2 Kurintu 3 - Hanunuu

Ti manga Suruguun angay sa Bag-u Taratu

¹ Kanyu aw lugud hantup kuntay pagdayawun yi maan nimi kanmi sadili bilug? Kami aw lugud parihu ga manga iba may kailangan surat tabug sa kanyu, aw ngatay ginan sa kanyu hampay maalaman kanmi ugali?

² Kamu yi ngani ti pinagkasurat hampay maalaman kanmi ugali, nisurat sa kanmi tagipusuun hampay maintindihan ag mabasa tanan tawu.

³ Kamu malinaw pag pinagkasurat ni Kiristu kanmi ipinadangat. Inda nisurat balaw ga kinta nu unman ginan sa Ispiritu Diyus buhi, balaw sa binagasbasan batu nu unman sa tagipusuun tawu pag isinurat.

⁴ Magkasabi ngani nimi katida dahil may pagsarig kami sa Diyus dahil sa kan Kiristu.

⁵ Nu sa kanmi lang ud may kaya sa inda pag buruwatun. Kanmi kabisugan lunsay pakaun Diyus.

⁶ Pinakan-an niya kami kadunungan hampay magsirbi sa bag-u pag taratu, balaw nipuun sa nisurat pag Kasuguan bagkus ngap sa Ispiritu. Ti nisurat pag Kasuguan magpakaun kamatayan dapat ti Ispiritu magpakaun ngap buhi.

⁷ Katpung ipinakaun kaybi ti Kasuguan iginuhit sa binagasbasan batu, ipinakakit waydi ti kadayawan Diyus. Madi ti pag-ipakaun Kasuguan ay kamatayan, masyadu masilaw kay uyahun ni Muysis unman nakasumpung ti manga Israilita madi magkadura di tunda pag kadayawan.

⁸ Unman aw lalu may kadayawan ti pakaun Ispiritu?

⁹ May kadayawan sa katpung ipinakaun ti Kasuguan madi imaw tigpakaun sintinsiya sa ikamatay tawu. Dapat lalu man ngap may kadayawan nu mibalik ti pakiusa tawu sa Diyus.

¹⁰ Nakan ngani masabi nita ti daan kadayawan udyi, dahil nailsan lalu waya gid may kadayawan.

¹¹ Nu may kadayawan ti nakalawuy, lalu waya gid ungud may kadayawan ati ti udyi may kaduraan hanggan waya aban.

¹² Unman kita magkadala magtultul dahil may pagsarig kita.

¹³ Balaw kita parihu sa kan Muysis, may patakip kay uyahun hampay balaw mag-akitan manga Israilita tunda pag kadayawan madi madura di maan.

¹⁴ Sa ungud, maganit kanda tagipusuun, nakan hanggan taynguna udwaya nab-ul tunda pag patakip kada pagbasahun nida ti Kasuratan Daan Pag Kasunduan. Madura lang tunda pag patakip nu magpakiusa ti tawu sa kan Kiristu.

¹⁵ Sa ungud, taynguna tugka, may patakip waya kanda naisipan kada pagbasahun nida kan Muysis manga Kasuratan.

¹⁶ Dapat nu umatubang ti tawu sa Panginuun mab-ul kay patakip.

¹⁷ Kang pagkumnun Panginuun imaw ti Ispiritu. Nu naan ti Ispiritu Panginuun asan diman waydi ti kaluagan.

¹⁸ Taynguna nab-ul yi sa kanta uyahun ti patakip, kita tanan-tanan amat-amat mag-akitan yi nita sa kadayawan Panginuun. Inda pag kadayawan ginan sa Panginuun, sa Ispiritu imaw tigpabag-u sa kanta ugali pagkatawu agud amat-amat lalu dumaka ti kadayawan sa kanta hanggan sa udwaya kita mag-iparihu sa kanya.