2 Pidru 1 - Hanunuu

¹ Inda ti may surat si Simun Pidru, kay panawuhun hanggan apustul ni Hisu-Kiristu. Inda pag surat atag ngani sa kanyu, sa manga nakatanggap mahalaga pag sarig parihu ga kanmi pag sarig. Ti Diyus Manugribri imaw yi ngani si Hisu-Kiristu, ti may pakaun sa kanta inda pag sarig angay sa kay katadlungan.

² Pagsa kanyu ti abunda pag papalad hanggan kahusayan dahil sa kanyu magkilala sa Diyus hanggan sa kanta Panginuun Hisus.

Kay Bilin sa manga Pinili Diyus

³ Tinanggap nita dahil sa kay kamaskihan Diyus ti tanan nita manga pangailangan hampay mag-ugali kita marig-un sa kanya. Mangyari inda dahil sa kanta magkilala sa kan Hisus. Siya diman ti nagpili sa kanta sa panab-anan niya sadili kadayawan hanggan kaayadan.

⁴ Sa katida pag paraan masyadu gid mahalaga kay manga itinaratu sa kanta hampay makaiwas kamu sa kadautan ginan sa kutub kahalayan sitay sa kalibutan, ag hampay hurayan kamu kay pagka-Diyus.

⁵ Nakan ngani pagpakasipag kamu hampay kanyu pagsarig dugangan niyu kaayadan, ti kaayadan dugangan niyu kaalaman,

⁶ ti kaalaman dugangan niyu pagpigil sa sadili, ti pagpigil sa sadili dugangan niyu karig-unan, ti karig-unan dugangan niyu magpasakup sa Diyus,

⁷ ti magpasakup sa Diyus dugangan niyu mapinasunaidun sa patar-ari, ti mapinasunaidun sa patar-ari dugangan maan niyu pagmahal.

⁸ Pagmay imaw kamu katida pag ugali buhi, paabundahun niyu hampay kanyu magkilala sa Panginuun Hisu-Kiristu danga maduraan halaga hanggan pakinabang.

⁹ Ti tawu nu unman may imaw katida pag ugali buhi ga madlum kay magbantay, nalimtan yi niya kuntay pinatawad yi kay daan pag manga kasalanan.

¹⁰ Manga patar-ari, kamu kay manga tinawag ag manga pinili Diyus, nakan ngani pagpakarig-un kamu sa inda pag kahamtangan. Nu inda kanyu buwatun dayu kamu sumimray.

¹¹ Nu katunda, tanggapun kamu may kabayaan sa kay kaharian unman may katapusan ni Hisu-Kiristu, imaw kanta Panginuun ag Manugribri.

¹² Madi alam niyu inda ag marig-un kamu sa katutuuhanan kanyu tinanggap, pirmi diman kang pagpaala-lahanan kamu tungkul sa inda pag manga bagay.

¹³ Unman may gustu aku mag-apas kang magpaalaala sa kanyu hanggan aku buhi waya hampay unman malimtan niyu.

¹⁴ Alam niku udyi dugay kang buhi sitay sa babaw daga, angay diman sa kay ipinaalam sa kangku nita Panginuun Hisu-Kiristu.

¹⁵ Nakan kang buwatun waya tanan niku makaya hampay maalaala waya niyu pirmi inda pag manga bagay una aku aban namatay yi.

Manga Nakakit sa kay Kadayawan ni Kiristu

¹⁶ Dahil pagka kanmi ipinakilala sa kanyu ti kamaskihan nita Panginuun Hisu-Kiristu hanggan kay pagras-ug niya aban unman gid nimi itinudlu sa kanyu ti manga pinathaw lang pag tultulanun. Nakitan ngap nimi mata kay kamaskihan.

¹⁷ Ipinakaun yi Diyus Ama sa kanya ti kadayawan hanggan kapurihan sa katpung may nagbagaw ginan sa mamaski pag kadayawan sa langit magkun, “Inda kang pagmahalun gid pag Anak, siya lubus kang pagkaawaan.”

¹⁸ Nadnugan gid nimi tunda dahil kaibahan niya kami ati sa banal pag bantud.

¹⁹ Lalu waya pagpaniwalaan nimi ti sinabi manga purupita. Kailangan kanyu intindihun mayad-mayad ti sinabi manga purupita dahil tunda pag bagaw parihu ga sulu marayaw sa basad madulum hanggan sa udwaya magkasurip ag suminggit ti kuramnag sa kanyu manga tagipusuun.

²⁰ Lalu waya kailangan alalahanun niyu kuntay ti ipinurupita pag Bagaw Diyus sa Banal Kasuratan dayu mahimu maipaliwanag tawu nu ginan lang sa kay sadili naisipan.

²¹ Dahil unman may ipinurupita nu ginan lang sa kagustuhan tawu. Inda pag bagaw ginan gid sa Diyus ag binagaw manga tawu angay sa udyuk Ispiritu Banal.