2 Samwil 11 - Hanunuu

Si Dabid ag si Batsiba

¹ Katpung panahun mag-ati ti manga hari sa girahan agud manlaban, unman nagkuyug si Dabid. Napatayak lang siya sa Hirusalim. Sida ni Huab, hanggan ti manga takinan niya, ag ti tanan manga sundalu Israil ti ipinaati niya sa girahan. Tinalu nida ni Huab ti manga Amunita ag sinakup ti Raba.

² Magkamalambung yi tunda katpung, binmangun si Dabid ag nanlakaw-lakaw sa babaw atup balay hari. Habang magbantay siya tag sa sirung, may nakitan siya usa ka marinu pag babayi magparigus.

³ Nagsugu si Dabid kuntay alama nu si unu tunda pag babayi. Naalaman niya si Batsiba maaw pag babayi kay anak ni Ilyam ag asawa ni Uryas usa ka Hitiyu.

⁴ Ipinab-ul ni Dabid si Batsiba, ag pagka rinmas-ug, inulid siya ni Dabid. (Bag-u lang natapus tunda katpung kan Batsiba tun-anun sa paglumpiyu dahil sa kay kabulanan.) Pagka nakaululidan sida, nuli yi siya.

⁵ Siyun ginan namuduy siya, ag ipinaalam niya tunda sa kan Dabid.

⁶ Nagpabilin si Dabid sa kan Huab kuntay pag-atag sa kanya si Uryas usa ka Hitiyu. Nakan ipinaatag ngani ni Huab si Uryas sa kan Dabid.

⁷ Pagras-ug ni Uryas, pinaingana siya ni Dabid nu hintay yi kay kahamtangan ni Huab hanggan manga sundalu sa kanda nanlaban.

⁸ Bag-u magkun si Dabid sa kanya, “Pag-uli dapu kawu ag pagpahari.” Nakan ginminan si Uryas ginan sa balay hari, ag pinadaran-an siya ni Dabid manga pamakaun atabug sa kay balay.

⁹ Dapat unman nuli si Uryas sa kanda, ati di ngap siya pag naturug sa sabian balay hari kaibahan manga suruguun niya amu si Dabid.

¹⁰ Pagka naalaman ni Dabid balaw maaw nuli si Uryas, ipinatawag niya siya, ag pinaingana, “Hayga unman kawu nuli? Dugay yi kawu unman nakauli sa kanyu.”

¹¹ Magkun si Uryas, “Ti Kaban Kasunduan Diyus hanggan ti manga sundalu Israil ag Huda ati duy sa manga kampu sa karatagan, ag ati diman kanmi kumandir si Huab hanggan ti manga may kangaranan niya. Maagwanta aw lugud niku muli sa kanmi agud mangaun, manginum ag mangulid sa kang asawa? Pag-itaratu niku sa kanmu balaw niku tunda mabwat!”

¹² Magkun si Dabid sa kanya, “Pagsitaay dap kawu usa ka yabi, ag aldaw pauliun yi niku kawu sa kampu.” Nakan siyun dap ngani si Uryas sa Hirusalim sa tunda pag sirang. Kinaaldawan,

¹³ binan-awan siya ni Dabid mangaun ag manginum kaibahan niya. Ag linangu siya ni Dabid. Dapat sa tunda pag yabi, unman diman nuli si Uryas nu unman ati di gid siya pag naturug kaibahan manga suruguun niya amu si Dabid.

¹⁴ Pagka surip, nanurat si Dabid sa kan Huab ag ipinadara niya inda sa kan Uryas.

¹⁵ Indaay kay sabi: “Paulian nimu si Uryas sa unahan, nu naan ti masyadu gid pag labanan. Bag-u pag-atras kamu hampay siya matamaan ag mamatay.”

¹⁶ Nakan habang pagsangputun nida ti Raba, ipinauli ni Huab si Uryas sa rugar nu naan alam niya marabaskug ti manga kalaban.

¹⁷ Sinalakay manga kalaban sida ni Huab ag namatay si Uryas kaibahan ti iba waya ka manga sundalu ni Dabid.

¹⁸ Namadara si Huab barita sa kan Dabid tungkul sa tanan nangyari sa labanan.

¹⁹ Magkumun siya sa manugbarita, “Nu matapus nimu masabi sa hari ti nangyari sa labanan,

²⁰ mahimu mangisug siya ag paingan-un kawu, ‘Hayga nagpakarani gid kamu sa arani banwa habang maglaban? Unman aw niyu naisip mahimu nida kamu bangkawun ginan sa alad batu?

²¹ Unman aw lugud niyu magkaimatun-an nu kabitay namatay si Abimilik kay anak ni Hirubisit sa Tibis? Unman aw siya kabay linagpakan usa ka babayi galingan batu ginan sa tungud alad batu, ag namatay siya? Hayga nagpakarani kamu sa alad batu?’ Nu katunda ngani kay paingana, sabiha nimu sa kanya, ‘Namatay diman duy kanmu suruguun si Uryas, ti usa ka Hitiyu.’ ”

²² Linmakaw ti manugbarita, ag pagras-ug niya sa kan Dabid kay itinultul ti tanan sinabi ni Huab.

²³ Magkun siya sa kan Dabid, “Sinalakay duy kami manga kalaban sa karatagan, dapat linagas duy nimi sida pabalik sa sabian nida banwa.

²⁴ Bag-u pinana duy kami manga manugpana ati ginan sa may alad batu ag namatay duy ti pira ka manga sundalu nimu hanggan yi duy kanmu suruguun si Uryas, ti usa ka Hitiyu.”

²⁵ Magkun si Dabid sa manugbarita, “Sabiha nimu sa kan Huab danga magkaruku sa nangyari, dahil unman nita masabi nu si unu ti mamatay sa labanan. Sabiha nimu sa kanya pagpakatatag siya, ag kaayada waya niya ti pagsalakay sa banwa tugka sa midamhak tunda.”

²⁶ Pagka naalaman ni Batsiba namatay kay asawa si Uryas, nagruku siya.

²⁷ Pagkatapus panrukuan, ipinab-ul siya ni Dabid ag dinara sa balay hari. Inasawa siya ni Dabid ag unman nagdugay, nagkaimaw siya usa ka anak lalaki. Dapat daut kan Dabid binwat sa magbantay Panginuun.