2 Samwil 16 - Hanunuu

Si Dabid ag si Siyba

¹ Nakalawuy lang diit si Dabid sa katayungtungan bantud igu nasulang niya si Siyba kay suruguun ni Mipibusit. May duwa siya ka asnu may karga 200 tinapay, 100 akup pinauga ubas, 100 bilug lutu pag burak kayu, ag intus ubas maulian sa paknul pag sukadan.

² Pinaingana ni Dabid si Siyba, “Hayga nagdara kawu tunda?” Sinmagut si Siyba, “Ti manga asnu duy hampay sakyan nimu magtal-anakan, ti manga tinapay waydi hanggan burak kayu para kan-un niyu hanggan nimu manga kaibahan, bag-u ti intus ubas hampay kanyu inmun nu magkagasa kamu sa pangawakawaan.”

³ Nagpaingana si Dabid, “Naan yi si Mipibusit, ti laki nimu amu ni Saul?” Sinmagut si Siyba, “Napatayak duy siya sa Hirusalim, dahil kay isip buwatun siya hari taynguna manga Israilita sa kaharian niya laki ni Saul.”

⁴ Magkun si Dabid, “Nu katida, pag-ipakaun yi niku taynguna sa kanmu ti tanan kasiyunan ni Mipibusit.” Magkun si Siyba, “Mahal Hari, alistu duy aku sumunud sa kanmu. Pagmasulung mana kawu sa kangku.”

Sinaadan ni Simi si Dabid

⁵ Pagka magkaarani yi si Hari Dabid sa Bahurim, may tawu linmuwas sa tunda ginan pag banwa ag magbagaw marasakit pag bagaw sa kan Dabid. Tunda pag tawu si Simi ngani kay anak ni Gira ag katawuhan ni Saul.

⁶ Binintuk niya si Dabid hanggan kay manga takinan una magkasangputan si Dabid manga tawuhan ag manga sadili niya manugbantay.

⁷ Inda kay manga sinabi sa kan Dabid: “Danga kawu magsulud sa kanmi banwa, manugmatay tawu ag daut kawu pag tawu!

⁸ Pagbalusan kawu Panginuun sa kanmu pagmatay sa kan Saul hanggan sa kay magtal-anakan. Bin-ul nimu kay karampatan, dapat taynguna, ipinakaun inda Panginuun sa kanmu anak sa kan Absalum. Natalu kawu dahil manugmatay tawu kawu!”

⁹ Magkun si Abisay kay anak ni Siruya sa hari, “Mahal Hari, hayga pagpabay-anan lang nimu saadan kawu tunda pag tawu parihu lang sa namatay idu? Pasnui duy nimu aku kang puldun kay liug.”

¹⁰ Dapat magkun ti hari, “Kamu pag manga anak ni Siruya, unman kamu may labut sitay! Nu sinugu siya Panginuun hampay saadan aku, si unu aku para amparahun siya?”

¹¹ Magkun si Dabid sa kan Abisay hanggan sa tanan takinan niya, “Nu kang anak ngani naggayak mumatay sa kangku, lalu wadi inda pag katawuhan ni Saul. Sinugu siya Panginuun nakan pabay-ani lang niyu siya.

¹² Barang makitan Panginuun kang magkakurian, ag balusan niya kaayadan kang magkalakawan kakurian taynguna.”

¹³ Nakan naparargu sa maglakaw sida ni Dabid hanggan kay manga tawuhan. Pagdasnun diman sida ni Simi, dapat sa saruy lang tagudtud siya pag maglakaw. Mintaras maglakaw siya, pagsaadan niya si Dabid ag pagyamtan batu hanggan daga.

¹⁴ Magkagasa yi sida ni Dabid hanggan kay manga tawuhan, nakan nagpahari sida igu rinmas-ug sa Sapa Hurdan.

Nagpakabta si Husay sa kan Absalum

¹⁵ Sida waydi ni Absalum, ni Ahitupil ag ti iba waya manga Israilita rinmas-ug sa Hirusalim.

¹⁶ Rinmas-ug diman ati si Husay ti usa ka Arkiyu pag kakilala ni Dabid. Nag-atag siya sa kan Absalum ag magkun, “Mabuhi ti hari! Mabuhi ti hari!”

¹⁷ Pinaingana ni Absalum si Husay, “Naan yi kanmu katapatan sa kanmu kakilala si Dabid? Hayga unman kawu kinmuyug sa kanya?”

¹⁸ Sinmagut si Husay, “Unman duy! Sa kanmu di aku pagkumuyug dahil kawu ti pinili Panginuun hanggan buu nasakupan Israil kawu ti humari.

¹⁹ Bukud waya siyun, si unu waya ngani kang sirbihan, nu balaw kawu kay anak ni Dabid. Nagsirbi aku kaybi sa kanmu ama, taynguna kawu waydi kang sirbihan.”

Ti Patigayun ni Ahitupil sa kan Absalum

²⁰ Magkun si Absalum sa kan Ahitupil, “Taynguna, hintay kanmu patigayun ti mayad nita buwatun?”

²¹ Sinmagut si Ahitupil, “Ulida kanmu ama manga asawa-suruguun kay tinayakan hampay man-asikasu sa balay hari. Bag-u maalaman buu Israil ginalit gid nimu lubus kanmu ama ag lalu di umamat ti supurta nimu manga tawuhan sa kanmu.”

²² Nakan nagpatindug sida turda sa babaw atup balay hari para sa kan Absalum, ag maghiling ti buu Israil magsulud siya ati hampay mangulid sa manga asawa niya ama.

²³ Ati katpung pag udas, pagsundun ni Absalum ti manga patigayun ni Ahitupil, parihu sa pagbuwatun ni Dabid. Dahil kanda isip ginan sa Diyus ti kada pag-ipatigayun ni Ahitupil.