2 Samwil 13 - Hanunuu

Si Amnun ag si Tamar

¹ Kay anak ni Dabid si Absalum may marinu patar-ari kay ngaran si Tamar. Taynguna, si Amnun, usa diman sa manga anak ni Dabid, magkaibug sa kan Tamar.

² Dapat unman niya magkabwat kay gustu buwatun sa kan Tamar dahil daraga waya inda ag pirmi may manugbantay. Dahil siyun, nagtuhay kay buut hanggan di sa nasakit siya.

³ May kakilala mahangal-hangal si Amnun kay ngaran si Hunadab. Anak siya patar-ari ni Dabid si Simya.

⁴ Usa ka sirang, nagpaingana siya sa kan Amnun, “Anak kawu hari, dapat hayga sirang-sirang niku kawu mag-akitan maruku? Tultulan duy sa kangku nu hintay kanmu mag-asaydan.” Magkun si Amnun sa kanya, “Magkaibug duy aku sa kan Tamar, kay patar-ari ni Absalum, patar-ari diman niku sa ama.”

⁵ Magkun tag sa kanya si Hunadab, “Pagpahuway kawu ag pagpabalhinguun may sakit. Nu diawan kawu nimu ama, sabiha nimu pasnui niya si Tamar mandiaw sa kanmu hampay manpakaun sa kanmu. Sabiha nimu sa kanya gustu nimu makitan si Tamar mag-asikasu karan-unun ag gustu diman nimu siya ti manpakaun sa kanmu.”

⁶ Nakan napahuway ngani si Amnun ag nagpabalhinguun may sakit. Pagka dinuawan siya ni Hari Dabid, kay sinabi, “Gustu duy niku pag-ataytag kang patar-ari si Tamar ag pagbuwat tinapay sa kang arani, bag-u siya ti manpakaun sa kangku.”

⁷ Nakan nanpasabi ngani si Dabid sa kan Tamar ati sa balay hari, pag-ati dap siya sa kay patar-ari sa kan Amnun ag alistuhi karan-unun.

⁸ Nag-ati ngani si Tamar sa balay niya patar-ari ni Amnun ag naras-ugan niya mahuwayan. Nagbuul siya arina, hinaug niya tunda ag tinama sa mag-akitan ni Amnun.

⁹ Igu natama, bin-ul niya tunda hampay pakan-an si Amnun, dapat nagbugya di si Amnun. Magkun si Amnun, “Palwasan nimu ti tanan tawu!” Ag linmuwas ngani ti tanan tawu.

¹⁰ Pagkatapus, magkun si Amnun sa kan Tamar, “Daraha sa kang sulud-sulud ti karan-unun ag subui aku.” Nakan dinara ngani ni Tamar ti karan-unun sa kan Amnun.

¹¹ Dapat habang pagsubuan niya si Amnun, hinagkung siya ni Amnun ag magkun, “Man-ululidan kita.”

¹² Dapat nagbugya di si Tamar ag magkun, “Danga! Magtar-ari duy kita! Danga nimu aku pagpakay-aha! Danga kawu magbuwat kadautan. Balaw dapat mangyari inda sa Israil.

¹³ Hintay wadi ti iatubang niku pag uyahun sa manga tawu? Ag kawu, isipun manga tawu luku-luku sa Israil. Nakan hampanga yi lang ti hari tungkul sa siyun; pihu gid aku magpasnu siya maasawa nimu aku.”

¹⁴ Dapat unman nagpatingi sa kanya si Amnun ag dahil mas mabaskug siya sa kan Tamar naulid niya siya.

¹⁵ Igu nangyari tunda, pagkadat-an yi ni Amnun si Tamar, ag kay magkadaut sa kan Tamar subra waya sa kay magkaramdaman pagmahal sa kabag-u. Magkun si Amnun tabug sa kanya, “Pagluwas yi kawu!”

¹⁶ Sinmagut si Tamar, “Dayu aku manluwas! Daka gid pag kasalanan kanmu pagpalayas sa kangku taynguna kaysa kanmu binwat sa kangku.” Dapat unman siya pinatingihan ni Amnun.

¹⁷ Bagkus ngap, ipinatawag niya kay suruguun ag sinugu, “Palwasan tunda pag babayi ag talakpi ti sabian.”

¹⁸ Nakan ipinalwas ngani suruguun si Tamar ag tinalakpan ti sabian. Tunda katpung nakasulung marinu ag aba pag rutay si Tamar dahil tunda ti pag-isulung manga anak daraga hari ati katpung.

¹⁹ Kay binwat ni Tamar, ginisi niya kay marinu ag aba pag rutay, ag namauli siya dapug sa kay ulu. Bag-u linmakaw siya maglumi habang matakluban kay kamang sa kay uyahun.

