2 Samwil 15 - Hanunuu

Naglaban si Absalum sa kan Dabid

¹ Siyun ginan, nagkaimaw si Absalum kalisa hanggan manga kabayu, bag-u nakatipun diman siya 50 ka sadili niya manugbantay.

² Maaga siya mag-ipulaw sirang-sirang ag magtindug sa saruy dalan atabug sa puwirtahan banwa. Nu may magras-ug tawu hampay ipakarani kay kasaba sa hari, pagpaingan-un siya ni Absalum nu taga naan, ag pagsabihun tawu nu naan ginan siya pag linahi Israil.

³ Pagkatapus, magkun sa kanya si Absalum, “Daka kanmu pag-asa manalu sa kanmu kasaba, dapat ay lang unman may kinatawan ti hari hampay dungugun kanmu kasaba.

⁴ Nu aku mana ti manughusay, makapakarani sa kangku ti kada tawu may kasaba ngatay riklamu, ag pihuun gid niku mapakan-an siya katadlungan.”

⁵ Ag nu may magpakarani tawu sa kan Absalum ag manluhud bilang paggalang, paghagkungun niya tunda ag pag-arkan bilang pagbati.

⁶ Katunda kay pagbuwatun ni Absalum sa tanan Israilita mag-ati sa hari hampay ipakarani kanda kasaba. Nakan nab-ul niya ti tiwala manga Israilita.

⁷ Pagkalawuy upat ka timpu, magkun si Absalum sa hari, “Pasnui duy nimu aku makaatag sa Hibrun hampay tupadun kang taratu sa Panginuun.

⁸ Katpung mag-ulian waya aku sa Gisur sakup Aram, nangaku aku sa Panginuun nu pabalikun maan aku Panginuun sa Hirusalim, mansamba aku sa kanya sa Hibrun.”

⁹ Magkun ti hari sa kanya, “Hu, pag may kahusayan mana kawu sa kanmu lakaw.” Nakan nag-ati ngani si Absalum sa Hibrun.

¹⁰ Dapat pagka rinmas-ug si Absalum sa Hibrun, nanlihus siya nansugu manga manugbarita sa buu Israil hampay sabihun, “Nu masaydan niyu ti tunug budyung, pagringgit kamu, ‘Si Absalum yi ti hari Israil, ag ati siya pag maghari sa Hibrun!’ ”

¹¹ Tinaban ni Absalum ti 200 ka tawu hampay umatag sa Hibrun. Dapat tunda pag manga tawu unman may alam sa manga gayak ni Absalum.

¹² Habang maghandug si Absalum, ipinab-ul niya si Ahitupil ati sa banwa Gilu, usa sa manga manugpatigayun ni Dabid. Habang magdugay, mag-amat di magyamu ti manga magsunud sa kan Absalum, nakan lalu di nagbaskug kay gayak laban sa kan Dabid.

Nalagiw si Dabid

¹³ May usa ka manugbarita nagtultul sa kan Dabid kuntay ti manga Israilita nagpaminsan sa kan Absalum.

¹⁴ Magkun si Dabid sa tanan niya kaibahan pag takinan sa Hirusalim, “Dali, kailangan yi nita makapalagiw. Barang salakayun kita ni Absalum ag matakdan niya kita, bag-u panmatyun kita tanan hanggan yi ti manga mag-uli sa Hirusalim. Kabaskug, nu gustu niyu makaribri sa kan Absalum!”

¹⁵ Magkun ti manga takinan, “Mahal Hari, alistu duy kami bumwat una hintay kanmu sabihun sa kanmi.”

¹⁶ Nakan linmakaw si Dabid kaibahan kay buu magtal-anakan, dapat tinayakan niya kay sampulu ka asawa-suruguun hampay man-asikasu sa balay hari.

¹⁷ Linmakaw si Dabid hanggan kay manga tawuhan, ag pinmat-ung sida sa tupad pinaka-uryan pag balay sa banwa,

¹⁸ bag-u ipinauna ni Dabid ti tanan tawuhan niya, hanggan yi ti tanan niya alalay manga Kiritiyu ag Pilitiyu. Dinmasun ti 600 tawu ginan sa Gat ag kinmuyug sa kan Dabid.

