2 Kurintu 2 - Hanunuu

Kay Pagmahal ni Pablu sa manga Patar-ari sa Kurintu

¹ Nag-isip aku dayu dap umasan hampay unman aku makapakaun utru sa kanyu karukuan.

² Nu kamu mapakan-an niku karukuan hintay waya ti pumasaya sa kangku? Unman aw kamu yi mana ti pumasaya sa kangku? Nakan ngani hayga pakan-an waya niku kamu karukuan?

³ Nakan ngani sinuratan dapu niku kamu hampay nu aku umasan, balaw yi karukuan kanyu ipakaun sa kangku, kamu yi ngap ti magpasaya sa kangku. Dahil alam yi waydi niku nu masulung aku, masulung diman waydi kamu.

⁴ Sa kabag-u niku surat sa kanyu nanlumi aku sa kang tagipusuun, maruku gid aku, balaw diit pagka luwa ti binmulus ginan sa kang mata sa katpung kang magsurat sa kanyu tabug. Sinuratan niku kamu balaw kuntay pakan-an kamu karukuan nu unman hampay ipakilala sa kanyu nu kabitay kay kadaka kang pagmahal sa kanyu.

Patawadun ti Nagkasala

⁵ Nu may nagpakaun karukuan una si hintay pag tawu, balaw aku ti pinakan-an niya karukuan. Mahimu sabihun balaw may labis balaw may kurang, kamu tanan-tanan pinakan-an niya karukuan.

⁶ Dapat sa kayamu niyu, hustu yi kanyu parusa sa kanya.

⁷ Taynguna patawada yi niyu siya, sayahun niyu barang kay karukuan rargu ikalubay niya sarig.

⁸ Nakan ngani aku inda may ihampang sa kanyu hampay ipakilala mana niyu kanyu pagmahal sa kanya.

⁹ Nakan nagsurat diman aku sa kanyu sa kabag-u hampay alamun niku ngatay kanyu pagtupadun mayad-mayad ti tanan niku manga pag-ibilin sa kanyu.

¹⁰ Una si unu kanyu pinatawad, pinatawad diman niku. Nu may pinatawad aku, nakan kang pinatawad dahil sa kanyu sa atubangan ni Kiristu.

¹¹ Hampay kita dayu madaya ni Satanas. Alam di waydi ngap nita kay turunu.

Unman Nagdugay si Pablu sa Turuwas

¹² Pagka nag-ati aku sa Turuwas hampay manudlu Mayad pag Barita tungkul sa kan Kiristu, pinakan-an ngap aku Panginuun mayad pag rugar hampay tudluan niku ti manga tawu.

¹³ Dapat unman masulung kang tagipusuun, dahil unman nagkarasampak kami ni patar-ari Titu. Nakan aku namaalam sa kanda sa taga Turuwas rargu ngap atag sa Masidunya.

Kaibahan Kita ni Kiristu sa kay Nanalu

¹⁴ Dapat salamat sa Diyus, dahil sa kanta pakiusa sa kan Kiristu, pirmi kita pagdarahun Diyus ga manga pirisu hampay ipadakit kay panalu ni Kiristu. Paggamitun kita Diyus hampay ikalat sa tanan rugar ti pagkilala sa kan Kiristu parihu ga hungaw mabanglu.

¹⁵ Kita ga katunda kamangyan mabanglu pag-ipatuub ni Kiristu para sa Diyus. Magkahungawan kay banglu manga pag-iribri hanggan manga midamhak.

¹⁶ Maarathat pag bawu nu sa manga midamhak sa ikamatay nida. Dapat sa manga pag-iribri mabanglu pag hungaw sa ikabuhi nida. Si unu nguna ti may kang-ud makatupad tunda pag buruwatun?

¹⁷ Balaw kami parihu sa iba, magkaibug sida pag may bayad sa kanda magtudlu Bagaw Diyus. Bagkus ngap kami magtupad sa kay isinugu Diyus magtudlu gid kay bagaw sa atubangan Diyus dahil sa kanmi magpakiusa sa kan Kiristu.