2 Kurintu 6 - Hanunuu

¹ Kami manga kaawat Diyus sa buruwatun. Nakan pagpakapaanyuan nimi kamu danga pagpasipalahan ti manga kaayadan kay ipinakaun Diyus sa kanyu.

² Dahil kay pagsabihun magkun, “Kang dinungug kamu sa insaktu pag udas, ag inawatan niku sa sirang karibrihan. Inawatan niku kamu pagka udas karibrihan.” Pagpatingi kamu, taynguna yi ti udas hampay matanggap niyu ti kaayadan ginan sa Diyus. Malu taynguna yi ngani ti udas karibrihan.

³ Nag-aman kami sa pagbuwat karadat-an una sa kantapu pag tawu, hampay balaw mapuyaan kanmi pagsirbi.

⁴ Bagkus ngap pag-ipakilala nimi sa tanan nimi buruwatun kuntay kami kay suruguun Diyus, sa kanmi pag-agwanta sa masyadu pag kakurian, sa malisud pag kahamtangan hanggan sa manga kagipitan.

⁵ Ginaruti kami ag pinirisu, kanmi yi nalakawan ti kaguluhan, ti masyadu pag manga tarabahu, ti unman magkaturug usa ka yabi hanggan ti unman magkaun una pira ka sirang.

⁶ Kanmi diman ipinakilala kuntay kami kay suruguun Diyus sa mayad nimi pag ugali, sa kaalaman, sa maalumanay, sa mayad pag nabubut-un hanggan sa panab-anan Ispiritu Banal, sa may lubus pagmahal,

⁷ sa magbagaw katutuuhanan hanggan sa kamaskihan Diyus. Kanmi matadlung pag ugali buhi imaw kanmi armas panlaban hanggan panangga.

⁸ Nalakawan yi waydi nimi ti magbaya manga tawu sa kanmi ag ti magkadaut sa kanmi, ti daut pag libak ag ti mayad pag libak. Kami kanda pagsabihun magdaya dapat ngap katutuuhanan kanmi pagbuwatun.

⁹ Kami kanda pagsabihun balaw nida kilala dapat kilala ngap nida kami. Nu kas-a ga mamatay yi lang kami dapat mabisug di ay ungud. Una kami pagpakaparusahan, unman waydi kami magkamatay.

¹⁰ Madi maruku-maruku dapat pirmi diman may kabayaan, ga anyu pugri dapat mayamu ngap tawu kanmi pagpayamanun. Ga anyu ud may kaasanan dapat sa kanmi ngap ti tanan bagay.

¹¹ Talaghutan gid kanmi pagbagawun sa kanyu duy, sa manga taga Kurintu, sa kaluagan nimi tagipusuun.

¹² Lubus gid kanmi pagmahalun kamu, dapat kamu ngap magpanab-ang sa kanmi.

¹³ Aku magbagaw sa kanyu parihu sa kang manga anak, nakan duy bukasi yi waydi kanyu naisipan tag sa kanmi.

Danga Magpausa sa unman Magtanggap sa kan Kiristu

¹⁴ Danga kamu magpausa sa manga balaw magpasakup sa kan Hisus. Mahimu aw lugud miusa ti katadlungan tag sa kalikuan? Mahimu aw lugud miusa ti karayawan tag sa kaduluman?

¹⁵ Mahimu aw magkabuu sida ni Kiristu ni Satanas? Ti manga napasakup sa kan Hisus balaw magkarausa sa manga unman napasakup sa kanya.

¹⁶ Una ti Balay Diyus balaw diman miusa sa diyus-diyusan. Kita ti Balay Diyus buhi. Siya diman waydi ti may sabi magkun, “Manahanan aku, pumurmar yi gid sa kanda, bag-u aku yi gid kanda Diyus. Sida kang yi gid nasyun.

¹⁷ Nakan ngani pagpakarayu kamu ginan sa kanda, pagpablag kamu ginan sa kanda. Magkun ti Panginuun, danga kamu maggaraw sa una hintay pag mayagting hampay kamu kang tanggapun.”

¹⁸ Magkun ti Panginuun Makamaskihan, “Aku yi gid kanyu Ama, kamu kang yi waydi manga anak lalaki, manga anak babayi.”