¹⁹ Magkun si Dabid sa kan Itay takinan manga taga Gat, “Hayga kamu magkuyug sa kanmi? Pagbalik kamu sa Hirusalim, sa bag-u niyu pag hari sa kan Absalum. Manga day-uhan lang kamu sa Israil nalagiw ginan sa kanyu rugar.

²⁰ Kararas-ug lang niyu sitay, bag-u taynguna manguyug kamu sa kanmi, unman ngani nimi alam nu naan tabug kami? Pagpabalik yi kamu kaibahan niyu manga kasimanwa, ag ipakakit mana Panginuun sa kanyu kay pagmahal hanggan katapatan.”

²¹ Dapat sinmagut si Itay sa hari, “Magsumpa duy aku sa buhi pag Panginuun ag sa kanmu, Mahal Hari, manguyug duy kami sa kanmu una naan tabug kawu, una waya karamatyanun ti patabgan nimi.”

²² Magkun si Dabid sa kanya, “Nu katunda, hu, pagkuyug kamu sa kanmi.” Nakan linmakaw ngani si Itay hanggan ti tanan tawuhan niya, bag-u kay magtal-anakan.

²³ Masyadu gid ti lulumian manga tawu sa Hirusalim habang maglawuy ti manga tawuhan ni Dabid. Dinmipay si Dabid sa Luung Kidrun kaibahan kay manga tawuhan atabug sa pangawakawaan.

²⁴ Ati diman ti manga manughandug, sida ni Saduk ni Abyatar, hanggan ti manga Libita magdara Kaban Kasunduan Diyus. Ipinauli nida ti Kaban Kasunduan sa saruy dalan ag nanhandug si Abyatar tugka sa makaginan ti tanan tawuhan ni Dabid sa banwa.

²⁵ Pagka natapus, magkun si Dabid sa kan Saduk, “Ulian ti Kaban Diyus sa Hirusalim. Nu magbaya sa kangku ti Panginuun, pabalikun niya aku sa Hirusalim ag makitan di maan niku inda hanggan kay nagkabugtangan pag rugar.

²⁶ Dapat nu unman, alistu di aku nu hintay man kay gustu buwatun sa kangku.”

²⁷ Magkun waya si Dabid sa kan Saduk, “Pag may kahusayan kamu sa kanyu pagbalik ni Abyatar sa Hirusalim kaibahan kanmu anak si Ahimaas hanggan kay anak ni Abyatar si Hunatan, bag-u pagtiid kamu ati.

²⁸ Mangalagad aku sa diripayan sapa sa pangawakawaan tugka sa makatanggap aku barita ginan sa kanyu.”

²⁹ Nakan ibinalik ngani nida ni Saduk ag ni Abyatar ti Kaban Diyus sa Hirusalim, ag ati di tunda.

³⁰ Maglumi magtukad si Dabid sa Bantud Ulibu. Unman siya may lapak maglakaw, ag may talukmung kay ulu dahil sa kay karukuan. May talukmung diman kay manga kaibahan ag maglumi habang magtukad.

³¹ May nagsabi sa kan Dabid kuntay si Ahitupil kinmuyug sa kan Absalum. Nakan nandarangin si Dabid, “Panginuun, buwata duy nimu unman may pulus kay patigayun ni Ahitupil.”

³² Pagka rinmas-ug sida ni Dabid sa katayungtungan Bantud Ulibu, nu naan pagsambahun ti Diyus, sinulang siya ni Husay usa ka Arkiyu. Gitas kay rutay ag may dapug kay ulu bilang pagpanruku.

³³ Magkun si Dabid sa kanya, “Unman kawu may miawat nu manguyug kawu sa kangku.

³⁴ Dapat nu bumalik kawu sa banwa ag sabihun nimu sa kan Absalum kuntay sirbihan nimu siya parihu sa kanmu magsirbi sa kangku, maawatan waya nimu aku sa panab-anan pagsalungat sa kada patigayun ni Ahitupil.

³⁵ Ati diman ti manga manughandug sida ni Saduk ni Abyatar. Sabiha nimu sa kanda ti tanan mag-asaydan nimu sa balay hari.

³⁶ Pagkatapus, paataytagan sa kangku kanda manga anak sida ni Ahimaas ni Hunatan hampay ibarita sa kangku kanda manga nasaydan.”

³⁷ Nakan binmalik sa Hirusalim si Husay kay kakilala ni Dabid. Nitpung waydi tunda katpung magsulud sa banwa si Absalum.