2 Kurintu 9 - Hanunuu

Awat sa manga Patar-ari

¹ Udyi kailangan aku sumurat waya sa kanyu tungkul sa pag-awat sa manga patar-ari sa iglisya.

² Alam niku alistu gid kamu mangawat, kang ngap pag-itultul yi kanyu mayad pag ugali sa manga taga Masidunya. Kang sabi sa kanda kamu pag manga taga Akaya nakahanda yi kanyu abuluy ginan waya sa nakalawuy pag timpu. Mayamu pag manga patar-ari ti napulaw kanda naisipan dahil sa kanyu kasipagan.

³ Nakan ipinaasan niku dapu inda pag manga patar-ari hampay balaw mabuyu kanmi pagdayaw tungkul sa kanyu, ag hampay mitigana yi kanyu iawat parihu sa kang sinabi tungkul sa kanyu.

⁴ Barang kami mangay-a nu mabuyu, balaw lang kami ti mangay-a hanggan kamu nu may kumuyug sa kangku manga taga Masidunya bag-u nu makitan nida unman diman maaw kamu handa.

⁵ Nakan ngani pinakihampangan nimi ti manga patar-ari asan tabug sa kanyu hampay maalistu yi niyu kanyu itinaratu pangawat. Nu katunda handa yi kanyu iawat nu rumas-ug aku asan sa kanyu bag-u makitan kanyu pakaun buluntadan, balaw sa pilitan.

⁶ Isipa yi lang niyu, tigpamgas pira-pira, diit waydi kay tubas. Nu bay aduk kay pamgas, aduk waydi kay tubas.

⁷ Ti kada usa kailangan magpakaun angay sa kay sadili kagustuhan naisipan, sa maluag naisipan balaw sa kapilitan, dahil pagbayaun Diyus nu buluntad pag pakaun.

⁸ Mabuwat Diyus paabundahun kamu sa tanan pag bagay subra waya sa kanyu kailangan hampay may magamit kamu sa kanyu buruwatun kaayadan.

⁹ Parihu sa pagsabihun sa Banal Kasuratan, magkun, “Alinantag niya kay kaayadan. Kay ipinakaun sa manga pugri kay pangaawa unman may katapusan.”

¹⁰ Ti Diyus tigpakaun binhi hampay ipamgas hanggan karan-unun hampay may makaun, siya ti pumakaun binhi sa kanyu, siya diman ti pumadaka hampay mamurak abunda kanyu mayad buut naisipan.

¹¹ Kay pakan-an kamu abunda sa tanan bagay hampay lalu kamu makaawat sa mayamu. Nu katunda yumamu ti manga magpasalamat sa Diyus dahil sa kanyu abuluy kanmi darahun tabug sa kanda.

¹² Kanyu awat inda sa manga patar-ari balaw lang sa kuntay kang-ud sa kanda pangailangan nu unman siyun ngap ginan udyi umapas kanda magpasalamat sa Diyus.

¹³ Nu unman kamu may kabuyatan sa kanyu magpakaun sa kanda hanggan sa tanan tawu imaw yi ti puruyba sa kanda kuntay matinupadun kamu sa Mayad pag Barita ni Kiristu. Nakan siyun ginan dumayaw sida sa Diyus.

¹⁴ Nakan ngani sa lubus nida pagmahal sa kanyu, kamu kanda idarangin dahil sa daka gid pag kaayadan kay ipinakaun Diyus sa kanyu.

¹⁵ Salamat sa Diyus dahil sa kay pakaun unman may makatimbang.