2 Samwil 10 - Hanunuu

Tinalu ni Dabid ti manga Amunita ag manga Aramiyu

¹ Linmawuy ti pira ka sirang, namatay si Nahas, ti hari manga Amunita. Inilisan siya niya anak, ni Hanun bilang hari.

² Magkun si Dabid, “Pakakitan niku kaayadan si Hanun dahil mayad kay ama sa kangku.” Nakan namadara si Dabid manga takinan hampay ipakakit ti pagruku niya sa kan Hanun sa pagkamatay niya ama. Dapat igu rinmas-ug ti manga takinan ni Dabid sa daga manga Amunita,

³ nagkumun ti manga takinan manga Amunita sa kan Hanun kanda hari, “Sa kanmu pagkaalam, pagpahalagahan aw ni Dabid kanmu ama sa panab-anan pagpadara manga tawuhan hampay damayan kanmu karukuan? Unman! Ipinadara niya tunda pag manga tawu hampay lang tiidan kanta banwa ag wasakun.”

⁴ Nakan ipinadakup ni Hanun ti manga takinan ni Dabid, inuguy kanda katunga bungut, bag-u tinunga kanda manga rutay ginan sa awak tugka sa raprapa ag pinauli sida.

⁵ Magkay-a gid sida nuli dahil sa kanda uyahun. Pagka nabaritaan ni Dabid ti nangyari, namadara siya manga manugbarita hampay sabihun sa kay manga takinan pag-ati dap sida sa Hiriku tugka sa tumubu kanda manga bungut. Bag-u mahimu yi sida makabalik.

⁶ Naisipan manga Amunita kanda ginalit si Dabid, nakan nan-upa sida 20,000 sundalu Aramiyu ginan sa Bit Rihub hanggan Suba, bag-u 1,000 sundalu ginan sa hari Maaka, ag 12,000 sundalu ginan sa Tub.

⁷ Pagka nasaydan tunda ni Dabid, ipinadara niya si Huab hanggan ti tanan niya sundalu hampay manlaban.

⁸ Napauli ti manga Amunita sa puwirtahan nida banwa, habang ti manga Aramiyu waydi ginan sa Suba ag Rihub kaibahan ti manga sundalu ginan sa Tub hanggan Maaka ati sa karatagan pag maulian.

⁹ Pagka nakitan ni Huab may manga kalaban sa sarangwan hanggan sa aday-an, nagpili siya manga anad pag sundalu Israil, bag-u pinangunahan niya sida sa maglaban sa manga Aramiyu.

¹⁰ Ipinabahala ni Huab sa kay patar-ari sa kan Abisay ti manga nasawad pag sundalu hampay labanan ti manga Amunita.

¹¹ Magkun si Huab sa kan Abisay, “Nu makitan nimu magkatalu yi kami manga Aramiyu, awati niyu kami, dapat nu kamu waydi ti magkatalu yi manga Amunita, awatan nimi kamu.

¹² Pagpakatatag kamu! Manlaban kita sa buu nita kabisugan para sa kanta manga nasakupan hanggan sa manga banwa nita Diyus. Buwatun Panginuun nu hintay ti mayad sa kanya.”

¹³ Bag-u dinmulud agud man-gira sida ni Huab hanggan kay manga tawuhan, ag namalalagiwan ginan sa kanda atubangan ti manga Aramiyu.

¹⁴ Pagka nakitan manga Amunita namalalagiwan ti manga Aramiyu, nalagiw diman sida ginan sa atubangan ni Abisay ag sinmulud sa kanda banwa. Nakan nuli yi waydi sida ni Huab tabug sa Hirusalim ginan sa labanan manga Amunita.

¹⁵ Pagka napansin manga Aramiyu magkatalu sida manga Israilita, nantiripnan maan sida.

¹⁶ Inawatan sida iba manga Aramiyu kay ipinatawag ni Hadadisir ginan sa baliw dipay Sapa Iyupratis. Nag-ati sida sa Hilam sa pagpanguna ni Subak, ti kumandir manga sundalu ni Hadadisir.

¹⁷ Pagka naalaman tunda ni Dabid, tinipun niya ti tanan sundalu Israil, dinmipay sida sa Sapa Hurdan ag nag-ati sa Hilam. Nag-alistu ti manga Aramiyu sa pag-atubang sa kan Dabid, ag nanlaban ngani sida sa kanya.

¹⁸ Dapat nagpinalalagiw di gid maan ti manga Aramiyu ginan sa atubangan manga Israilita. Minatay nida ni Dabid ti 700 manugkalisa ag 40,000 ka manugkabayu. Minatay diman nida si Subak, ti kumandir manga sundalu.

¹⁹ Pagka nakitan tanan hari sakup ni Hadadisir magkatalu yi sida manga Israilita, napakiusa sida sa manga Israilita ag napasakup sa kanda. Nakan tunda di ginan magkadala yi mag-awat ti manga Aramiyu sa manga Amunita.