2 Kurintu 5 - Hanunuu

¹ Magkaalaman diman nita nu madaut kanta bilug ga nangus turda, kita may ulian waya sa langit, balaw binwat tawu kamang, nu unman Diyus ngap ti may buwat.

² Magpakabitay wadi kita hanggan kita sa inda kanta bilug waya ag talaga subra gid masyadu kanta pagkaibgan tunda pag bilug para sa langit,

³ hampay nu pasulungan kita bag-u bilug, kita dayu makitan ga lilus lang.

⁴ Hanggan kita sitay waya sa kanta bilug inda ga turda, kita talaga magkakurian, magpakabitay waya balaw waydi tunda kuntay sa lukasun kanta bilug para sa daga, nu unman hampay ilsan yi bilug para sa langit. Nu katida, kanta buhi may katapusan ilsan aban buhi unman may katapusan.

⁵ Diyus diman ti naghanda sa kanta hampay kay bag-uhun ngani. Ipinakaun niya sa kanta ti Ispiritu bilang pinagkatanda imaw yi kay puruyba pihu tupadun niya kay manga taratu.

⁶ Nakan ngani pirmi di maariwaya kanmi naisipan. Alam yi nimi basta maulianan waya ti bilug nimi inda, dayu waya mahimu pakan-an kami bag-u bilug ginan sa Panginuun.

⁷ Kanmi ugali angay sa kanmi sarig sa Diyus, balaw angay sa manga bagay mag-akitan sa mata.

⁸ Mabisug kanmi naisipan, daka mana kanmi gustu ighitan nimi inda pag bilug kanmi pag-ulian, hampay manahanan kami ati sa arani Panginuun.

⁹ Dapat ay una sa inda pag ulian, una ati sa langit pag ulian, ti pinakamahalaga sa kanmi nu pagbayaun kami Diyus.

¹⁰ Dahil ngani ti kada usa sa kanta umatubang sa kan Kiristu hampay kay suyasidun kita bag-u kay pakan-an kita pirimyu angay sa kanta binwat, ngatay mayad ngatay daut kanta waya sa babaw daga.

Nipausa Kita sa Diyus sa Panab-anan ni Kiristu

¹¹ Alam diman nimi madala sa Panginuun ti tawu nu may kasalanan, nakan pagsikapun nimi giyahun ti manga tawu tag sa Panginuun. Unman may pag-itagu kami sa atubangan Diyus. Magsarig aku kuntay sa kanyu pagkilala sa kanmi, kami unman may pag-itagu sa kanyu.

¹² Balaw sa ipadayaw maan kanmi sadili sa kanyu. Nakan katida kang pagsabihun hampay kamu may ipabantug tungkul sa kanmi ag hampay masagut niyu ti manga tawu kanda dayaw sa mag-akitan lang mata, ag unman sa manga naisipan tagipusuun tawu.

¹³ Kami aw lugud bilang ga magkapaung-paung? Nakan katida kami dahil ngani sa kanmi magpasakup sa Diyus. But-anin aw kami? Nakan katida kami para ngap sa kanyu.

¹⁴ Dahil ngani kay pagmahal ni Kiristu tigpil-it sa kanmi. Kanmi ngani nasalman ti usa namatay tungkul sa tanan tawu. Nakan ngani masabi nita ti tanan tawu namatay.

¹⁵ Namatay si Kiristu dahil ngani sa tanan tawu hampay ti manga buhi taynguna danga kanda pag-isipun kanda lang sadili kagustuhan naisipan. Bagkus ngap kailangan si Kiristu yi ti turunuha nida buhi imaw ti namatay dahil sa kanda, siya diman nabuhi maan tungkul sa kanda.

¹⁶ Nakan taynguna kanmi magkilala una sa kantapu bukun yi angay sa pagkatawu lang pag ugali. Nu kaybi angay lang sa pagkatawu diman ngap ngani kanmi magkilala sa kan Kiristu, dapat taynguna udyi.

¹⁷ Nakan ngani una si unu ti magpakiusa sa kan Kiristu, siya bag-u yi linalang. Udyi ti daan pagkatawu. Siya bag-u yi gid pag tawu.

¹⁸ Ti tanan inda ginan sa Diyus. Sa panab-anan lang ngani ni Kiristu pag nipausa Diyus kita sa kanya. Bag-u pinili kami Diyus sa inda pag buruwatun hampay ipausa nimi ti manga tawu sa kanya.

¹⁹ Kanmi ibug sabihun, ginan sa kan Kiristu nipausa Diyus ti taga kalibutan sa kanya. Udyi pag-alalahanun niya kanda manga kasalanan. Ipiniyar Diyus sa kanmi inda pag barita hampay ti manga tawu ipausa ngani sa kanya.

²⁰ Nakan ngani kami kay manga sinugu ni Kiristu. Bilang ti Diyus diman gid tigpaanyu sa kanyu ginan diman sa kanmi magkun, “Sa ngaran ni Kiristu kanmi pagpaanyuan kamu pagmipausa kamu sa Diyus.”

²¹ Unman nakalakaw sa kasalanan si Kiristu. Dapat ay dahilan ngani sa kanta siya ngap nibilang sa makasalanan hampay nu kita magpakiusa sa kanya, mangyari yi ngap sa kanta ti katadlungan Diyus.