, ag nagpaingana ti babayi, “Kawu aw si Huab?” Sinmagut si Huab, “Hu, aku ngani duy.” Magkun ti babayi, “Pagpatingi duy kawu sa kang sabihun sa kanmu.” Sinmagut si Huab, “Hu, mamatingi aku.”

¹⁸ Magkun ti babayi, “May kabagawan kaybi magkumun, ‘Nu gustu niyu maayus kanyu kakurian, paghagad kamu payu sa banwa Abil.’

¹⁹ Usa duy aku sa manga magsarig pumarargu ti kahusayan sa Israil. Dapat kawu, hayga pagpilitun nimu wasakun ti usa sa manga magpanguna pag banwa sa Israil? Hayga gustu niyu wasakun ti magkaapu Panginuun pag banwa?”

²⁰ Sinmagut si Huab, “Balaw niku gustu wasakun kanyu banwa!

²¹ Balaw tunda kanmi turunu. Nansalakay kami dahil sa kan Shiba ginan sa kabantudan Ipraim. Naglaban siya sa kan Hari Dabid. Pakan-an dap niyu siya sa kanmi bag-u di kami mighit sa kanyu banwa.” Magkun ti babayi, “Iyamut nimi sa kanyu kay ulu ginan sa may alad batu.”

²² Nakan inatag babayi ti manga mag-uli sa banwa ag sinabi niya sa kanda kay gayak. Pinlud nida kay liug ni Shiba ag iyinmut nida tunda sa kan Huab. Bag-u pinatunug ni Huab ti turumpita ag inmalis kay manga tawuhan sa banwa, nag-inululi sida. Si Huab waydi binmalik sa hari, sa Hirusalim.

Ti manga may Kangaranan ni Dabid

²³ Si Huab ti takinan sundalu Israil. Si Binaya waydi kay anak ni Hihuyada ti takinan alalay ni Dabid manga Kiritiyu ag Pilitiyu.

²⁴ Si Aduniram ti magpamunu sa manga suruguun pag-ipatarabahu sapilitan. Si Husapat kay anak ni Ahilud ti manughiyaput manga kasuratan sa kaharian.

²⁵ Si Shiba ti manugsurat hari. Sida ni Saduk ni Abyatar ti takinan manga manughandug.

²⁶ Ag kay sadili manughandug ni Dabid si Ira taga Hair.