2 Samwil 19 - Hanunuu

¹ May nanultul sa kan Huab kuntay maglumi ti hari ag magpanruku dahil sa kan Absalum.

² Pagka nasaydan inda manga sundalu, inmapas kanda kasayahan sa kanda pagpanalu ag nailisan tunda pagpanrukuan.

³ Unman sida mag-ingay binmalik sa banwa Mahanaim, parihu sa manga sundalu magkay-a dahil nalagiw ginan sa labanan.

⁴ Tinakluban ni Dabid kay uyahun ag masyadu gid nanlumi, “Absalum, anak niku, anak niku!”

⁵ Nag-atag si Huab sa balay hari ag magkun, “Ipinakay-a nimu taynguna kanmu manga tawuhan, ti nagribri sa kanmu buhi ag sa buhi nimu manga anak hanggan asawa.

⁶ Pagmahalun nimu ti manga maglaban sa kanmu, ag paglabanan ti manga magmahal sa kanmu. Malinaw duy unman nimu pagpahalgaan kanmu manga takinan hanggan manga tawuhan. Sa kang magbantay, mas makabaya waya kawu nu mamatay kami tanan ag mabuhi si Absalum.

⁷ Pagluwas duy kawu taynguna ag pagpasalamat sa kanmu manga tawuhan. Dahil nu unman, pag-isumpa niku sa Panginuun una di usa sa kanda unman may matayak kaibahan nimu taynguna pag yabi. Inda ti pinakadaut mangyari sa kanmu ginan kaybi tugka taynguna.”

⁸ Nakan tinmindug si Dabid ag tinmukaw sa may puwirtahan banwa. Pagka naalaman tunda manga tawu, nantipun sida tanan sa kanya. Tunda katpung, namalalagiwan pauli ti manga sundalu Israil pag manga tawuhan ni Absalum.

Binmalik si Dabid sa Hirusalim

⁹ Ti manga tawu sa buu Israil mag-aratwan. Magkun sida, “Irinibri kita ni Hari Dabid sa kamang manga Pilistiyu, dapat nalagiw siya ginan sa kanta banwa dahil sa kan Absalum.

¹⁰ Pinili nita hari si Absalum, dapat namatay waydi siya sa labanan. Hayga unman kita manhanap paraan hampay maibalik nita si Dabid bilang hari?”

^11-12 Pagka nabaritaan ni Hari Dabid kanda paghampangan, nanpadara siya barita sa manga manughandug sida ni Saduk ni Abyatar, magkumun, “Sabiha niyu inda sa manga manugpamahala Huda: ‘Nabaritaan niku gustu niyu nasakupan ibalik aku bilang hari, ag kamu waya ti uryan nagpasya kuntay ibalik aku sa kang tukawan? Kabay manga katawuhan niku kamu ag linahi?’

¹³ Ag sabiha diman niyu inda sa kan Amasa, ‘Dahil linahi niku kawu, buwatun niku kawu kumandir manga sundalu niku kailis ni Huab. Nu balaw niku inda buwatun, parusahan gid mana subra aku Diyus.’ ”

¹⁴ Napapasnu ni Dabid ti manga taga Huda ag nagkausa sida sa kanda gayak. Bag-u kanda sinabi sa kan Dabid, “Pagbalik duy kawu ataytag hanggan ti tanan nimu tawuhan.”

¹⁵ Habang magpabalik si Dabid, sinulang siya manga nasakupan Huda ati sa Sapa Hurdan. Tunda pag manga tawu nagtipun ati sa Gilgal hampay ibahan siya sa pagdipay sa sapa.

¹⁶ Daldali kinmuyug sa pagsulang sa kan Dabid si Simi kay anak ni Gira, usa ka Binhaminita ginan sa Bahurim.

¹⁷ May kaibahan siya 1,000 Binhaminita, kaibahan yi siyun si Siyba ti suruguun magtal-anakan ni Saul, ag kay 15 niya ka anak lalaki hanggan 20 ka suruguun. Nagdaldali gid sida sa pagsulang sa kan Dabid sa Sapa Hurdan.

¹⁸ Inawatan nida tanan si Dabid hanggan kay magtal-anakan sa pagdipay sa sapa, ag sinunud nida ti una hintay pag gustu ni Dabid. Pagka mandipay di waya Sapa Hurdan si Dabid, linmuhud si Simi sa kay atubangan bilang paggalang,

Pinatawad ni Dabid si Simi

¹⁹ ag magkun, “Mahal Hari, patawada duy nimu aku. Kalimti yi duy mana nimu ti daut pag binwat niku sa kanmu katpung kanyu magginan sa Hirusalim.

²⁰ Pag-aminun duy niku nagkasala aku, Mahal Hari. Nakan ngani un-an aku rinmas-ug sitay kaysa iba manga linahi sa salatan hampay sulangun kawu.”

²¹ Pagkatapus, magkun si Abisay kay anak ni Siruya, “Balaw aw kabay matyun si Simi dahil sa kay magpuya sa pinili Panginuun pag hari?”

²² Dapat magkun si Dabid, “Kamu pag manga anak ni Siruya, hintay kanyu labut? Danga niyu pag amparaha kang gayak. Aku yi taynguna ti hari Israil, ag unman may matyun sa Israil taynguna pag sirang.”

