2 Samwil 2 - Hanunuu

Binwat Hari sa Huda si Dabid

¹ Siyun ginan, namaingana si Dabid sa Panginuun, “Atabug aw duy aku sa usa sa manga banwa sa Huda?” Nagsagut ti Panginuun, “Pag-atag kawu.” Namaingana maan si Dabid, “Naan duy ati?” Nagsagut ti Panginuun, “Sa Hibrun.”

² Nakan nag-atag ati si Dabid kaibahan kay duwa niya ka asawa si Ahinuam taga Hisriil ag si Abigil kay balu ni Nabal taga Karmilu.

³ Iniba diman ni Dabid kay manga tawuhan hanggan ti manga magtal-anakan nida. Ati sida pag nangulian sa Hibrun hanggan sa kay manga palibut pag rugar.

⁴ Unman nagdugay, nag-ati ti manga takinan sa Huda sa Hibrun ag pinayidan lana ulibu kay ulu ni Dabid para kilalahun siya hari sa Huda. Pagka naalaman ni Dabid ti manga taga Habis Gilyad ti naglubung sa kan Saul,

⁵ nagpadara siya manga manugbarita magkumun, “Papaladan kamu Panginuun sa ipinakakit niyu pag kaayadan sa kan Saul, sa kanyu hari, sa panab-anan paglubung sa kanya.

⁶ Ipakakit mana Panginuun kay pagmahal ag pagkamatinupadun sa kanyu. Ipakakit diman niku sa kanyu kang kaayadan dahil sa kanyu binwat.

⁷ Taynguna, pagpakarig-un kamu ag pagmatutum kanyu naisipan una namatay yi kanyu hari si Saul. Aku waydi ti pinili manga taga Huda bilang kanda hari.”

Ti Durumtan sa Tab-anan Magtal-anakan ni Dabid ag ni Saul

⁸ Taynguna, ti kumandir manga sundalu ni Saul, si Abnir kay anak ni Nir nag-ati sa Mahanaim kaibahan si Isbusit kay anak ni Saul.

⁹ Ati pag ipinakilala niya hari sa buu Israil si Isbusit, kaibahan yi sitay ti manga rugar Gilyad, Asuri, Hisriil, Ipraim hanggan Binhamin.

¹⁰ Si Isbusit 40 ka timpu yi kay idad katpung naghari siya sa Israil, naghari siya sa sulud duwa ka timpu. Si Dabid waydi ti pagkilalan-un pag hari manga taga Huda,

¹¹ naghari siya sa Huda sa sulud pitu ka timpu may unum ka bulan. Ati siya pag nangulian sa Hibrun.

¹² Pagka sa usa ka sirang, nag-atag si Abnir sa Gibyun ginan sa Mahanaim kaibahan kay manga tawuhan ni Isbusit.

¹³ Sinulang sida ni Huab kay anak ni Siruya, kaibahan ti iba waya pag manga tawuhan ni Dabid ati sa may tipunan danum sa Gibyun. Tinmukaw kay gurupu ni Abnir sa may baliw tipunan danum ag ti gurupu ni Huab tinmukaw sa kay baliw waydi baliwa.

¹⁴ Magkun si Abnir sa kan Huab, “Palabanun nita sa kanta atubangan ti pira sa marahusay pag manga sundalu nita.” Nagpasnu si Huab,

¹⁵ nagtindug ngani ti 12 ka tawuhan ni Isbusit ginan sa lahi ni Binhamin hampay labanan ti 12 ka tawuhan ni Dabid.

¹⁶ Nanhiriyaptan sida sa ulu nida manga kalaban ag nanburunuan sa habig tugka sa namatay sida tanan. Nakan iningarnan Hilkat Hasurim tunda pag rugar sa Gibyun.

¹⁷ Pagkatapus tunda, masyadu gid nanlalabanan ti duwa ka gurupu. Sa tunda pag sirang, natalu si Abnir hanggan ti manga tawuhan sa Israil laban sa manga tawuhan ni Dabid.

^18-19 Kaibahan sa labanan kay tulu ka anak ni Siruya sida ni Huab, ni Abisay hanggan si Asahil. Mabisug magpalagiw si Asahil parihu sa karasyaw, linagas niya si Abnir unman may aliwliw.

²⁰ Pagka nangaliwliw si Abnir, nakitan niya inda ag pinaingana, “Kawu aw tunda, Asahil?” Sinmagut si Asahil, “Hu, aku ngani.”

²¹ Pagka magkun si Abnir sa kanya, “Danga yi aku paglagsa, tida yi lang pag-usa sa kang manga kaibahan ti lagsa nimu bag-u bul-a kay gamit niya.” Dapat unman mag-apas si Asahil sa paglagas sa kanya.

²² Magkun maan si Abnir sa kan Asahil, “Pag-apas kawu sa paglagas sa kangku! Danga aku pagpilita nimu matyun kawu. Unman yi aku may uyahun iatubang sa kanmu patar-ari sa kan Huab nu matyun niku kawu.”

²³ Dapat unman mag-apas si Asahil sa paglagas sa kanya, nakan hinandus niya tunda suru bangkaw, ag linmapus tunda tugka sa kay dayu. Nidugsak siya sa daga ag rargu namatay. Ti tanan manga tawu maglawuy magpat-ung sa rugar niya nagkamatyan.

²⁴ Pagka naalaman nida ni Huab ni Abisay ti nangyari, linagas nida si Abnir. Mag-isalup yi ti init kanda magras-ug sa tagudtud Ama arani sa Giya, sa dalan atabug sa pangawakawaan Gibyun.

²⁵ Nagtiripun ati sa kan Abnir sa babaw tagudtud ti manga sundalu ginan sa lahi ni Binhamin hampay man-alistu sa labanan.

²⁶ Rininggitan ni Abnir si Huab, “Manmaratyan yi lang aw lugud kita tugka aban? Unman aw nimu magkasalman hinanakit lang kay iburak inda? Kapira nimu paapasun kanmu manga tawuhan sa paglagas sa kanmi sa manga kadugu diman niyu?”

²⁷ Sinmagut si Huab, “Pagpihuun niku sa kanmu, sa atubangan Diyus buhi, nu unman nimu tunda sinabi parargu kamu lagsun manga tawuhan niku tugka surip.”

²⁸ Nakan ipinatnug ni Huab ti budyung, ti tanan niya tawuhan nag-apas sa paglagas sa manga taga Israil. Ag inmapas ti labanan.

²⁹ Buu yabi naglakaw si Abnir hanggan kay manga tawuhan sa Karatagan Hurdan. Nagdipay sida sa Sapa Hurdan ag parargu naglakaw hanggan magkasurip tugka sa nakaras-ug sida sa Mahanaim.

³⁰ Pagka inmapas si Huab sa kay maglagas sa kan Abnir, siya hanggan kay manga tawuhan nuli yi waydi. Pagka tinipun ni Huab kay manga tawuhan, naalaman niya purya sa kan Asahil, 19 ti namatay sa kanda.

³¹ Dapat 360 ti namatay nida sa manga tawuhan ni Abnir, ag tunda tanan ginan sa lahi ni Binhamin.

³² Bin-ul nida ni Huab ti bangkay ni Asahil ag ilinbung sa kalubngan niya ama sa Bitlihim. Bag-u buu yabi sida naglakaw, ag rinmas-ug sida sa Hibrun magkasurip.