2 Kurintu 7 - Hanunuu

¹ Mahal niku pag manga patar-ari, itinaratu sa kanta inda pag manga kaayadan, nakan paglumpiyuha gid kanta sadili sa tanan kayagtingan nita bilug hanggan naisipan. Pag-ungud kita kanta ugali maggalang sa Diyus, ilubus yi nita ipasakup kanta sadili sa kanya.

Kay Kabayaan ni Pablu

² Pakan-i niyu kami rugar una lang diit sa kanyu tagipusuun. Una kaybi ginan unman nimi inunu-unu, unman diman pinintasan, unman waydi hanggan dinaya nimi una si unu sa kanyu.

³ Kang isinurat inda sa kanyu balaw kuntay kamu kang pagdayuun. Ga kang diman sinabi yi sa kanyu, kamu kang gid lubus pagmahalun, magkausa kita sa kabuhian hanggan sa kamatayan.

⁴ Lubus gid makatiwalaan niku kamu. Daan diman kamu kang pagpahalgaan. Madi mayamu kanmi kakurian, lubus ngap aku sa kasulungan, maglapwas sa kang tagipusuun kang kabayaan.

⁵ Katpung sa Masidunya kami udyi may pahari, pasay kakurian kanmi nalakawan, may kalaban una naan ginan baliwa, pagkulbaan waya kanmi nalub-anan.

⁶ Dapat ti manga maruku balaw pagpabay-anan Diyus. Sinaya niya aku pagka rinmas-ug si Titu.

⁷ Balaw kay nagras-ug lang ni Titu ti nagpasulung sa kangku, nu unman kanyu diman hanggan binwat mayad sa kanya. Ibinarita niya kanyu magpatigagad sa kangku, kanyu karukuan hanggan kanyu kasipagan, nakan aku lubus nagbaya.

⁸ Madi nagpakaun karukuan kang surat sa kanyu, unman niku pag-isisi kang isinurat ati. Kabag-u sinisi mana niku dahil alam niku nagpakaun karukuan kang surat sa kanyu, una balaw dugay pag karukuan.

⁹ Dapat una katida magbaya di aku, dahil ati pag karukuan imaw ti nagbutung sa kanyu hampay iampu patlikudan niyu kanyu kasalanan. Ti katunda pag karukuan ginan ngap sa Diyus, nakan balaw ikinadaut niyu kami.

¹⁰ Ginan ngani sa Diyus tunda pag karukuan, imaw tigpaisip sa kanyu hampay iampu niyu kanyu kasalanan. Siya diman tigpabag-u kanyu ugali sa ikaribri niyu. Dapat ti pakaun karukuan kalibutan tabug ngap sa kamatayan.

¹¹ Isipa niyu kanyu buhi nu hintay ti nangyari sa kanyu dahil sa kanyu karukuan ginan sa Diyus. Nanipag yi gid ungud kamu hampay makilala kuntay kamu unman may kasalanan sa siyun pag manga nangyari, magkaaburidu kamu sa kanyu sadili bilug, dinurnan kamu dala, magpatigagad yi sa kang pagras-ug, pagpakibudlayan niyu sa gustu lang niyu maparusahan ti nagkasala. Ipinakakit niyu lubus kuntay unman may labut kamu sa siyun pag manga nangyari.

¹² Alam di Diyus kang nagsurat sa kanyu balaw dahil sa may nagkasala, balaw diman dahil sa may binwatan kasalanan, nu unman hampay pulawun kanyu nalub-anan para sa kanmi.

¹³ Nakan ti kanyu binwat nagpakaun daka pag kasulungan sa kanmi. Lalu gid ngapu nagbaya kami dahil nagmasulung si Titu dahil kanyu tinanggap ag inawatan siya.

¹⁴ Itinultul niku sa kan Titu kuntay kamu mayad pag manga patar-ari. Balaw ngap pudil kang sinabi sa kanya. Ga tutuu gid tanan kanmi pagsabihun sa kanyu, katunda diman waydi pinatutuuhanan ni Titu kuntay balaw pudil kanmi pagdayaw tungkul sa kanyu tabug.

¹⁵ Lalu yi ngap kamu kay pagmahalun, nu pag-alalahanun niya kamu tanan manga masurundun. Balaw yi gid niya magkalimtan nu kabitay kanyu nagtanggap sa kanya may dala.

¹⁶ Aku magbaya dahil lubus makatiwalaan niku kamu.