2 Kurintu 4 - Hanunuu

Ti Kayamanan angay sa Ispiritu sa Sukadan Matpuk

¹ Dahil sa pangaawa Diyus pinili niya kami sa inda pag buruwatun, nakan ngani matutum kanmi naisipan.

² Dinayu nimi ti makakaray-a ag lihim pag manga buruwatun. Balaw kami magdaya, unman mag-uman kami Bagaw Diyus. Bagkus ngap ipinaburayhaw nimi ti katutuuhanan, nakan alistu kami pausisa una sa kantapu nu may pagkutubun sa atubangan Diyus.

³ Dapat nu unman may makaintindi sa Mayad pag Barita kanmi pag-itudlu, tunda manga tawu midamhak.

⁴ Unman sida magsarig, dahil kanda naisipan binuta ni Satanas, imaw tig hari sa manga taga kalibutan. Binuta sida hampay balaw makitan nida ti karayawan Mayad pag Barita tungkul sa kadayawan ni Kiristu imaw ti histuda Diyus.

⁵ Si Hisu-Kiristu kanta Panginuun ti kanmi pag-itudlu, balaw kanmi sadili. Kami kanyu manga panawuhun dahil ngani sa kan Hisus.

⁶ Dahil Diyus ti nagsabi magkun, “Ginan sa kadudulman pagsinggit ti karayawan.” Siya diman ti nagpakaun rayaw sa kanmi manga naisipan hampay makilala ti kadayawan Diyus mag-akitan sa uyahun ni Kiristu.

⁷ Kami pinakan-an inda pag kayamanan, madi kami ga anglit lang, agud maipakakit ti balaw matupungan pag kapangyarihan ginan sa Diyus, balaw ginan sa kanmi sadili.

⁸ Pil-it yi kami sa baliw-baliw dapat bukun subra, mabata di. Nu kas-a ginan magpakabitay diman dapat balaw waydi nabul-an pagsarig kami.

⁹ Pag-unuunuhun kami dapat balaw waydi pagpabay-anan. Nagpu kami dapat unman waydi kami natabwan arup.

¹⁰ Unman madura sa kanmi bilug ti kamatayan ni Hisus agud sa panab-anan nimi bilug, makitan waydi kay buhi ni Hisus.

¹¹ Pirmi kami mag-iuli sa karamatyanun dahil sa kanmi magsirbi sa kan Hisus, hampay makitan diman kay buhi ni Kiristu sa kanmi bilug may kamatayan.

¹² Nakan ngani mag-akitan sa kanmi ti kapangyarihan kamatayan, dapat sa kanyu mag-akitan ngap ti buhi unman may katapusan.

¹³ May pagsabihun sa Banal Kasuratan magkun, “Magsarig aku, nakan magbagaw aku.” Angay sa kahulugan siti pag hampang tungkul sa pagsarig, magbagaw diman ngani kami, dahil kami hanggan may sarig.

¹⁴ Dahil alam ngani nimi, ti Diyus pinmabuhi uman sa Panginuun Hisus imaw diman waydi maan ti bumuhi sa kanmi ginan sa kamatayan kaibahan ni Kiristu. Darahun diman niya kami kaibahan niyu atag sa kay atubangan.

¹⁵ Ti tanan inda pag kakurian nimi sa mapakinabangan niyu hampay nu yumamu ti manga tawu magtanggap sa manga pakaun Diyus pag kaayadan, lalu ngap yumamu waydi ti manga magpasalamat magdayaw sa Diyus.

Mahalaga man ti unman Mag-akitan sa Mata

¹⁶ Nakan ngani kami balaw magpalumuyun sa kanmi naisipan. Una amat-amat maglumuy yi kanmi bilug, mag-amat di ngap magbisug kanmi tagipusuun.

¹⁷ Ti malpus-malpus pag kakurian kanmi paglakawan inda bilang ngalay-ngalay lang. Kay pakinabang aban imaw ti kaayadan unman may katapusan. Unman may tumimbang kakurian sa siti pag kaayadan.

¹⁸ Nakan ngani kami magturun balaw sa manga bagay mag-akitan sa mata nu unman ngap sa manga bagay unman mag-akitan, dahil madali di maglawuy ti manga mag-akitan sa mata, dapat unman gid may katapusan ti manga unman mag-akitan sa mata.