2 Kurintu 8 - Hanunuu

Sa Pakaun manga Napasakup sa kan Kiristu

¹ Gustu nimi ibarita sa kanyu, manga patar-ari, kay pakaun Diyus mayad nabubut-un sa manga iglisya sa Masidunya.

² Nakalakaw sida masyadu pag kakurian, imaw ti mahigpit pagsubuk sa kanda. Madi sida masyadu pugri, sa daka nida pag kabayaan bukas kanda nalub-anan sa kanda magpakaun.

³ Buluntadan gid sa kanda naisipan magpakaun, balaw lang tugka sa kanda kakayahan, nu unman subra waya ngapu.

⁴ Alam di niku, dahil mahigpit kanda nagdangup sa kanmi kuntay pakan-i kunu sida rugar makaawat sa manga patar-ari sa Hudiya.

⁵ Balaw lang ga kang inisip kanda binwat. Itinigana nida kanda sadili sa Panginuun dapu bag-u hanggan sa kanmi angay sa kagustuhan Diyus.

⁶ Nakan ngani pinakihampangan niku si Titu, dahil siya ngani ti nag-umpisa inda, hampay kamu maawatan niya hanggan sa udwaya matapus kanyu mayad pag buruwatun inda.

⁷ Nibantug yi kanyu pagsarig, kanyu pagpanudlu, kanyu kadunungan, kanyu kasipagan hanggan kanyu pagmahal sa kanmi. Pangungud gid kamu balaw lang ga manga iba sa kanyu mayad pag buruwatun inda.

⁸ Balaw kuntay ga pagsuguun niku kamu. Kang lang pagsabihun sa kanyu ti pagbuwatun awat manga iba hampay masulayan nu naan tugka kanyu pagmahal.

⁹ Alam niyu nu kabitay kadaka kay pagmahal nita Panginuun Hisu-Kiristu. Madi mayaman nagpakipugri siya hampay yumaman kamu ginan sa kay kapugrihan.

¹⁰ Inda kang paanyu tungkul sa kanyu awat, pararguhan di niyu ti buruwatun kanyu inumpisahan kaaldaw sa usa. Kamu ti nakauna nakaumpisa sa manga iba, balaw lang sa kanyu buwat nu unman hanggan sa kanyu gayak.

¹¹ Nakan ngani pararguhan niyu inda kanyu ipinakakit kasipagan sa kabag-u danga pag-apasi hanggan sa unman matapus. Pagpakaun kamu tugka sa makaya niyu.

¹² Dahil nu buluntad naisipan tagipusuun kanyu magpakaun, tanggapun Diyus kanyu nakaya ipinakaun. Balaw siya maghingbut nu imaw lang tugka kanyu kaya ipakaun.

¹³ Balaw kuntay kamu sa pagpasag-saganan ag ti iba unman paman mag-awat.

¹⁴ Abunda waydi kamu kainda kanyu kasiyunan, nakan kailangan mangawat kamu sa manga may kakurangan. Nu kamu waydi ti maiwdan ag sida maan ti abunda, sida maan ti mangawat sa kanyu. Nu katunda parihu kamu mag-arawatan sa usa kag sa usa.

¹⁵ Bag-u matupad sa kanyu ti pagsabihun sa Banal Kasuratan magkun, “Ti may nakitan mayamu, balaw diman nagsubra. Ti may nakitan pira-pira unman waydi kinurang.”

¹⁶ Magpasalamat aku sa Diyus, dahil unman maghinayang si Titu kay budlay sa kanyu, parihu diman ga kang magpangabudlay sa kanyu.

¹⁷ Balaw gid pinabunglan niya kang nagpakihampang sa kanya bagkus ngap gustu diman niya mangawat sa kanyu, nakan daan handa siya umasan sa kanyu.

¹⁸ Pinakuyug nimi sa kanya ti patar-ari daan kilala sa tanan iglisya dahil sa kay magpanudlu Mayad pag Barita.

¹⁹ Balaw lang tunda. Siya diman ti pinili manga iglisya hampay kaibahan nimi sa kanmi maglakaw ag hampay awatan niya kami sa pag-asikasu sa inda pag kuwarta ipinakaun manga iglisya. Ti kainda pag sirbi sa ikadayaw sa Panginuun. Siti pag maalaman ti daka pag kagustuhan nimi mangawat sa manga patar-ari.

²⁰ Mag-aman kami hampay unman may masabi una si unu tungkul sa kanmi mag-asikasu sa daka pag abuluy inda.

²¹ Pag-isipan nimi hampay mabuwat inda sa ikamayad sa kay magbantay Panginuun hanggan sa paghilingan manga tawu.

²² Nakan ngani suguun nimi kaibahan nida kanta usa ka patar-ari pirmi nasulayan nimi kay ugali ag nakitan nimi kay kasipagan sa buruwatun. Maslalu waya siya masipag taynguna sa mag-awat dahil daka kay magsarig sa kanyu.

²³ Si Titu kaibahan yi gid niku makaawat sa kang buruwatun sa kanyu. Nu inda bay pag manga patar-ari kaibahan ni Titu sinugu manga iglisya, matinupadun pag manga suruguun sida sa ikadayaw manga tawu sa kan Kiristu.

²⁴ Nakan ngani ipakakit niyu sa inda pag manga patar-ari kanyu lubus pagmahal hampay makitan manga iglisya balaw kami nagsalan sa kanmi magdayaw tungkul sa kanyu.