²⁰ Pagka nakitan siya niya patar-ari ni Absalum, pinaingana siya, “May binwat aw daut sa kanmu si Amnun? Nu may imaw, danga yi lang nimu tunda pagtultulan sa iba dahil patar-ari nimu siya sa ama. Danga yi lang pagpakaisipa ti nangyari sa kanmu.” Ati yi sa kay balay ni Absalum pag nangulian si Tamar, dapat pirmi siya maruku ag usa-usa.

²¹ Pagka naalaman ni Hari Dabid ti nangyari, nangisug gid siya.

²² Ag una unman may binanggit si Absalum sa kan Amnun tungkul sa kay binwat sa kay patar-ari, pagkadat-an niya siya sa makakaray-a pag binwat sa kay patar-ari sa kan Tamar.

Minatay ni Absalum si Amnun

²³ Pagkalawuy duwa ka timpu, katpung pag-uguyan ni Absalum kay manga karanidu sa Baal Hasur, arani sa Ipraim, binan-awan niya ti tanan anak hari pag-atag hampay mandaus ati.

²⁴ Nag-ati siya sa kan Hari Dabid ag sinabi, “Magpauguy duy aku manga karanidu, makaatag aw duy kawu hanggan kanmu manga takinan sa tunda pag kasayahan?”

²⁵ Sinmagut ti hari, “Unman yi lang anak, makurian lang kawu nu manguyug kami tanan.” Pinilit siya ni Absalum dapat unman siya nagpasnu. Pinapaladan yi lang niya si Absalum.

²⁶ Magkun si Absalum, “Nu unman duy kawu makaatag, si Amnun yi lang kang patar-ari ti pasnui niyu makaatag.” Nagpaingana ti hari, “Hayga gustu nimu siya paatagun?”

²⁷ Bagkus ngap nagsagut, magpilit diman gid si Absalum, nakan ipinakuyug yi lang ni Dabid si Amnun, ag ti iba waya niya ka manga anak lalaki.

²⁸ Magkun si Absalum sa kay manga tawuhan, “Alagda niyu malangu si Amnun, ag nu manpaaman aku, matya niyu siya. Danga kamu magkadala; aku ti magsugu sa kanyu. Danga kamu magkadala ag pagpakatatag kamu!”

²⁹ Nakan minatay ngani manga tawuhan ni Absalum si Amnun angay sa kay sugu. Kadaka sinmakay ti iba ka anak lalaki hari sa kanda sadili mula ag nalagiw.

³⁰ Habang mag-uli yi sida sa Hirusalim, may nagbarita sa kan Dabid kuntay pinanmatay ni Absalum kay manga anak lalaki ag unman may nasawad una di usa.

³¹ Tinmindug si Dabid ag ginitas kay rutay bilang pagpakakit karukuan, bag-u napalubnang sa daga. Ginisi diman niya manga suruguun matindugan ati kanda manga rutay parihu sa binwat ni Dabid.

³² Dapat magkun si Hunadab, kay anak niya patar-ari ni Simya, “Mahal Hari, unman duy namatay ti tanan nimu anak nu unman si Amnun lang duy. Dugay yi duy pag gayak ni Absalum kay matyun si Amnun ginan waya katpung inulid ni Amnun kay patar-ari si Tamar.

³³ Danga duy kawu magpaniwala namatay ti tanan nimu anak lalaki. Si Amnun lang duy ti namatay.

³⁴ Si Absalum bay, nakapalagiw di.” Pagka sa tunda diman pag udas, may nakitan ti manga manugbantay alad batu Hirusalim usa ka gurupu magras-ug ginan sa saruy tagudtud sa isalpan. Nag-ati ti usa ka manugbantay sa hari ag magkun, “May nakitan duy kami manga tawu sa dalan Hurunaim, sa saruy tagudtud.”

³⁵ Magkun si Hunadab sa hari, “Mahal Hari, bantayi duy nimu! Tunda yi duy kanmu manga anak lalaki parihu sa kang pagkumnun.”

³⁶ Pagka nap-ut kay magbagaw, rinmas-ug waydi ngani kay manga anak lalaki ni Dabid maglumi. Masyadu gid nanlumi si Dabid hanggan ti tanan niya manga suruguun.

^37-38 Irinuku gid dugay pag panahun ni Dabid kay anak si Amnun. Pagka nalagiw si Absalum, nag-ati siya sa kan Hari Talmay taga Gisur, kay anak ni Amihud. Ati siya pag nangulian sa sulud tulu ka timpu.

³⁹ Pagka nakalawuy yi ti pagruku ni Hari Dabid sa kan Amnun, nanruku waydi siya sa kan Absalum.