2 Pidru 3 - Hanunuu

Kay Pagras-ug Panginuun

¹ Inda yi ngani duy manga patar-ari kang ikadwa pag surat tabug sa kanyu. Sa duwa ka surat niku inda pagpulawun niku kanyu mayad pag naisipan, pagpaala-alahanan niku kamu.

² Isipa niyu ti manga binagaw kaybi manga purupita lubus napasakup sa Diyus. Isipa diman ti ibinilin nita Panginuun imaw ngani ti Manugribri. Tunda pag manga ibinilin nadnugan niyu ginan sa kanyu manga apustul.

³ Un-an gid sa tanan kailangan kanyu alamun kuntay aban sa uryan sirang may manga tawu kanda ugali angay sa kanda mahalay pag kagustuhan naisipan.

⁴ Sabihun nida magkun, “Nangaku si Kiristu kuntay bumalik maan. Bati naan? Hanggan di nangamatay kanta manga ginurang dapat unman diman may nauman ginan sa naglalang kalibutan.”

⁵ Unman may kabuluhan sa kanda ti katutuuhanan magkun, ti langit, ti daga linalang Diyus sa kapangyarihan niya bagaw. Linalang Diyus ti daga ginan sa karaw-an danum.

⁶ Pagka katpung sa nagkagunaw, danum diman ti inmanaw nagdaut sa un-an pag kalibutan.

⁷ Sa kay kapangyarihan diman niya bagaw iningatan inda pag langit hanggan daga hampay sunugun aban sa apuy pagka udas yi sintinsiyahan sa kadamhakan ti manga makasalanan pag tawu.

⁸ Dapat duy manga patar-ari, danga niyu kalimtan, dahil nu sa Panginuun ti usa ka sirang bilang ga usa ka libu timpu, ti usa ka libu timpu ga usa lang ka sirang.

⁹ Ti Panginuun unman gid pumalya sa kay taratu, balaw parihu ga paghantupun manga iba. Nakan udwaya pagtupadun niya tunda pag taratu dahil ngani sa kanyu. Pinakan-an niya rugar ti tanan tawu hampay sida makaampu sa kanda manga kasalanan ag makapasakup sa Diyus. Dahil unman gid gustu niya una si unu pag tawu ipadamhak sa kaparusahan.

¹⁰ Rumas-ug ti kaudasan Panginuun parihu sa mananakaw. Sa tunda pag udas madnugan ti matnug gid pag tunug ag madura ti manga langit. Mairub ti init, ti bulan, hanggan ti manga pamgasan. Ti daga hanggan ti tanan bagay sa babaw daga madura diman.

¹¹ Katunda ngani aban ti pangatapusan tanan bagay, nakan ilubus niyu ipasakup kanyu sadili sa Diyus, kanyu ugali buhi pag-angay yi sa kay kagustuhan,

¹² hanggan sa pag-alagdun waya niyu ti kaudasan Diyus kanyu pagpatigagadun. Sa ati katpung aban pag kaudasan mairub ti manga langit ag madura inda; mangatunaw diman ti tanan bagay sitay sa babaw daga sa masyadu gid pagka init.

¹³ Dapat ay angay sa kay taratu Diyus may pag-alagdun kita bag-u pag langit hanggan bag-u pag daga, kay ululianan katadlungan.

¹⁴ Nakan ngani duy manga patar-ari, hanggan kamu mag-alagad waya, intindiha gid niyu kanyu ugali buhi hampay may kahusayan, unman may uring, ud may kadautan sa kay magbantay Panginuun.

¹⁵ Isipa gid duy niyu, nakan ngani magpadugay-dugay waya ti Panginuun hampay pakan-an waya kamu rugar agud miribri. Imaw diman kay isinurat ni Pablu, kanta mahal pag patar-ari, sa kay manga surat sa kanyu angay sa kadunungan kay ipinakaun Diyus sa kanya.

¹⁶ Sa tanan niya pag manga surat kainda diman kay pirmi pag-ipaalaala tungkul sa inda pag katutuuhanan. Kay iba niya pag manga isinurat makuri masalman kay ibug sabihun, nakan ti manga malumuy kay intindi magsalan sa kanda magpakahulugan. Katunda diman waydi kanda pagbuwatun sa iba pag manga bahagi Banal Kasuratan sa ikadamhak ngap nida sadili bilug.

¹⁷ Taynguna duy manga patar-ari, alam yi niyu kailangan kamu pagmaingat barang kamu patalangun manga daut pag tawu kanda tudlu unman may katutuuhanan. Nu katunda kamu marig-un di, dayu gid mapuil.

¹⁸ Pagparargu kamu, pagdaka sa kanyu kay kaayadan Diyus hanggan kanyu pagkilala sa kanta Panginuun Manugribri imaw yi ngani si Hisu-Kiristu. Sa kanya ti kadayawan taynguna una hanggan aban. Amin.