2 Samwil 1 - Hanunuu

Naalaman ni Dabid ti Pagkamatay ni Saul

¹ Binmalik sida ni Dabid sa Siklag igu natalu nida ti manga Amalikita. Nangulian sida sa Siklag duwa ka sirang. Ati katpung namatay yi si Saul.

² Pagka sa ikatlu pag sirang, may tawu rinmas-ug sa Siklag ginan sa kampu ni Saul, gitas kay rutay ag may manga galbuk kay ulu bilang pagpakakit karukuan. Nag-ati siya sa kan Dabid ag nagyuk-ub sa kay atubangan bilang paggalang.

³ Pinaingana siya ni Dabid, “Naan ginan kawu?” Sinmagut siya, “Nakapalagiw duy aku ginan sa kampu manga Israilita.”

⁴ Nagpaingana si Dabid, “Hayga, unu ti nangyari? Sabiha nimu sa kangku.” Magkun siya, “Nalagiw duy ti manga sundalu taga Israil sa girahan. Mayamu sa kanda ti nagkaramatay, hanggan si Saul kaibahan kay anak si Hunatan.”

⁵ Nagpaingana si Dabid sa kan-akan, “Kabitay nimu naalaman kuntay namatay yi si Saul hanggan si Hunatan?”

⁶ Itinultul kan-akan ti nangyari, “Nitpung lang ati duy aku sa Bantud Gilbuwa, ag nakitan niku ati si Saul maslandigan sa kay bangkaw. Magpakarani yi sa kanya ti manga kalaban masakyan sa manga kalisa hanggan kabayu.

⁷ Pagka napalisud siya, nakitan niya aku bag-u kay tinawagan. Sinmagut aku, ‘Unu duy ti miawat niku?’

⁸ Pinaingana niya nu si unu lugud aku. Sinmagut aku, usa duy aku ka Amalikita.

⁹ Susun, nagpakihampang siya sa kangku, ‘Abala kawu sa kang arani ag matya nimu aku, dahil magkakurian yi gid aku sa kang kahamtangan.’

¹⁰ Nakan pinakaranyan niku siya ag minatay dahil alam niku udyi waydi siya mabuhi sa masyadu niya pag biyag. Bag-u bin-ul niku kay kuruna sa kay ulu hanggan ti ugsung sa kay takyay, bag-u dinara niku sitay tag sa kanmu.”

¹¹ Pagka nadnugan inda ni Dabid hanggan tanan niya manga tawuhan, ginitas nida kanda manga rutay bilang pagpakakit paghimanglaw.

¹² Nanlulumian sida ag unman nagpauray tugka yabi para sa kan Saul hanggan sa kay anak sa kan Hunatan, ag hanggan para sa manga nasakupan Panginuun, ti banwa Israil, dahil mayamu ti nagkaramatay sa gira.

¹³ Nagpaingana waya gid si Dabid sa kan-akan nagbarita sa kanya, “Taga naan kawu?” Sinmagut siya, “Usa duy aku ka day-uhan Amalikita mag-uli sa kanyu daga.”

¹⁴ Nagpaingana si Dabid, “Hayga unman lang kawu nadala sa pagmatay sa hari pinili Panginuun?”

¹⁵ Susun, tinawagan ni Dabid ti usa sa kay manga tawuhan ag sinugu, “Matya nimu inda pag tawu!” Nakan minatay ngani niya tawuhan ti kan-akan.

¹⁶ Magkun si Dabid, “Kawu ti kailangan sisihun sa kanmu kamatayan. Kawu yi ngap ti nagkastigus laban sa kanmu sadili pagka kanmu sinabi minatay nimu ti hari pinili Panginuun.”

Mag-amiraw si Dabid sa Kanda ni Saul ag Hunatan

¹⁷ Nagbuwat si Dabid usa ka kanta para sa kan Saul hanggan inda sa kay anak sa kan Hunatan,

¹⁸ ag isinugu niya kailangan itudlu inda sa manga nasakupan sa Huda. Iningarnan inda Karantahun Tungkul sa Bayi, ag nisurat inda sa Ribru ni Hasar. Inda kay amiraw:

¹⁹ “Israil, kanmu bantug pag manga manuggira nagkaramatay sa kabantudan yi gid ngap Israil. Nagkaramatay diman kanmu manga maisug pag sundalu!

²⁰ Danga inda pagpaalaman sa Gat, ngatay sa manga baklayan Askalun, dahil barang ikabaya inda manga kababayihan Pilistiyu manga unman magsarig sa Diyus.

²¹ Kabantudan Gilbuwa, unman mana may uran ngatay tun-ug rumas-ug sa kanmu. Mana unman may tumubu manga tanum sa kanmu tanman agud ihandug sa Diyus. Dahil siyun pag nauringan manga kalaban ti panangga maisug pag hari si Saul. Ag udyi may manpayid sitay lana hampay inda lumpiyuhun ag pakintabun.

²² Sa panab-anan baladaw ni Saul ag bayi ni Hunatan, mayamu pag maraisug manga kalaban kanda minatay.

²³ Pagmahalun ag pagkaawaan gid manga Israilita si Saul ag si Hunatan. Magkaibahan sida sa buhi ag sa kamatayan. Sa girahan, mas maliksi waya sida sa manga agila ag mas mabisug waya sa manga liyun.

²⁴ Manga babayi Israil, pagrukuan kamu para sa kan Saul. Dahil sa kanya nakasulung kamu mahal pag rutay hanggan ugsung gintu.

²⁵ Ti manga maraisug pag sundalu Israil namatay sa girahan. Minatay diman si Hunatan sa kanyu kabantudan.

²⁶ Magpanruku aku sa kanmu, Hunatan, patar-ari niku! Mahal gid kawu niku; kanmu pagmahal sa kangku mas subra waya sa pagmahal manga babayi.

²⁷ Nagkaramatay ti maraisug pag manga sundalu Israil. Kanda manga armas nagkaradura.”