²³ Nakan magkun si Dabid sa kan Simi, “Pag-isumpa niku balaw kawu matyun.”

^24-25 Nag-ati diman si Mipibusit kay laki ni Saul hampay sulangun si Dabid. Ginan siya sa Hirusalim. Unman waya siya nakaugas kay lulud ngatay nakaayit kay bungut hanggan nakailis kay rutay ginan sa nighit si Dabid sa Hirusalim tugka sa binmalik siya ribri. Pagka rinmas-ug siya ati, pinaingana siya ni Dabid, “Mipibusit, hayga unman kawu kinmuyug sa kangku?”

²⁶ Sinmagut siya, “Mahal Hari, alam nimu lumpu aku. Sinabihan niku kang suruguun si Siyba kuntay alistuhan ti asnu hampay makasakay aku ag makakuyug sa kanmu dapat nagpudil siya sa kangku.

²⁷ Ag isinumbung lang niya aku sa kanmu kuntay balaw aku kumuyug. Dapat alam nimu ti tutuu dahil parihu kawu sa anghil Diyus, nakan buwata nimu nu hintay ti mayad sa kanmu magbantay.

²⁸ Dapat mana minatay yi nimu ti buu linahi niku laki dapat pinakan-an nimu aku karampatan kumaun kaibahan nimu. Nakan unman yi duy aku may karampatan humagad sa kanmu una hintay.”

²⁹ Magkun si Dabid sa kanya, “Danga yi nita inda paghampangi. Nakapasya yi aku tungaun niyu ni Siyba ti daga ni Saul.”

³⁰ Sinabi ni Mipibusit sa hari, “Pakan-an yi lang duy tanan sa kanya. Kang-ud yi sa kangku ti nuli kawu ribri.”

Ti Pagkamabuut ni Dabid sa kan Barsilay

³¹ Nag-ati diman sa kan Dabid si Barsilay taga Gilyad ginan sa Rugilim. Magkaibug diman siya mangawat sa kanda ni Dabid sa pagdipay sa Sapa Hurdan.

³² Gurangun yi si Barsilay; 80 yi ka timpu kay idad. Mayaman siya, ag siya ti nagpakaun manga pangailangan ni Dabid katpung ati waya siya pag mag-uli sa Mahanaim.

³³ Magkun sa kanya si Dabid, “Pagkuyug kawu sa kangku sa pagdipay ag mangulian yi waydi kawu sa Hirusalim. Aku ti bahala sa kanmu ati.”

³⁴ Dapat sinmagut si Barsilay, “Balaw yi duy dumugay kang buhi, hayga manguyug waya aku sa kanmu sa Hirusalim?

³⁵ Aku duy 80 yi ka timpu, ag balaw yi niku alam nu hintay ti tuhay sa masarap ag sa balaw masarap. Balaw yi niku magkalasahan kang pagkan-un ag pag-inmun. Balaw yi niku mag-asaydan ti manga magkanta. Pabuyat lang aku sa kanmu, Mahal Hari.

³⁶ Diit lang pag bagay kang magtibu sa kanmu sa Hurdan, hayga kailangan waya nimu aku balusan katunda pag pirimyu?

³⁷ Muli yi lang aku, hampay nu mamatay aku, ati aku pag mamatay sa kang sadili banwa, nu naan pag ilinbung kang manga gurang. Atay kang anak si Kimham imaw ti sumirbi sa kanmu. Tabana siya, Mahal Hari, ag buwata nimu nu hintay sa kanmu magbantay ti mayad sa kanya.”

³⁸ Sinmagut ti hari, “Tabanun niku siya ag buwatun sa kanya ti una hintay pag kaayadan mana sa kanmu di pag binwat niku, ag buwatun niku una hintay kanmu hagadun sa kangku.”

³⁹ Hinagkung ni Dabid si Barsilay ag pinapaladan. Siyun ginan, dinmipay si Dabid hanggan kay manga tawuhan sa Sapa Hurdan, ag si Barsilay nuli yi waydi sa kay balay.

⁴⁰ Pagka nakadipay yi si Dabid, inmatag siya sa Gilgal kaibahan si Kimham hanggan ti tanan sundalu Huda ag ti katunga sundalu Israil.

⁴¹ Inmatag ti tanan sundalu Israil sa hari ag nagriklamu nu hayga kanda kadugu taga Huda ti nagpanguna sa pagpadipay sa kanya hanggan sa kay magtal-anakan, bag-u sa tanan tawuhan niya.

⁴² Sinmagut ti manga taga Huda sa manga sundalu Israil, “Binwat nimi inda dahil ti hari kanmi arani pag katawuhan. Hayga kamu magkaisug? Nakatanggap aw lugud kami karan-unun ngatay una hintay pag pirimyu ginan sa kanya? Unman!”

⁴³ Sinmagut ti nasakupan Israil, “Sampulu kami ti linahi sa Israil nakan sampulu diman ka bisis kanmi karampatan sa hari kaysa kanyu. Hayga ababa kanyu magbantay sa kanmi? Balaw aw kabay kami ti un-an nagsabi kuntay pabalikun nita kanta hari?” Dapat balaw magpatalu ti nasakupan Huda, ag marasakit pag bagaw kanda pag-isagut sa nasakupan Israil.