2 Pidru 2 - Hanunuu

Ti Pudilun pag manga Manugtudlu

¹ Dapat kaybi may naglutaw diman sa nasakupan Israil manga pudilun pag purupita. Una sa kanyu may lumutaw diman aban manga pudilun pag manga manugtudlu. Itudlu nida sa lihim kanda salan pag manga adal, imaw tigdaut sa pagsarig manga tawu, pagdayuun nida ti Panginuun ti naglukat sa kanda. Nakan ngani bigla sida ipadamhak sa kamatayan.

² Mayamu pag tawu sumunud aban sa kanda manga buwat makakaray-a, ag dahil sa kanda buwat daut puyaan yi ngap manga tawu ti mayad pag katutuuhanan ginan sa Diyus.

³ Manga maramuun sida, nakan magpabalhinguun sida sa kanda tudlu hampay sida pakan-an niyu kuwarta. Ginan waya sa kabag-u ihinanda yi ti sintinsiya sa kanda, alistu yi sumintinsiya.

⁴ Unman pinatawad Diyus ti manga anghil. Bagkus ngap pagka sida nagkasala iyinmut sida atabug sa kaabasad-basadan, pinirisu sida sa basad piris pag madlum hampay mag-alagad sa sintinsiya.

⁵ Unman diman waydi pinatawad Diyus ati katpung pag manga makasalanan pag tawu kaybi nu unman tinabu minatay niya sa gunaw. Si Nuwi lang ti nagtudlu katadlungan imaw kay irinibri Diyus hanggan ti pitu ka tawu naribri diman waydi kaibahan ni Nuwi.

⁶ Sinintinsiyahan diman Diyus pinapas ti banwa Suduma hanggan ti banwa Gumura nagbaliw yi dapug, bilang ga usa ka mustara sa manga balaw magpasakup sa Diyus.

⁷ Dapat irinibri niya si Lut dahil siya matadlung. Irinuku gid ni Lut ti mahalay pag ugali manga magbuwat kadautan.

⁸ Tunda ngani matadlung pag tawu ati pag nangulian sa kanda karaw-an sirang-sirang. Subra ungud kay ruku sa kay matadlung pag tagipusuun pagka nakitan ag nadnugan niya kanda magkagumun sa magbuwat kadautan.

⁹ Ti Panginuun madunung magparibri sa manga lubus napasakup sa kanya nu may malakawan sida subuk. Madunung waydi siya sa manga unman matadlung hampay sida maparusahan hanggan sa udwaya udas sintinsiya.

¹⁰ Lalu gid parusahan aban ti manga mag-ugali angay lang sa sadili nida kagustuhan sa daut pag naisipan hanggan sa mahalay ag unman madunung magpanagunsirung sa may kangaranan. Manga paranghasin tunda pag manga pudilun pag manga manugtudlu, manga palabi-labihun. Unman paggalangun nida ti manga makapangyarihan sa langit, bagkus ngap kanda paglibakun.

¹¹ Dapat ay madi ti manga anghil lalu waya mabisug kanda kapangyarihan, unman sida magganti maisug bagaw, unman magsumbung sida sa Panginuun laban sa tunda pag manga pudilun pag manga manugtudlu.

¹² Dapat ay tunda pag pudilun pag manga manugtudlu parihu sa manga hayup simarun unman may buut, nianak sida hampay dakpun ag matyun. Ti manga bagay unman magkasalman nida imaw ngap ti kanda paglapastanganun, nakan parihu sa manga simarun hayup sida ipadamhak diman.

¹³ Tunda yi ngani kay bayad sa kanda mag-api sa manga iba. Sigi lang kanda magbuwat kadautan una sirang hampay masunud lang kanda kagustuhan bilug. Daka gid pag kakay-ahan, subra gid kanda magpuya nu makitan sida sa kanyu karaw-an magsaru sa kanyu karan-an. Magbaya sida nu madaya lang nida kamu.

¹⁴ Unman sida may paghanapun nu ud pararauragan lang. Ud magsuku sida sa magbuwat kasalanan. Pagtaban-tabanun nida ti manga malumuy tag sa kasalanan. Anad gid sida sa maramuun. Sida manga sinaadan yi Diyus.

¹⁵ Tinmalang sida ginan sa mayad pag dalan. Hinuwadan nida kan Biur anak si Balaam. Kinaibgan diman ni Balaam kay upa sa kay buwat kadautan.

¹⁶ Dapat tinamyaw siya dahil sa kay kasalanan. Madi balaw madunung magbagaw ti asnu, dapat kan Purupita Balaam pag asnu nagbagaw ngap parihu ga tawu, inampara niya kan Balaam buwat unman may kabuluhan.

¹⁷ Tunda pag manga manugtudlu pudilun parihu ga manga bubun nak-at, parihu sa manga rurum pag-ipayag durus. Hinandaan sida Diyus ulian sa basad piris pag dulum.

¹⁸ Palabi-labihun sida nu magbagaw dapat unman diman may kahulugan ti kanda pagsabihun. Kanda garamitun kanda daut pag kagustuhan naisipan hampay maudyukan bumalik maan sa kadautan ti manga bag-u lang magpakarayu sa manga tawu daut kay ugali.

¹⁹ Bilang madi sida magsabi sa manga tawu kanda pagbutungun kuntay udyi kunu may umampara sa kanda kagustuhan, dapat sida yi ngap maaw ti panawuhun kalukuhan. Dahil ti tawu sumirbi sa una hintay tigsakup sa kanya.

²⁰ Nakaiwas yi sa kadautan kalibutan ti manga tawu nakakilala sa kan Hisu-Kiristu sa kanda Panginuun Manugribri. Dapat ay nu maraibgun maan sida sa daan pag ugali daut bag-u nu rargu napatalu, lalu man makuri kanda kahamtangan balaw lang ga sa kabag-u.

²¹ Mayad waya mana nu ud nataw-an nida ti matadlung pag dalan. Masyadu gid makuri ti tawu nu nataw-an niya ti banal pag kasuguan iinintirga sa kanya bag-u kay di maan tinayakan.

²² Nu katida mitama sa kanda ti pagsabihun magkun, “Ga ugali yi waydi idu magbalik yi maan sa kay suka. Una ti babuy madi pinarigus yi, magbalik yi maan sa kay lubganan.”