2 Kurintu 13 - Hanunuu

Pangatapusan pag manga Paanyu

¹ Inda aban kang pakatlu pag sabang asan tag sa kanyu. Isinurat sa Banal Kasuratan magkun, “Una si unu ti may isumbung kailangan pag may magpatutuu duwa una tulu ka kastigus.”

² Taynguna aku atay di waya sa arayu, kang pag-ulitun waya gid maan sa manga nagkasala hanggan sa manga iba waya ti kang sinabi kaybi sa kang ikadwa pag sabang asan magkun, balaw yi may pasinsiya aban nu aku rumas-ug asan sa kanyu.

³ Inda kang gid buwatun hampay may puruyba sa kanyu kuntay aku kay pinagkabibig ni Kiristu. Balaw diman malumuy siya sa kay buwat tungkul sa kanyu. Bagkus ngap siya makamaskihan sa kanyu karaw-an.

⁴ Malumuy siya sa kay nipaku sa kurus, dapat ti kamaskihan Diyus ti nagbuhi maan sa kanya. Dahil sa kanmi magpakiusa sa kan Kiristu kami hanggan malumuy waydi, dapat ti kamaskihan Diyus magpakaun sa kanmi kay buhi ni Kiristu hampay matupad nimi kanmi buruwatun tungkul sa kanyu.

⁵ Pagpihua gid niyu mayad-mayad sa kanyu sarig nu ngatay kanyu buhi angay sa kanyu sarig. Usisaa niyu kanyu sadili tagipusuun. Unman aw lugud niyu nasalman sa kanyu sadili si Kiristu Hisus nangulian sa kanyu? Purya lang nu kamu balaw mapatutuuhanan kuntay napasakup sa kanya.

⁶ Makitan diman mana niyu kami mapatutuuhanan ngap kuntay napasakup sa kanya!

⁷ Kanmi diman pag-idarangin kamu sa Diyus hampay danga gid mana kamu magbuwat daut, balaw diman hampay makitan manga iba kami ti mayad, bagkus ngap hampay kamu bumuwat yi gid sa mayad una abi nangus nakitan kami ti ga unman may pulus.

⁸ Dahil balaw mahimu labanan nimi ti katutuuhanan. Unman kami may mabuwat nu unman umunyun yi lang sa katutuuhanan.

⁹ Magbaya diman kami una malumuy kami, nu lang kamu rumig-un. Nakan ngani kanmi pag-idarangin kamu hampay kamu kang-ud yi udyi may kakurangan sa atubangan Panginuun.

¹⁰ Kang pag-isurat inda pag manga bagay kang udwaya asan sa kanyu hampay nu asan yi aku aban udyi kailangan ipakakit kang arisgadu sa kang magtupad sa karampatan kay ipinakaun Panginuun sa kangku. Inda pag karampatan ti ipinakaun sa kangku sa ikaayad niyu, bukun gid duy sa ikadamhak.

¹¹ Sitay lang tugka duy manga patar-ari kang surat sa kanyu. Aku magpaalam yi sa kanyu. Pagmaalwasi gid kamu hampay kang-ud yi kamu sa atubangan Panginuun. Pagpaniwala kamu sa kang manga paanyu. Pagkarausa yi kamu. Pagmahusay yi kanyu manga ugali. Nu katunda kamu, sa kanyu yi gid ti Diyus, ti gimpuunan pagmahal hanggan kahusayan.

¹² Pagparaingan-an paggalalangan kamu ti manga magtar-arian sa kan Kiristu. Ti tanan manga patar-ari sa iglisya magpaingana nu kabitay kamu asan.

¹³ Pagsa kanyu tanan ti papalad Panginuun Hisu-Kiristu, kay pagmahal Diyus hanggan kay pakiusa Ispiritu Banal.